146
Anduane Homogo ibu Pele Ngiaga ka lalu mini yaraga halu bi lenego ogo
Anduane Homogonaga mini yaraga hama.
I̱ni bu miniha howa ibunaga mini yaraga harogoni.
I̱ dindini kogoni howa ibunaga mini yaraga haabo holebero.
I̱na i̱naga Ngode Datagaliwabe mini yaraga halu
iba gana laabo halu kone dege i̱ni homalu waholebero.
 
Dindini agali haguane karuha mini hanaho nahabe.
Agali dindini hene bu karu
tigua í̠ pele ngialu haru dai nabibehe kagoni.
Agali uruni ti homarangi lone dindi dege hodai bulebira.
Ti homarangi mbirale ogoale bule lalu lo wiyaruni budai nabulebiraore.
 
Wali agali ti Yagabanaga Ngode Datagaliwabe kagome ti biamogo bilonaga ibuhondo mini mbiraore wu karume
ti turu ho haga ka.
Uruni tigua Anduane Homogo tinaga Ngode Datagaliwabehondo mini dunubia ho kagome
ti turuore ho kagoni.
Ngode Datagaliwabe ogoni ibugua hari daligabi dindibi iba solowarabi wabialu uruniha karubi ngarubi wabiai henego Iba 115.15, 117.2, Ab 4.24, 14.15
ibugua mbirale ibuni buleore lalu bi lowiniru bibahende biaiore haga ka.
Wali agali maru ti waitigi andaneha bope ho karu
Anduane Homogo ibunime ti biamogo biaga ka.
Maru tomo nane garibilo karuhondo ibugua ti tomo nelo miaga.
Anduane Homogo ibugua maru garabayaha karu ti golope haga biaga.
Ibugua wali agali de kohe karu de hendelo mo ngala halu
wali agali gendame bo dambi karu genda mo wahai halu mo hongo haga ka.
Anduane Homogohanda ibunaga wali agali bayale tigabi karu gubalini ho haga ka.
Wali agali dindi taraha howa ina dindini íbu hene karubi ibugua handayaho haga ka.
Wali dalo bedarubi waneigini ai̱ya abala homene karubi ibugua ti baya hanguore handayaho haga ka.
Ibugua ani biagagoyu agali ko biaga karume mana ko bule manda bialu karu mo libilabala halu mo luluya haga ka.
 
10 Anduane Homogo ibu kini haluhe haabo kagoni.
Saiono wali agaliru-o tínaga Ngode Datagaliwabe ibu kiniore haabobo bu ka.
Iname Anduane Homogonaga mini yaraga hami̱ya.

146:6: Iba 115.15, 117.2, Ab 4.24, 14.15