1 Ai Tobaiasa ibu pialu howa ibunaga bu miniha turu halu pene. Ibugua Anduane Homogo ibu dindi ngagonagabi dahuliya andaganagabi Ngode Datagaliwabeore howa bibahende karubi ngarubinaga kiniore kagonaga mini yaraga hama pene. Ibu ibaga bialu tagira pu hayagoha bibahende bayale dege hayagonaga ibugua Ngode Datagaliwabehondo ka̱i̱ lene. Ibugua Laguele ibu onelanaga mini yaraga halu haabo halu libu homara handala wahole lalu bi lo wini.

Tobaiasa halu piyaru ti dindi Kaserini Niniba tano kaware dege ngelowa wiagoria anda pialu howa 2 Labaelehanda lalu, Tobaiasa iya tagira pialu piribangi í̠ aba ogobi berelalu piribalo í̠ni manda bide. 3 Ai í̠ one ibu mani ibilo iyame mo bamba halu puwa anda tamuru mo tiga bialu hole polene karulapeda. 4 Ani bialu wena buni dugu hanarigo yalu polene embeda holeni, lene. Ani lalu libugua mo bamba halu piribigola Tobaiasanaga biango biagobi ti haru dege pene.

5 Horo ogoniangi Ana ibu lone puwa de ibu igini piyago dai birabe hondole handa amuho berene. 6 Ani biruwa ai deme Tobaiasa ibiyago hondowa abaleore ibugua Tobidi olowa lalu, De handa. Iya igini ibalu ibu nenege libu haru piribigobi ibira, lene.

7 Ai libu Tobidi heagoria kaware naibi wene ibalu heaore Labaele ibugua Tobaiasa lamialu lalu, Í̠ aba ibu de lone hondolebira. 8 Í̠na wena buni dugu hanarigo ibunaga de kirabalini palada para haradagua bibe. Wena buni ogoninaga marasinime mbirale labolabo aleme de buyi kago lagalope haragola í̠na gime mo waholebere. Ani beregola í̠ aba ibu lone de hondolebira, lene. 9 Ana ibugua gerai pialu ibu igini gi kirabalime yu hubi lowa lalu, Áyu í̠ igini lone dai beregonidago ainde i̱naga miniha mo palia holene karulo biralu nde homoliya, lene. Ani lalu howa ibuha turu timbuni hayagome de iba deha howa pora bini.✡ Pig 46.30

10 Ainde Tobidi ibu heyalu hendore tagiraha pabe bu mabu biagonaga panga haraba wiagoria tagira pene. 11 Ani heagola ai Tobaiasahanda wena buni biago gime tagu yalu Tobidi heagoria pene. Ibugua ibu abanaga deha pulaba halu ibu aba bayuwa helo mo tigabu helene. Ani heagola ibu abahondo lalu, Aba-o í̠ gi nahabe, lene. 12-13 Ani lowa Tobaiasa ibugua marasini biago ibu aba deha ha̱i̱ howa mani mbirale pele deha para heago lagalo wahene.✡ Ab 9.18 14 Ani biyagola Tobidi ibugua Tobaiasa payani ibunaga gi kirabali paga howa turu timbuni halu dugu bini. Ibugua hongo howa lalu, I̱ igini í̠ áyu lone de hendedogonida. Í̠ i̱naga denaga wá holene hale de kegoni. Áyu iname Ngode Datagaliwabenaga mini yaraga holene nga. Iname ibunaga mini timbuni mini lene ka lami̱ya. Ibunaga dara holene timbuni ngagome inahondo baya dege biaabo holebira.

15 Ibunime i̱naga de mo ko holene ogoni i̱ha ibilenego ainde áyu lone i̱ igini Tobaiasa de hendedogoni, lene. Ainde Tobaiasanaga bu miniha turu holene to̱laiore hayagola ibuni andaga tamuha anda pialu howa Ngode Datagaliwabehondo iba gana hongo howa lalu ibunaga mini yaraga halu iba gana lamalama anda pene. Ani bialu ibu piyagoha mbirale bayale tagira bigi biyago bibahende ibu aba lamiai hene. Ibugua lalu, I̱na muni hangu ndo mo yido. Wali i̱ one haru halu bido. Ibu mini Sara. Ibu Laguele wane. Ibu wene harigani ibalu haruago ai emene howa ogoria anda ibulebira, lene.

16 Ai Tobidi ibu tanonaga pabe heago panga harabani ibu igini Tobaiasa one ngolaho pole pene. Ai ibu bu miniha kiau lalu yagalo howa ibugua Ngode Datagaliwabenaga mini yaraga hene. Ai Niniba wali agalime Tobidi hondowa ti mogo timbuni lalu ibu mbiralime hariga mo walia halu gini yalu piaga mbira napiyagola mogolene. 17 Anigo Ngode Datagaliwabehanda ibu dara halu ibunaga de mo bayale hayago wali agali bibahende lamialu ibugua Ngode Datagaliwabenaga mini yaraga halu hene.

Ai Tobidihanda Sara ngola howa ibiridago bayaleore lowa lalu, I̱ wane-o bayaleore ibirida. Ngode Datagaliwabe ibunime í̠ ina hemagoha haru ibiyadagonaga ibunaga mini yaraga hami̱ya. Ai Ngode Datagaliwabehanda í̠ aba mo turu halu í̠nibi í̠ igini Tobaiasabi libu haru mo bayale helo. Ai í̠na anda hami̱ya andaga anda íbu, lene. Horo ogoni Yuda wali agali bibahende Niniba dindiha hearu tinaga turu holene horo tagira ibiniangi. 18 Agali kirali Tobidi damene Ahiga Nadabala libu ibalu Tobidi heba mandagi turu hamaga hole ibini.