1 Waneiginiru-o tígua wali agali yagibano karu ti mbirale buru padaru ale milo hapai halimu. Tigua deme í̠ hongo howa handaya ho kagola ti bahame handaya ho helo wanahalimu. 2 Wali agali ti genda halu mini burugu timbuni lo holebirago í̠na ti mo garila holeni. Ani bialu maru mbirale tubagiho karuhondo keba halu lai nalabe. 3 Wali agali genda yuwa mini burugu lo kagoha genda dewa lone mo tago nahabe. Ani bialu wali agali yagibano bu karume í̠hondo mbirale mbira hale hayagua í̠na hapai nahabe. 4 Wali agali darabi bu karu tigua í̠hondo mbirale mbira hale haragola ti erembira mialu napobe. Ani bialu wali agali mbirale nawi tubagiho karuhondo erembira namibe. 5 Wali agali mbirale nawi karume í̠ hondo bi ko loligo í̠na ti helalu putara halu napobe. 6 Ani lolebirago irane tinaga bu miniha genda timbuni tagira ibiyagua tigua í̠hondo bi ko laragola mbirale bibahende wabiaga kago ibugua tinaga bi larago hale holebira.

7 Í̠na mana ogoriani ibagabu hariyagua nde wali agalime í̠ hame lai holebira. Agali haguanerunaga deni pialu howa ma podalu pobe. 8 Wali agali yagibano bu karunaga bi larago baya hangu hale hai halu marume í̠hondo mo bi la hayagua nde í̠ni ale dege dege bi bayale laga wiridagua wali agali uruni baba bi bayale dege ladai bibe. 9 Wali agali mana ko biaga bu karu giha howa wali agali darabi bu karu tigua mo ko halu kago haru dai bibe. Ani bialu manani godi lalu mo tale bulenaga wali agalihondo gi nahe tigatigaore mo tale bulene ngadagua mo tale bibe. 10 Waneigini ti aba homene bu karu baya hangu handaya ho halu wali ibu agalini homene dalo bedaru baya hangu handaya ho halimu. Anidagua bialu í̠ Anduane Homogo Daligaore kago ibu waneiginiore holebere. Heneneore waneigini ai̱ya ibugua í̠na anidagua beregonaga gubalini holebirago ainde Anduane Homogohanda í̠ gubalini timbuniore holebira.

11 Mini gigabi wulene ibugua ibu waneigini karuhondo ti miniwi bayaore ka lagabi wali agali ibu taya bialu karu baya hangu handaya ho hagabi ka.*Mini bayale wulene ibu wali ai̱ya bedaligobi howa ibugua waneigini mana bayale ngaru bialu helonaga lawai haga nga. 12 Wali agali mini bayale wulene hame lalu tini bayale holenebi hame lo howa tigua aba taya biyagua tiha turu holene timbuni to̱latagi holebira. 13 Wali agali hongohe mini bayale wiaga karu ti mini lene halu mini bayale ibu poragoha Anduane Homogohanda mo turu holebira. 14 Wali agali mbirame mini gigabi wuleneme ibunaga mini yaraga hayagua tigua Ngode Datagaliwabe baya buruguleore kagonaga mini mo yaraga haga. Ani bialu wali agali mini gigabi wualene ngago gubalini haga bu karu ti Ngode Datagaliwabehanda gubalini holebira. 15 Wali agali ibunaga bi hale haga karu ti wali agalinaga haguane holebira. Ibugua bi larago hale haga karu ti bayale holebira. 16 Wali agalime mini gigabi wulene ngago mo galone halu yu tiga biyagua nde tigua mini gigabi mo yu holebira. Ani bialu tinaga waneigini mani holobadarumebi yu haabo holebira. 17 Pigane mini bayale wulene ibugua wali agali hariga tiga nabi yole ngagoha haru pialu mo luluya halu ti mo gi halu mo durula haga. Mini bayale wulene ibugua bi tandagabi ngarume minu heda halu wali agalinaga mana biaga ngago damene bayale tigabi hai helonaga lawai haga. Ani mo hongo kagola tigua ibunaga bi bayale manda bulene lawai harago talialu biai habehe karulape helaga. 18 Ani biragola mini gigabi wulene ibu wali agaliha hariga tigabi ngagoria ibalu ti mo turu halu ibunaga bi wiado hene ngaru tihondo mo walia hagane. 19 Anigo wali agali ti pu luluya hayagua nde mini gigabi wulene ibugua ti yuwa halu tini mo ko halu homolene ngagoha pelo yupe haga.

20 Horo bayalengi í̠na henge bayale ngago bame mo holebu nahabe. Anigo ko ngagome í̠ minalu mo taga holigo mamage ho habe. 21 Taga holeneme wali agaliha mana ko bulene mo yu ibalu taga holeneme wali agali bu karunaga deni mini lene helaga nga. 22 Í̠na mendeali kago helo la debodebo bialu keria í̠ni pi loligo handabe. Í̠ni pilagane tene ogoniha nga. 23 Í̠naga bi lolene henge ngangi í̠ ne hariga ndibulo holeni nahabe. 24 Ani lolene ngago irane í̠naga bi larengi mini gigabi wulene ibu pana haragola í̠naga bime í̠ha manda bayale bidego latagi holebere. 25 Bi ke̱ howa lama ibaga nabibe. Í̠na bi tigatiga í̠ bibahende manda biai naheme lolene ngadagua lolene karulape. 26 Í̠na iba porago payabe nahe kego manda bialu í̠ha ko ngago latagi hole taga nahabe. 27 Í̠nime í̠ wali agali lulu mini nawi karu andaneha holene nawi. Ani bialu mbirali mini lene timbuni bu karu ladebodebo bialu ti kagoha hadede nabibe. 28 Í̠ homoleneore wiaguabi harugo Anduane Homogohanda í̠ biamogo bule wai bulebirago í̠ hongo howa bi henene loleneme í̠ bolangua helo hongo habe.

29 Í̠ kudaga halu bi nagalone ngaru dewa laabo holeni nahabe. Ani bialu biabe bialu kegoha manga halu gedeore holeni nahabe. 30 Í̠ni andaga tamuha howa laionome ngororo laradagua nabibe. Ani bialu wali agali í̠naga biabe bia haga bu karu talialu bi hongo howa loleni nalabe. 31 Mbirale ngaru yamule í̠naga gi dogo nalabe. Ani bialu í̠na mbirale mbiralihondo mialu howa í̠naga gi pau nalabe.✡Ab 20.35