1 Agali yagibano ibu mini bayalewi heagua nde ibu agali haguane karu baba mandagi birulebirago ibu turu ho holene nga.

2 Wali agali tingini hangu bayale karunaga mini yaraga holene nawigo nahabe. Ani bialu wali agali koale karu mo guya nahabe. 3 Mone tara mbira bedago ibu emene dege bedagome habane ngago ibane dendebioreni ibu duniniore mbira wiaga beda. 4 Tigua í̠naga mini yaraga haragola í̠na mine howa aga bayale ngaru mo karulo holene nawigo ani nabibe. Ani larogoni irane mbirale Anduane Homogohanda biagago bayaleore biaga kago ainde wali agalime biabe ibugua biaga ngago damene ti manda nabi ka. 5 Agali haguane dewaore tinaga biabe biaga wiaru wahai howa tini dindini bedagola agali mbira daga nawini heago ibugua tinaga henge ibu miai haya. 6 Agali haguane dewaore bu hearunaga mini mo ngubia halu mo ko hai hayagola wali agali mini lene bu heneru ayu wali agali tara hearunaga giha henego ka.

7 Wali agali mbirago godini haru polene manda biriyagua nde ti wali agali ogobiore kagoda lalu baya hangu mo tale ala bibe. Tihondo keba halu lai loleyagua nde í̠ni miniha mitangi ala bibe. 8 Wali agali mbirame bi lalu heagua í̠na lapugua bulene nawigo lapugua nabibe. Baya hangu hale hai howa bi ladai bibe. 9 Wali agali tigua í̠ mitangi nabiore kago í̠na tinaga mbirale ngaru mitangi holene nawigo nahabe. Ani bialu wali agali mana ko biaga karu ti godi lalu bedagoha í̠ ti heba mandagi nabirabe.

10 Waneigini-o biyinaya biabe tara tara ngaru dewa nabibe. Tara tara dewaore ngaru biai holene manda biriyagua nde í̠ni mo ko holebira. Abale bu bolangua naholeberego gerai lalu ala bigi nabibe. Mbiraha ibida pu haraiyagua nde í̠naga biabe biagane uruni ereba naholebira. 11 Wali agalime biabe erekuibiore ngaru hibu lowa hongo howa bialu haabo haga. Anigo tiha dewaore tubagiho haabo ka. 12 Wali agali marume nde biabe nabiaga kagola maru karume urunibi karu biamogo biaga ka. Ti hongo nahe howa tiha mbirale dewa tubagiho haga ka. Ani kagola Anduane Homogonaga deme handape halu ti de hondowa ti biamogo bialu haga ka. Ani bialu wali agali mo ko hene uruni lone mo heya halu 13 tinaga emboneha yagi mo yaraga haga ka. Ani biyagola wali agali dewame hondowa ti mogo lo hendene.

14 Anduane Homogohanda mbirale ko bayalebi ngia dege biaga ka. Ibugua holene ngialu holene lone mo yu dai biaga ka. Ibugua wali agali mo yagibano halu lone mbirale dewa mialu mo homogo haga ka.

15 Anduane Homogo ibugua mini gigabi wulenebi lawai halu ibunaga bi manabi ngiaga ka. Ani bialu mendeali kago gubalini howa biamogo bulene mo wia haga ka. 16 Anigo ainde mana ko lehe ngago damene aruma holene mana bulenebi uruni wali agali mana ko biaga karuha howa ibaga. Ani bialu mana ko uruni wali agali mana ko turu haga bu karu baba haabo halu tini homalu wahaga.*Agali maru mandabi hearume bi hobane ogoni laboha ngago mbuga ogoniha abale nawinigo agali mendeme mani gilibu aribia hene bada, laya. 17 Anduane Homogohanda wali agali tigabi karuhondo mbirale miaga ngago damene bibahende mo ko nahagaore. Biabe mbira Ngode Datagaliwabe ibu hame ledago bialu heagua nde biabe ogoni mo ko nahe bayale bialu haabo haga. 18 Agali muni dewaorewi karume mbirale dewaore mo ngoaiho wu hayagua nde ibu yolo agile mulubadabe.✡Iba 49.10, Lg 12.16-21 19 Ibugua lalu, Ainde ema nabi ha̱lo biruwa tomo mbirale bayale ngaru nalu biruliya, lagane. Anigo ibunaga tomo bayale uruni nalu holene horo agira ngabe ibu manda nabi kago ainde ibuni homaragola wali agali tara bu karume ibunaga tomo bayale uruni no aribia holebirago ibu manda nabi ka.

20 Habo nalolene bi lo wirigo baya hangu yu habe. Waore nahabe. Yu haabo halu í̠ni waheore howabi yu haabo habe. 21 Wali agali mana ko biaga karume biabe biaga ngago í̠na dimagoli nahabe. Í̠ninaga biabe biaga wiridago yu howa Anduane Homogoha kaware haabo habe. Anduane Homogohanda yagibano bu karuhondo mbirale bayale ngaru abaleore mo miaga kago manda bialu ibuha haabo habe. 22 Ani bialu ibunaga mo turu holene ngago abaleore mo dewa haga ka. 23 Ainde í̠na lalu, I̱ha mbirale agilego tubagiho kobe. Mani bayale mbira agigo mo yuledabe lolene nawigo nalabe. 24 Í̠na lalu, I̱ karulapeore kogodago i̱ mo ko holene mbirale mbira agigo ibulobada, nalabe. 25 Wali agalime bayale kangi ko ibulebirago mo embeda ho haga. Ani bialu kongi howa bayale ala hayago mitangi bu dai nabiaga. 26 Heneneore Anduane Homogohanda wali agalihondo yolo mulenego erekui nabiore ndobe. Wali agali tini homaga birangi Anduane Homogohanda mana tinime bialu hayagonaga yolo mulene winigo migi bulebira. 27 Wali agali tiha mo ko holene íbu ngagola mbirale bayale damene ngago abaleore embeda hai hagaya. Wali agali mbirago homaragola tigua bialu hagadago panaga wiai haga. 28 Wali agali mbirago nahome kangi ibunaga mini yaraga holene nawigo mini yaraga nahabe. Tinaga waneigini kago baya hangu lawai halu howa aba ai̱ya tininaga mana ogobioreda lo manda biai holebere.

29 Wali agali tara tara bu karume tinaga ohaga boga gibi bidagome í̠ mo hondo holigo í̠ andagaha wali agali ta nabi ibai hadaba loleni nalabe. 30 Wali agali mine haga uruni ti wali agalime mbirale ega henene ndo ega henene bedago mo hondo holenaga berelaga ka. Tinaga miniha oholene ogonibiore ka. Tigua ohowa í̠ pilabelo hondo haga ka. 31 Tigua biabe bayale í̠na biniru mo beregedalu biabe bia ko haya lole ka. Mana bayale biaga ngeru tigua mo ko howa te ko ngaru lalu holebira. 32 Ira dene emene mbirame ira datimbu haga ndobe. Anidagua dege wali agali mana ko biaga bu kagome í̠ homolene ngagoria pialu homabelo mo hondo haga ka. 33 Wali agali ko biaga bu karume mbirale ngago damene mo ko hole dege manda biaga bu kago deme handalu mamage ho habe. Tigua í̠ha mo taga holene ngago mo para haragola í̠ha taga ho haabo holene mbira mo bade holigo hondowa holene nga. 34 Í̠na wali agali dindi taraha howa íbu hene karu í̠ andaga haru piriyagua tigua í̠ ko tara tara ngagoha haru poragola í̠ mo luluya holebira. Ani biragola í̠ni dameneru baba mandagi howa í̠ dindi tara howa íbu hene mbira haradagua bulebere.