140
Anduane Homogohanda handayaho helo bi lenego ogo
1 Anduane Homogo-o wali agali ko biaga karume i̱ mo ko holigo pele ngibe.
Agali bo wahaga karume i̱ baba waitigi nahelo biamogo bibe.
2 Tigua mana ko bulenaga ndindi laabo halu
wali agali bu karu tini keba haga haga bilo mo keba haga ka.
3 Tinaga hége ne gadele puyanaga ne ale howa✡ Lm 3.13
tigua bi lararume nogombi ko tomia pale ngagonaga tomia ale
tinaga ne hambuni ngagoni.
4 Anduane Homogo-o agali ko karunaga hongome i̱ bope nahelo
í̠na i̱ handayaho habe.
Agali bo wahaga karume i̱ mo ko holenaga bi ndindi lalu kago
i̱ ba nabilo hapai habe.
5 Mine haga bu karume i̱ gonoha doliya gono wu kagoni.
Tigua gono ogoni pu payini timbuni mbirame i̱naga geni do ngelonaga
i̱ hariga poleberogoha gono wia do ka.
6 I̱na Anduane Homogohondo lamialu lalu,
I̱naga Ngode Datagaliwabeore í̠ni kegoni.
Anduane Homogo-o i̱na biamogo bia lalu olalu kogo hale habe.
7 Anduane Homogo Bibahende Haru Haame Ho Haga-o
i̱ haru dai biaga hongoheore í̠ kegoni.
I̱na waitigiru baba wai bialu hewangi
í̠na i̱ handayaho harigoni.
8 Anduane Homogo-o agali mini kowi karume bule hameledaru buligo nabilabe.
Tigua ko bulenaga bi pongo balu karuni biatagi nahelabe.
9 Waitigi bu karume i̱ bope halu balagala howa ibaga bu nahelabe.
Tigua i̱ bo waholenaga mo gi halu karuni tiniha biadai bilabe.
10 Ira dedaore tinaga haguaneni ibira helolene karulapeda.
Ti gundu uli ngagoha uli pu wiaabo helo minu bape habe.
11 Agali ko urunime ke̱ howa wali agali maru karu bame godi deni heledago
tigua godi lalu bolangua nahelabe.
Agali bo wahaga bu karu tiha mo ko holene mbira ibilalu
ti bo ereba hai helabelo hamelo kogoni.
12 Anduane Homogo-o wali agali ko urunibi karume
wali agali yagibano karu mo ko holebiragola
í̠na yagibano karu biamogo biaga kegoni.
Wali agali burupale karu tihondobi bayale bulene ngadagua biriligo
i̱ manda bu kogoni.
13 Wali agali mana tigabi biaga karume í̠naga mini yaraga halu
í̠ni kegoha haabo holebira.