1 Waneigini-o mana ko mbira biribe. Ai ko lone bulene nawigo ko nabibe. Ani bialu ko ala birigo domo wahabe lalu Anduane Homogohondo bi labe. 2 Puya ngagola handalu ibida piagadagua mana ko bulene ngago handalu ibida pobe. Ko ngagoria kaware piriyagua kome í̠ hayulebira. Mana konaga ne laiononaga ne ale ka. Ani howa tigua wali agali hayu homa haga ka. 3 Anduane Homogonaga mana ngago puguayagua nde ibu tinginini dere ko ti̱wa ale bu kago ai dere ogoni dabi nahagane ale bu ka.

4 Mbiralime wali agali maru karu mo gi halu mana lehe ngago biaede hayagua nde ibugua bayale ngago bibahende mo ko hai haga ka. Ani biaga ngago manda bialu wali agalime mine holene mana ko ngago talialu heagua nde tininaga mbirale bayale ngago damene mo ko hai holebira.

5 Yagibano bu karume Anduane Homogohondo bi larago ibuninaga haleha abale anda piaga. Ani anda porago hale halu Anduane Homogohanda ibunaga genda wiyadago abale mo tiga biaga.✡Sir 35.17-19

6 Wali agalime mbirali ibu mo tiga bule bi laragola ibugua abale keba tungu layagua nde ibu ko bulene hariga ngagoha pupe halu piaga. Ai wali agali Anduane Homogo gi ho haga karu ti mini beregedo haga ka.

7 Wali agali dewaore bi larago damene bibahende hale ho bira biragonego ai wali agali manda bi kago tigua dege bi larago henene laragoda ke̱ hara lalu abale mo tale biaga.

8 Mbirali ibugua page munime anda biyagua nde ogoni ibu iba dalu ibalu toe̱lo ngagoha e hiralu hagagobi ka.

9 Wali agali mana ko biaga bu karume tini mo mogo biagago bame datani gabuni ngaligobi galone napole bame ngoai haga. Ira datani gabuni ogoriani dayagua abale do gidi lalu dai haga nga. 10 Mana ko biaga karu ti hariga bayale gundu uli nawi ngagoha piyaguabi maniore wali agali dewa pialu homagane gundu uli ngagoria pialu homolebira.

11 Wali agali Anduane Homogonaga bi mana hale halu bialu haga karume tininaga hame baya hangu haru haga ka. Ani bialu tini Anduane Homogo andaneha hayagua ti manda timbunibiore holebira. 12 Mandabi kago ibu manda timbuni mo tago howa manda bu holebira. Anigo wali agali dewame mandabi howa mende kago keba helo mo keba halu hagane ka. 13 Wali agali mini gigabiwi bu karunaga manda timbuniore iba li timbuni hongohe piagagobi holebira. Tinaga bi larago bayaore iba uliha dendebi gagahe nolene dugaho wiaga ngaligobi nga.

14 Wali agali lulu ale mini nawi bu karunaga embone iba be pambu lene tibiniha diriwi ngaligobi ka. Emboneha manda emene hangubi mbira mo yabe naheore ka.

15 Wali agali mandabi karu ti bi bayale mbira hale hayagua ti turu howa bi marubi latago haga. Anigo wali agali lulu mini nawi karume bi bayale hale hayagua nde ti hale habe manga howa erembira mialu piaga. 16 Kudaga bi bame lo paya paya biragome genda timbuni mbira wali agalime yu haga nga ndobe. Anigo bi bayale laragome wali agali mo turu haga. 17 Wali agali mo ngoai ho biruwa ti mbirali mandabi kagonaga bi hale holene hame lowa hale halu bi uruni baya hangu miniha mitangi bu haga.

18 Wali agali lulu mini nawi bu karume lalu, Manda bulene henene ogoni anda ko kaligo ale nga, laga. Anigo wali agali bi ogoni laga kagonaga manda ngagome bi ko uruni latagi haga. 19 Wali agali mini nawi bu karu tinaga miniha manda bialu karia manda bulene bayale ogonime wali agali gi ge minu kabubu ngelaga nga lo manda biagaya. 20 Wali agali lulu mini nawi uruni ale karume oba timbuni kuakua lalu holebira. Anigo mandabi kagome oba hendore holene ngadagua haga. 21 Agali mandabi karu tinaga miniha bi lawai harago yari baya tara ngolome wabini ngagobi gi ndola baya tara gi tigaha wiagagobi haga. 22 Wali agali mini nawi lulu urunialeme mendeali andagaha bame la nabi gialaanda haga. Anigo wali agali mendeali andagaha pialu biagane mana mandabi kago ibugua anda haneni hondo haga. 23 Wali agali mini gigabi nawi kagome harabani howa tamuha ma yulanda haga. 24 Wali agali ti ohowa bi lalu bedago í̠ hado howa hale ho page bulene nawiore. Wali agali bayale kagome mana ogonibi bulene taga halu miniha genda haga.

25 Wali agali kudaga karume bi mbiraorego dege laragola ainde wali agali miniwi karunaga bi larago bayale dendebiore laga. 26 Wali agali mini nawi karume tinaga mini ngago abale latagi haga. Ai wali agali mandabi karume tinaga miniha mo tale ala buwa latagi haga.

27 Wali agali mana ko biaga bu karu tigua waitigihondo bi ko lagago bi ko laragome dai bialu tini nogoba haga.

28 Ai tigua bi dibudibu lama ibaga biyagua nde bi ogoni dai bialu tini nogoba haga. Ai tinaga damene maru bu karumebi ti hame nalaga ka.