1 Ai tomo naiho biruwa paluengi hayagola wandari aba ai̱yalame igiri biago paluene anda hobane heagoha haru anda pene. 2 Ai Tobaiasa ibugua bi mbira Labaelehanda layago baya hangu manda biaabo ho howa ibugua wena bunibi lilini biagobi nuha henenego tagu yalu puwa ira delaga wiagoria delene. 3 Ani delayagola dama biagome wena buni lilini biago dalu hagua tumutumu biyago ngu halu ibida tagira pialu dindi abene unurahayagi Iyibi dindi wiagoha yagalalu pene. Labaelehanda haruru talima pugupugu bialu minu yania howa dama biago pu hongoheme gi geni dariba ho ngelene.✡Md 12.43, Ab 20.2

4 Ai anda tamu hobane biagoha mbirali nabere Sara Tobaiasala libu hangu biruwa panga paya tagi hene. Ani biruwa Tobaiasa ibugua ibu onehondo lalu, Yamali-o ai Anduane Homogo ibunime iya baya hangu biamogo bialu handaya ho helo ibuhondo bi labiya heya, lene. 5 Ani layagola Sara ibu heyalu libugua Ngode Datagaliwabehondo libu baya hangu handaya ho howa mamage habe lalu bi lene. Tobaiasahanda Ngode Datagaliwabehondo bi lalu, I̱na mamalirunaga Ngode Datagaliwabe-o iyame í̠naga mini yaraga holene karulape. Mbirale bibahende dindini ngarume karumebi dahuliya andagaha ngarume karumebi í̠naga mini dege yaraga holene nga.✡IT 3 6 Í̠na Adama wabu helowa ibuni hangu holene nakarulape heagola wali Iba Adama ibu one berelo Adamala mandagi ibagabu helobi ibu biamogo bilobi Iba Adamahondo miriya. Ani mirigola dindini wali agali bu karu bibahendenaga mamali libu hene. Í̠nime lalu, Agali ogo ibuni hangu helo nakarulapedago ai ibuni ale dege mbira ibula mandagi helonaga wabule manda bimi̱ya, lariya.✡Pig 2.18-22 7 Anduane Homogo-o áyu Sara ibu dabu biaga mana tigatiga ngagoria howa i̱na ibu dabu berogoni. I̱na ibu de hondowa i̱naga miniha dimagoli hayagola bame haru pu ndo bero. Ani berogo ainde í̠nime iya dara halu iya dindini lu howa mandagiore birudagua hagahaga bulubaya biamogo bibe, lene. 8 Ani lowa libu harume lalu, Aniore bilo, lene. Ani lalu libu mandagi palialu egabi lene.

9 Mbiraga ogoningi dege Laguele ibugua agali biabe biaga agali palearu barila howa tihondo lalu, Agali hora holene homali uli mbira abale tombole pudaba, lene. 10 Ani layagola Laguele ibugua irane mitangi bialu ai Tobaiasabi homa dege biragola wali agali maru karume ibuhondo oba halu mege buligonaga ani bini. 11 Agali biaru tigua homali manda manda bu wiagola Laguele ibu anda tamuha dai buwa ibu onehondo lalu, 12 Ai Tobaiasa homayabe nahomebe tobahedago í̠na biabe biaga wali mbirame de hondo pu bi la. Tobaiasa ibu homayayagua nde wali agali tara bu karu nahendedaha abale hora hami̱ya, lene. 13 Ani laya handala Edenahanda wali biabe biaga mbirame lamu hale hedo yalu de hondo pu lene. Ani laya handala wali ogonime tamu hobane biagoha anda puwa handalu hearia libu palebiria hendene. 14 Wali biago ibugua handalu dai buwa Laguele Edenala lamialu lalu, Tobaiasa bayale pada, lene.

15 Ani layago hale howa Laguelehanda dahuliya andagaha haga Ngode Datagaliwabenaga mini yaraga halu lalu, Ngode Datagaliwabe-o bibahendengi iname í̠naga mini yaraga halu haabo holene karulapeore kamagoni. Í̠naga wali agalirume í̠naga mini yaraga halu haabo holoma̱ya, lene. 16 I̱na í̠naga mini yaraga harogo irane í̠na i̱naga bu habaneha turu holene to̱latagi heledegonaga. Í̠na ina dara timbuni harigola mbirale inaha anda ibulilo giho hemago naibiya. 17 Anduane Homogo-o iname í̠hondo bi turubi tigabiore langulene karulape kama. Ani larogo irane í̠nime wandari igiri ogolabo dara ho haridagonaga laro. Libu aba ai̱yala waneigini mende nahe libu mbira mbira hangu hene. Ainde libu dindi ogoria homa nabi kebiangi turu ho ibaga bu helobi miniha mo palia holene karulo helobi í̠na libu dara ho haabo habe, lene. 18 Gao nale dege wiangi Laguelehanda agali biabe biaga biaruhondo lalu, Homa uli biago lone abale mogo bidaba, lene.

19 Laguelehanda ibu onehondo lamialu, Mberedi dewaore karulapelo hirabe, lene. Ani lamialu ibuni nogo bulumaga wangabe kira sibi wangabe maria lowa ibunaga biabe biaga agali hearuhondo, Bo bodobaga bialu dabu biragonaga tomo timbuni nole dawa manda manda bilimu, lene. 20 Ibugua Tobaiasa olowa íbu lalu ibugua gi dolalu heneneore bulego laro lowa Tobaiasa abale pu nale Sarere kira helo helene. Ani helowa ibugua Tobaiasahondo lamialu lalu, Í̠ tomo nalu ibabi nalu i̱la habiya. I̱na Sara ibu abale agali penedaruha genda timbuniore yu berenego áyu ibu mo turu holebero.✡Pig 24.54-55 21 Ani buwa mani i̱naga mbirale ngogo damene hanuni tale buki howa mende yalu í̠ aba karia dai bibelo. Ai Edena iya homedebagola i̱naga paluni maru ngago í̠ hai habelo. Iyame í̠ gubalini timbuniore ho kabago í̠ni manda bidego. Ai áyu í̠ iya iginiore Sara ibu iya waneore bedagobi dege kegoni. I̱ igini-o í̠ gi nahabe, lalu Laguelehanda lene.