1 Wali agali Anduane Homogo gi halu ibunaga bi hale haga kago tiha mbirale ko ngaru naibulebira. Bahondolene ibiragome bope nahe ti bolangua halu pelo Anduane Homogohanda ti biamogo bulebira. 2 Wali agali mini gigabiwi kago ibu Anduane Homogonaga bi mana lo ngago angua halu pubagi nahaga ka. Anigo wali agali Anduane Homogonaga bi mana talialu haga tingi ho kago ti iba sibi solowara hanini puyabume pulo yolu pu amunana biagagobi ka. 3 Wali agali mini tigabiwi kagome mana lo wini ngago yutiga bu haga ka. Ani yutiga biagadago irane bi mana lo wini ngagoha helaga biagane ege tole̱ kira Anduane Homogonaga hame hale hagane ngagome bi ledago heneneore laga ngago manda bialu ti mini mbiraore wiaga nga.✡Har 28.30, Sir 45.10

4 Wali agalime í̠naga bi baya hangu hale helonaga í̠naga bi lolenego baya hangu manda manda bu yabe. Bi tigua í̠hondo bi hale harago tigatiga ladai bulenaga miniha baya hangu mitangi bialu manda manda bu dege holene nga. 5 Wali agali lulu karume mbirale lawai henego baya hangu manda nabiaga ka. Tinaga miniha bame garo ge poragola pedere biyadagua bialu helowa haga ka. 6 Wali agalime tinaga nenege bu karu mitangi nahaga karu ti nogo hosime tinaga erekunini biraruago abogoda lo manda nabiaga kagobi ka.

7 Ni ibugua wá horo bibahendengi ngiaga ka. Irane agome horo maru duniniore wiagabe. 8 Anduane Homogo ibuninaga hameme horo marungi ogonibi ngelaga ka. Ibugua malinaga horo pongo wialu horo timbuni marunagabi pongo wini. 9 Ai Ngode Datagaliwabehanda ibuninaga horo maru mo bagiho ngelalu binigome horo wiabagiho ngelene uruni horo damene maru bu ngarunibi ndo ti horo timbuni nga. Ani bialu horo maru emene dege horo damene wilo ngelene.

10 Ina wali agali kemago dindime wabini ogobi dege dege kema. Adama ibu dindini henegodagua ina wali agali bibahende dindini holene wini nga. 11 Anigo Ngode Datagaliwabe ibuninaga manda timbuni ngagome wali agali tara tara dindini wabu helai hene. Ani wabu helowa tinaga dindibi tinaga mana bi lolenebi tara tara tini heagoha ta haga biniya. 12 Anduane Homogohanda wali agali maruhondo bi bayale lamialu tinaga mini mo yaraga heneya. Ani bialu ibugua maru ibuninaga helo dabo bagiho helalu ibuni heagoha kaware heleneya. Anigo maru hearu Anduane Homogohanda tihondo erembira mialu ti bope halu tinaga dindi wiyadagoha hearia bo taliatogo leneya. 13 Wali agali tigua dindi dongoma emeneru tinaga gime dugu mberabu yuwa ogonime beru tinime hame ledagobi wabiaga nga. Anidagua dege Anduane Homogohanda wali agali wabu helowa tinaga biabe ibunime hame leadagua bialu helo mo migi bini.

14 Mana bayale ibu mana konaga waitigi ngagola holene ibu homolenenaga waitigi ka. Anidagua dege wali agali mana bayale biaga karu ti mana ko biaga karuale ndo ti tara mbira ka. 15 Baya hangu deme handabe.Anduane Homogo daligaore kago ibugua wabini bibahende kira kira dege dege wabiyagola bibahende hangu hangu helo ndo bibahende ibunialela mandagi haga bu helo wabini.

16 I Siraga kogo ainde agali maru haru haga bu heneru aria i hamaro bini ko. Ani bialu agali marume gerebi lini dedago do yu piai heneha mbirali mahaore ibalu dai heneha emene do wahene dedaru dalu piagagoale i̱ kogoni. Anduane Homogohanda i̱ biamogo biyagola gerebi dewa dedagola agalime do ngoai hagadagua i̱na biabe bayale bialu kogoni. 17 Heneneore i̱na i̱ni biamogo bulenega erekui nabi bialu haru. Wali agali manda bayale bua ho hearu baya hangu lawai halu haru.

18 Agali biabe bialu haga kemiru tigua i̱ bi larogo baya hanguore hale halimu. Agali haguane wali agali íbu ngoai howa bi lelo haru haga kemiru ti i̱na bi larogo baya hangu hale halimu.

19 Agali mende kagome í̠ ogoale bia lowa horo bibahendengi mende kagome í̠ handaya ho helo nahabe. Ani bulene nawiore. Í̠ni waneigini kagomeyaguabi í̠ onemeyaguabi í̠ni hamenebi damenebi mbira kagome í̠ handaya ho helo holene nawiore. 20 Ani bialu í̠naga mbirale ngago wali agali mendeali kagohondo bame muwa mani í̠na tihondo dano hanga loligo bame namibe. 21 Mbirali í̠naga henge milo yupe nahe ha dege bialu homalu wahabe. 22 Í̠ waneiginime í̠ biamogo bia lolene tiga nabi nga. Í̠ waneigini tigua í̠na ti biamogo bia lalu í̠hondo hale holene karulape nga. 23 Í̠naga biabe berego damene í̠nime haru hai holene nga. Anidagua beregome í̠naga mini bayale mini lene kego mo ko naholebira. Í̠ni homole kaware biruwa dege í̠naga mbirale wiridaru Í̠ damene bu karu paluni talebu tahabe.

24 Í̠naga dongi ibu muleberego tomo nelo mialu gewa tibu mialu pindu ngago mulebere. Anidagua dege tomobi biabe uruni bulenebi í̠naga garabaya biabe bia haga kago ibu karulape nga. 25 Í̠naga biabe bia haga kagohondo biabe dewaore mo miriyagua nde í̠naga miniha dungulo holebere. Anigo í̠na ibu bameore berelo wahariyagua nde ibugua í̠ wahalu polene manda bulebira. 26 Biabe ndelahe hongohe ngago bialu tibu tandaga nayagua nde bulumagame bi hale hagane. Anidagua dege í̠naga garabaya biabe ale biaga kagome mine hayagua tibu tandaga bulene ngagome tandaga helo minu balu garabaya helolene nga. 27 Ibu bame naberelo biabe dewa mo mibe. Bame biruwa wali agalime mana ko bulene ngago miniha giga bialu biragane nga. 28 Bi ogoni henene orego biabe mo mibe. Bi larego hale nahayagua tandaga hendelo mibe.

29 Anigo ibuhondo miniha tandaga nahabe. Ani bialu ibuhondo mana tiga nabi ngago nabibe. 30 Í̠naga garabaya biabe bia haga agali mbira heagua nde ibu erekuibi í̠naga yolo wahalu yolo bu helene kago manda bialu baya hanguore í̠ni tingini haru harilidagua haru habe. 31 Í̠ninaga holeneore ibu kago manda bialu í̠ hameneore haru haradagua bibe. 32 Í̠na ibuhondo koale bialu hariyagua nde ibugua í̠ wahalu ibida polebirago mani í̠na ibu lone handawalia agua holeberebe.