111
Iname Anduane Homogonaga mini yaraga hami̱ya lalu lenego ogo
1 Anduane Homogonaga mini yaraga hami̱ya.
I̱na ibunaga wali agali ngoaiho kagoria pialu
ibuhondo gubalini timbuni howa ka̱i̱ lalu holebero.
2 Anduane Homogohanda biabe nahendene ale gibiore biaga ka.
Wali agalime biabe uruni birago hondowa turuho haga bu karu
tigua biabe uruni bayuwa manda bule begelo handaga ka.
3 Ibugua biabe biraru damene bibahendeme
ibu mini leneorebi
ibu haru haga kiniorebi ka lalu walia haga nga.
Ibunaga mana tigabi ngagoni wiaabobo bu wulebira.
4 Anduane Homogo ibunime mbirale biniru damene wali agalime mitangi biaabo helo
ibugua tinaga miniha mo wála halu haabo haga ka.
Ibugua inahondo dara holene nawi howa
ina dara halu bayale biamogo biaabo haga ka.
5 Ibugua wali agali ibu mo dunini ho karuhondo tomo nelo miaabo haga ka.
Ibugua wali agalihondo habo nalolene bi bamba lowinigo embeda nahagaore ka.
6 Ibugua i̱ hongo ogobi ko lalu walia halu
wali agali maru bu hearunaga dindi wiaru
ibunaga wali agaliruhondo mo mini.
7 Ibugua mana biaga ngaru damene bibahende mini bilinahe howa
tigabiore biai haga ka.
Ibugua mana bulene nga leneru
iname mo dunu bia howa talialu bulene nga.
8 Anduane Homogo ibugua bi mana urunibi lo wiyaru
ibu heneneorebi bayale tigabibi howa lowiyago
bi uruni wiaabobo bu wulebira.
9 Ibunaga wali agaliru ibunime golope halu haru dai bialu
tihondo habo nalolene bi wiaaboore helo lowini.
Anduane Homogo ibu baya burugule mini leneore ka.
10 Mbirali ibu mini bayale gigabiwi hoa hayagua✡Yob 28.28, Min 1.7, 9.10
ala Anduane Homogo gibiore ka lalu ibu mo dunini holene nga.
Wali agalime ibuni hamelo kago bialu kane hendedagohondo
ibugua mini bayale gigabi wuleneru talebu miaga ka.
Ibu ogonibi ka manda bialu
ibunaga mini yaraga haaboore holene nga.