75
Ngode Datagaliwabehanda wali agali tigatiga dabaki biagago ogo
1 Ngode Datagaliwabe-o iname í̠hondo ka̱i̱ lalu kama.
Í̠hondoore iname ka̱i̱ laabo halu kamagoni.
Iname í̠ mini leneore kego latagi halu
mbirale bayale tara tara í̠na biriru te lalu kamagoni.
2 Ngode Datagaliwabehanda lalu,
Godi lolene horo mbira daba bagiho ngeledo.
I̱na godi larogo tigabiore lalu
wali agali ta nabihondo ogobi dege dege laruli.
3 Wali agalibi nogo tara tarabi dindini bu karuni bibahende gi hai howa duru layaguabi
dindibi dumbirumbi bialu ema biyaguabi
i̱na dindinaga gene dunini karu yania ho kogola hongohe wiaabo holebira.
4 I̱na wali agali mana ko biaga hearuhondo,
Tíore mine nahe halimu, lalu
wali agali balagala haga hearuhondo,
Tíninaga mini yaraga nahe halimu.
5 Tígua tíni mandabi tingi howa mine nahalimu, lalu laragoni.
6 Wali agalime bialu karu manani dabaki bule
ni tagira ibiragohayagi howabi ni paliragohayagi howabi
uyurahayagi howabi unurahayagi howabi ndo ibaga.
7 Ngode Datagaliwabe ibunimeore daba ki biaga ka.✡1 Sml 2.7, Iba 50.6, 147.6, Dan 2.21
Ibugua agali mendego mo dindiha halu mendego mo yaraga haga ka.
8 Anduane Homogohanda ibunaga gini gabo be mbira yu haga.
Gabo be ogoniha ibunaga keba holene waini iba ale biru to̱leda.
Ibunime odope haragola wali agali ko biaga karume naiore haga.
9 I̱na horo bibahendengi Yagabanaga Ngode Datagaliwabe kagonaga mini lalu howa
ibunaga mini yaraga halu iba gana lalu haabo holebero.
10 Ibugua wali agali ko biaga karunaga hongo bo ereba halu
wali agali tigabi karunaga hongo holene ibugua mo tago halu timbuniore helolebira.