1-2 Ai Tobidinaga de ko halu mbirale handabi nahe hayangi ibu mali pira waragariani kira (62) hene. Mani de lone bayale hayagola ibu luore hene. Ani howa ibugua abale biaga wiyadagua yagibano hearuhondo mbirale dewaore talebu migi bialu haabo hene. Ani bialu howa ibugua Ngode Datagaliwabenaga mini yaraga halu mbirale bayale biyaru damene latagi halu hene. Ani bialu howa ibu mali handari mbirani kira (112) halu homene. Tigua ibunaga tingini Ninibani hora halu tigua Tobidi dara timbuni howa dugu bini.

3 Tobidi ibu mani dege homole lo biruwa ibu igini Tobaiasa olowa paluni bi lamialu lalu, 4 I̱ igini-o áyu ogoni í̠ waneigini bu karuni bibahende haru halu Media dindi pobe. Ani larogoni irane Ngode Datagaliwabenaga bi mana latagi haga agali Nahumuhanda pani nolene koore mbira tagira ibulebira lalu bamba mbiwia henego áyu tano ogoha tagira ibule biaruago í̠ pobe laro. Bamba Isaraele dindiha agali Ngode Datagaliwabenaga bi mana latagi haga hearume mbiwia halu mo ko holene taraore Niniba tanohabi Asiria dindihabi tagira ibulebira lenego heneneore tagira ibulebira. I̱naga miniha manda bu bedogome mbirale mbira bulebira lalu Ngode Datagaliwabehanda lenego damene bibahende tagira ibulebira lo winidangiore ibulebira lo manda bido. I̱naga miniha manda bidogome bi bibahende Ngode Datagaliwabe ibugua langiyaru damene heneneore tagira ibulebira. Ngode Datagaliwabe ibugua buleore lalu bi lo winigo wanahagaore ka. Ani biagago ainde í̠ Asiria dindibi Babilonobi yu wahalu Media dindiha hole pobelo hameledo.✡ Nah 1.2–3.19

Waitigime ina aria Yuda wali agali Isaraele dindiha karu talima pugu pugu bialu minuwa dindi taraha garabaya minu yalu polebira. Isaraele dindi bibahende labu wiai holebira. Samariabi Yarusalemebi wali agali naheore labu dege wulebira. Ngode Datagaliwabenaga anda kago bo heda haragola do podope haragola tigi mbira hanguni bame dindi dege wulebira. 5 Anigo mani howa Ngode Datagaliwabehanda ibunaga wali agali lone dara ho dai bialu Isaraele dindiha lone haru dai bulebira. Ani haru dai biragola tigua Ngode Datagaliwabenaga anda ogoni biadai bulebiragoyu ainde anda baya pigane bini ala hayagobi ndo holebira. Anda ogoni emene tigi mbira hangu holenenaga bulebira. Mani Ngode Datagaliwabehanda horo mbira pongo bo ngago ogoni tagira ibirangi Isaraele wali agali bibahende garabaya golalu lone dai buwa Yarusaleme lone mo heya haragola Yarusaleme tano baya taraore ala wiagagobi wulebira. Ani bialu Isaraele agali Ngode Datagaliwabenaga bi mana latagi haga hearume mbiwia halu lo winidagua tigua Ngode Datagaliwabenaga anda lone bulebira.

6 Horo ogoningi dindi bibahende ngaruha wali agali bibahende bu karu Ngode Datagaliwabe karia dai bulebira. Tigua dama tara tararuhondo bi pupu karula nape wiaga ngaru wahai halu Ngode Datagaliwabe ibunihondo bi lole dai bulebira. 7 Wali agali dindi bibahendeha bu karume Ngode Datagaliwabe haluhe haabo haga kago ibunihondo bi lai halu mana bayale tigabi Ngode Datagaliwabe ibunime hame ledago bialu haabo holebira. Horo ogoningi Ngode Datagaliwabehanda Isaraele wali agali ibunaga mana baya hangu talialu hayaruhondo tinaga holene bayale mope holebira. Ibugua ti Yarusalemeni mo ngoai haragola ti Abarahamanaga dindi ngagoria howa ti bayale haabo holebira. Wali agali tinaga miniha Ngode Datagaliwabe gubalini ho haga karu ti turu ho holebira. Anigo wali agali mana ko biaga karubi wali agali ko karubi ibu deni nahelo kaundiaha talia pelolebira. 8 I̱ waneigini bu kemiru tí i̱na bi larogo baya hangu hale halimu. Tígua tínaga bu minimeore Ngode Datagaliwabehondo bi lalu howa tígua beremiru bibahende ibunime hame ledadagua dege bialu haabo halimu. 9 Tígua tínaga waneigini karuhondo mana tigabi bayale bulene ngago baya hangu lawai halu halimu. Ogodagua lawai halimu. Bibahendengi wali agali mbirale dewa nawi karu biamogo biaabo halu Ngode Datagaliwabenaga mini yaraga halu haabo halimu.

10 I̱ igini Tobaiasa í̠ore Niniba tano yu wahalu puore bibe. Í̠ore dindi ogoha nahabe laro. Ainde í̠ ai̱ya i̱naga homali kagoria dege kaware hora halu horo ogoningiore heyalu pobe larogoni. Mbi mbira hangubi tano ogoria napalibe. Ko tara tarabi mana lehe binigobi timbuniore dindi ogoha to̱leda. Wali agali dindi ogoha bu karume mana ko tinime bialu kagonaga taga nahaga ka. Mana lehe mbira Nadaba ibugua ibu aba hamene heyogone Ahigahondo biyago mitangi bibe. Ahiga ibuniore Nadaba anda halu agali helo baya hangu mondo bu wiagola mani agali howa Nadabahanda Ahiga homelo bo waholene manda biya. Ani biyagola Ahiga ibu ibida pora bialu puwa homali mbira wiagoha birado haya. Anigo ai Ngode Datagaliwabehanda Nadaba ibugua Ahigahondo bule paraho wiyagonaga pani nelo mini. Ainde Ahiga ibu wá holene wiagoha lone dai biyagola Nadaba ibu arumaha haabobo halu ho ereba hayago irane ibugua mana ko tara tara bialu hayagome biya. Nadabahanda Ahiga uli pelo uli tombo wiyagoyu ibu uli nape habo lalu pubagi hayada. Ibugua uli wandialu pubagi hayago irane ibugua yagibano karuhondo mbirale ngaru dewaore talebu migi biaga henegome bini. Anigo Nadaba ibuni ibunaga uli tombo wiyagoha pilaya.

11 Anigo ai áyu i̱naga waneigini kemiru tígua agali yagibano biamogo biaga bayale biago ibuha mini bayale tigabi wua howa mendeali biamogo biaga henedago handadaba. Anigo agali mende kago mo ko holene manda bu kagome ibuni hariga homagane hariga ngagoria pialu hagane ka. Ai áyu i̱naga hongo holene nawi ereba hai hayada, lene.

Ani layagola tigua Tobidi dagiani hendore mo palia hayagola ibu ogoningi abale homene. Homayagola tigua dara halu dugu timbuni bini. 12 Emene howa nde Tobaiasa ai̱ya homayagola tigua ibu agalini homali wiagoria dege mandagi kaware hora hene. Hora halu Tobaiasabi ibu onebi heyalu Media dindiha Egebadana tano wiagoha pole pene. Puwa Tobaiasa ibu imane Laguele baba hene. 13 Ani howa Tobaiasahanda ibu imane Edena Laguelela baya hangu handaya ho hene. Libu waheore bereagola ibugua baya hanguore biamogo biaga hene. Ani howa libu homayagola ibugua Egebadana dindiha hora hene. Ani bialu Laguelenaga mbirale paluni wiaru bibahende abale Tobidinaga karulayadagua Tobaiasa ibuni dege karulai hene.

14 Ainde Tobaiasa ibu ha dege bialu wahe halu ibunaga mali handari mbirani pira mbirani karia (117) hayagola homene. 15 Tobaiasa ibu mali luore howa waitigime tano timbuni Niniba wiago bo gialahole bialu bo heda haya layane te hale hene. Ani bialu Medianaga Kini Siasarese heagome Niniba wali agali tini garabaya biai haya layane hale hene. Ai Ngode Datagaliwabehanda Asiria wali agali Niniba wali agalibi mo ko halu pani nelo miyagonagada Tobaiasa ibu turu halu Ngode Datagaliwabenaga mini yaraga hene. Tobaiasahanda Anduane Homogo Ngode Datagaliwabenaga mini yaraga halu haabo haga hene. Ai heneneore ogoni. Habo nalolene bi lo winigonaga mbuga wabuni halu mende.