Solomononaga Iba Gana
Mbuga ogoha gilibu ngarunaga nemandi ogo
Mbuga ogoha gubalini henene holenenaga iba gana lalu gilibu nga. Agali mbirame wali mbirahondo gubaliniore halu ibu iba gana laga bialu heneya. Wali ibugua nde hale haga buwa agali biago gubaliniore halu iba gana ladai bigi bini.
Gubalini heneneore holene tene Ngode Datagaliwabe ibuniore ka. Anigo Isaraele wali agali ala henerume Solomononaga Iba Gana ogoni onene agalinila mini mbiraore halu gubalini hagadagua ina Ngode Datagaliwabela mini mbiraore howa gubaliniore holene nga lalu mitangi bu hene. Ina kamarumebi Keriso hamewaneigini howa Kerisola mini mbiraore howa gubalini haga haga bialu holene nga. Anduane Homogonaga mbuga Pigane Binigo 2.24 gilibu ngago ogo. Agali ibugua ibu aba ai̱yala helalu ibu onela mandagi howa libu ho mbiraore holebira, lalu gilibu nga. Bi marubi uru, Aisaia 62.5, Hosea 2.19-20, 2 Korindi 11.2 uruni handabe.
Solomononaga Iba Gana mbuga ogoniha mini mbiraore halu gubalini holene mana mo walia halu onene bayaleore agalini bayaleorela mini mbiraore holene nga lalu walia ho nga. Ngode Datagaliwabehanda bayale holene ogonidagua ina ngule manda biaga ka.
Bu̱lu̱ baga buwa kuni gilibu ngago (1.1–2.7)
Iba Gana mbira lenego 2.8–3.5
Iba Gana mende lenego 3.6–5.1
Iba Gana tebone lenego 5.2–6.3
Iba Gana mane lenego 6.4–8.4
Iba Gana dauni lenego 8.5-14
Iba Gana waragane lenego
1
1 Iba gana ogoni bayaleore Solomono ibunime lenego gilibu winigo nga.✡1 Kin 4.32
Iba gana mbira
Wandarime iba gana lenego ogo
2 Í̠na i̱ nu̱nu̱ laabo harilidagua laabo habelo hameledo.
Waini iba bayalegome dende biaganego goyane lowa í̠naga gubalini holenego taraoreda.
3 Í̠naga tinginini nga biagane iba mini sanda ha̱i̱ harigo ngabioreda.
Í̠naga mini hale howa i̱ turu halu nga biagane ogonibi mitangi biruli.
Wandari bedarume í̠ gubaliniore haga bedagoni.
4 Í̠na i̱ haru halu iya ibida mba.
Í̠ i̱naga kini ale halu í̠naga tamuha i̱ haru halu pu.
Agalime waini iba hame lowa gubalini hagadagua ndo
iyane mandagi gubalini halu turu hagabu holeberaba.
Wali marume í̠ gubalini timbuniore hagago irane hendedo.
5 Yarusaleme waliru-o hale hadaba.
I̱ tingini mindibi bira bedogonigo
i̱ hulu wandari bayawana Keda dindi yobi ngagoha balai anda mindibi kagobi bedo.
Kini Solomono anda háini yári labolabo baya burugule gerelaho ngagobi bedogoni.
6 I̱naga tingini tara mende aledagola mo yo nahandalimu.
Nime i̱ do mindibia henego.
I̱ mbalinirume i̱ handabe manga howa i̱na gerebi mabuha biabe bialu holiya helaya.
Biabe ogoni bialu howa i̱na i̱naga tingini baya hangu handayaho holene henge nawini.
7 I̱naga yamali-o í̠na nogo memeru tani bayale nelo ogoha haru pu helolebero lalu i̱ langi.
Ni tandagabi daragola ti gumba agoha holebirabe.
Agali maru nogo meme haru haga kagoria
i̱na í̠ taya bialu holiyadago agibe.
Igirime iba gana lalu ladai binigo ogo
8 I̱ lawini-o í̠ wandari bayaore bedegoni.
Í̠na i̱ de hondoleyagua nogo meme sibiru ge piyadadagua talima ibabe.
Talima ibalu í̠naga nogo memeru tani bayale nelo
nogo sibi haru haga agali marunaga balai anda bu kagoria kawareni
tani bayale nolene karia handa walia holebere.
9 I̱naga yamali debene bedego í̠naga yári bidegoni bayaleore
Iyibi kininaga karisi gili lole nogo hosinaga yári biaganego aleda.
10 Í̠naga mandarini yári pingipongo biderumebi hale ira dederumebi
í̠naga pe mo bayaleore halu gurubu gele ngegome í̠naga mani ngiringara leda.
11 Anigo iname yári maru ngolo silibamebi í̠naga wabuwa nguleberema.
Wandarime iba gana lalu ladai binigo ogo
12 I̱naga kini ibu paliaganeni palearia
i̱na sanda bayaleore ha̱i̱ hewagome nga taraore biame haya.
13 I̱naga yamali ibu sanda nga taraorebigo
i̱naga galu hombeni palu paga ho wiarua.
14 I̱naga yamali ibu palawaya minana anda halu
Engedi dindinaga gerebi maburuha dedagobi kagoni.
Igirime iba gana lalu ladai binigo ogo
15 I̱naga yamali-o í̠ore nde wali baya buruguleoreda.
Í̠na i̱ gubalini kego walia halu í̠naga de gilibida.
Wandarime iba gana lenego ogo
16 I̱naga yamali í̠ huliya igiri bayaore kegonigo
i̱na í̠ hondowa turu timbuni ho kogoni.
Datani bayale ogoni iyanaga dagiani tamunguru ale holebira.
17 Ira tamia karunaga maganerume iyanaga anda dabira helalu
ira guraya aleme anda ogoninaga dangi haradagua bulebira.