148
Hari daligahabi dindihabi karu bibahendeoreme Anduane Homogonaga mini mo yaraga hai holene ngago ogo
1 Anduane Homogonaga mini mo yaraga hadaba-o.
Tí hari daligaha kamiru bibahendeme Anduane Homogonaga miniore mo yaraga hadaba.
2 Ibunaga dahuliyali kamiru tí bibahendeme ibunaga miniore mo yaraga hadaba.
Dahuliya andaganaga ami kamiru bibahendeme ibunaga mini mo yaraga hai hadaba.
3 Ni egela li kabigo libugua ibunaga mini mo yaraga hadaba.
Yakundi harini li ngiringaralo bu kamiru tíguabi ibunaga mini mo yaraga hadaba.
4 Dahuliya andaga da habaneoreha kamiru tínime ibunaga mini mo yaraga hadaba.
Hari daliga yarali howa iba uyura bedamirumebi ibunaga mini mo yaraga hadaba.
5 Mbirale uruni bibahendeore Anduane Homogo ibunaga bime tagira íbu hadaba laga biyagola
tagira íbu haga binigo ka.
Ibugua ani binigo uruni bibahendeoreme ibunaga mini mo yaraga hai holene nga.
6 Ibunaga bime ti hangu hangu abogo ogoria ha laga biyadagua haabo henego ka.✡Yob 38.33, Yar 33.20, 33.25
Ti mbiragome ibunaga bi mo wahabe nahe kagoni.
7 Dindini kamirumebi iba solowara guru kuyama unura bedarumebi
wena gibiore wialuwiore unura bedamirumebi
8 hari dabamebi dalu dindigunimebi pibiyamebi hari beralibamebi
puyabu hongoheore Anduane Homogonaga bi larago hale haga kamirumebi
tí bibahendeoreme ibunaga mini mo yaraga haiore hadaba.
9 Dindi hari timbuni wedamirumebi dindi hari emene wedamirumebi
ira lini nagane ale daga kamirumebi irabu ira kamirumebi
10 nogo hinini dambole kamirumebi nogo gabua tagira hope hene kamirumebi
mbirale tombeme piaga ngamirumebi ega bibahende bedamirumebi
ti bibahendeoreme Anduane Homogonaga mini mo yaraga haiore hadaba.
11 Kini kamirumebi wali agali bibahende bu kamirumebi gabumane kamirumebi agali haguane kamirumebi
12 igiri daliahe bu kamirumebi wandari daliahe bedamirumebi
wali agali wahe kamirumebi wandari igiri emene kamirumebi
tí bibahendeoreme Anduane Homogonaga mini mo yaraga haiore hadaba.
13 Ti bibahendeme Anduane Homogonaga mini mo yaraga haiore holene nga.
Wali agali marunaga mini ngagobi ndo ibunaga mini daligaore ngagoni.
Ibunaga mini baya burugule daliga gibiore ibu ale mende naheorego
dahuliya andaga angua hai halu dindi bibahendebi angua hai kago
ibu hangunaga mini mo yaraga haiore holene nga.
14 Anduane Homogo ibugua ibunaga Isaraele hameigini gubaliniore halu yabu howa mo hongo hayagola
tigua ibunaga mini mo yaraga haga kagoni.
Anduane Homogonaga miniore mo yaraga hai hadaba-o.