1 Wali agalime tinaga bi ledagoha bi ko mbira nale heagua tini turubiore ka. Tinaga ko mitangi halu dara howa genda holene nawiore ka. 2 Heneneore wali agali uruni tigua ko bini mbira tinaga miniha wu howa ogonime tiha ko nga lalu latagi nahe heagua nde tigua bayale mbira mani ibulebirago ngola holene manga nahe maliaho holebira.

3 Wali agali muni habura buwa mo do ho hagayagua nde muni ogoni bayale ndo nga. Muni mo doho hayagua nde muni ogonime tini biamogo agua bulubadabe. 4 Wali agalime muni mo do howa tomo nolene ngaru yolo nabi heagua nde galone nabulene bameore mo doho holebira. Ani ngelo karia mani wali agali maru karu ti mo yuwa turu holebira. 5 Mbiralime ibu biamogo bulene mana bayale nabiaga hayagua ibugua mendeali ai kagohondo nde mana bayale agua bulubadabe. Ibuni turu holene emeneorebi mbira nayi holebira. 6 Wali agali tininaga tingi baya hangu handaya ho nahaga karu tiha mo ko timbuni holebira. Ai tinime mana ko biyagonaga pani nolene ogoni holebira. 7 Tigua wali agali mende kago biamogo biyagua nde bero lalu ndo embeda ho howa biamogo bulebira. Maniore howa mana ko tigua bialu kago panaga tagira polebira. 8 Wali agalime tinaga de bu yiho howa mendeali kago biamogo bialu mia nabi heagua nde mana ko leheore ogoni nga. Tigua ma ema bialu yagibano bu karu erembira mialu piyagua nde mana tiga nabi ogoni. 9 Wali agali uruniale bu karu tigua mbirale emene ngaru yule turu naholebira. Tiniha dimagoli holene ngagome ti mo mini burugula haga. 10 Wali agali urunibi biaga karume mberedi yolobu wia nabi howa ti andagaha tomo nolene nawi haga.

11 Waneigini-o í̠ karulape hariyagua nde í̠ni baya hanguore handaya ho habe. Ani bialu loma bayale Anduane Homogo ibu hame laga ngaru loma bu yalu pu mibe. 12 Homa ibu hondo holenaga henge emene mo yadai nabiaga. Ani bialu í̠ homeneru dindiha pobelo horo ogoangiore lalu tigua manda bu kago í̠ manda nabi ke. 13 Í̠ homa nabi kengi í̠naga nenege bu karuhondo mana bayale bialu habe. Ani bialu ti mo turu halu mbirale bame mulene karulape hariyagua nde migi bialu habe. 14 Mali lulene horo wiagua í̠ waho nahabe. Tomo nolene bayale wiagua waha nalabe. 15 Í̠ni biabe bialu harigonaga yolo mo yarigo wali agali maru karuhondo tale bialu migi bulebe. Ani meregola í̠na erekui biabe bialu yolo mo mirigo mo yuwa tigua gadi taduru bilobe. 16 Í̠na mbirale ngeru wali agali migi bibe. Ani bialu maru nde í̠ hondowa turu ho hole ngelabe. Irane homenerunaga dindi humbirini andaga ngagoha í̠ turu holene mbira nawulebirago ani bibe. 17 Aga yariru wialu ko goba hagadagua wali agalibi ha dege bialu waheale haga. Anidagua biagadagoni bambaore mana lo winidagome lalu wali agali lenego homolene nga lalu bi lo wini ngagome homaga nga. 18 Heneneore wali agali ogonidagua buleneore winigo nga. Abale hene karu ti homaragola mani holene ho aribia haga nga. Ira yuni ala henego dogolope haragola yuni gahange lone andaho aribia haga ndobe. 19 Wali agali tigua wabini ngaru ko halu ereba hai hagane. Wali agalibi tinaga mbirale uruni ereba haradagua tinibi nde tinaga biabe uruni heba homaga wini nga.

20 Wali agali mini bayale taya bialu haabo howa bi bayale latagi haga karu ti turubiore ka.✡Min 8.32-35 21 Heneneore wali agalime mini gigabi wulene tene ngago manda bulenaga baya hangu taya bialu hayagua nde mini gigabi wulenenaga tene ngago handa walia howa ti turu ho holebira. 22 Wali agalime tia gabuaru taya hagadagua mini gigabi wulene ngago talialu ibilo baya hangu hariga doroge ngagoria yu holene nga. 23 Ibunaga windo ngagoha de handanda halu ibunaga panga haraba ngagoha hale wia howa hale holene nga. 24 Ibu andaga kago kawareni ha̱lo biralu anda gene maru ibu andaga kagoha wa gimbu bialu ibu andaga hai kagoha wa gimbu buwa 25 balai anda bu gimbubu heledegola í̠ birulene bayale mbira handa walia holebere. 26 Ira timbuni gene magane timbuni pu amunanabi kago andaneha ha̱lo birulene henge mo wibe. Ani mo wu bedegola ira gene magane urunime í̠ waneiginiru yuladambi halu 27 ni tandagabi hongohe daragome dolino yuladambi halu gumba hai holebira. Ani beregola tí mini bayale wulenenaga hongo heba biruleberemi.