1 Wali agali ko bu karume lulu kariane ogodagua mitangi biagaya. Inanaga holene emene tubagi hangu ngagoria genda tara tara ngaru wua to̱leda lo mitangi biagaya. Ina bibahende homai hole kema. Homa iname habagi ha lalu ina pubagi holene henge nawiore. Wali agali mbirali ibu homeneru dalu humbirini andaga howa dai binigo nahende kema. 2-3 Ina bameore irigiho hene kemago mani homalu nde ina dindi ogoria nakemalegobi dege nga. Inanaga holene ogoni irane nawi nagaloneore. Inanaga holene ibu ira hagua darago abale ereba haraligobi emene hangu halu abale homaga kema. Inanaga mini ibubi ira dene emene dedago pulole bialu keria abale hundia tegeledaligobi ina emene hangu howa lone holenaga holene yu dai bibe nahe abale homaga kema. Inaha buhe̱ lolene nawiyagua nde ira dene emene hoai dedago hundiagadagua holene ibu ereba hayago ai ira hundini be hangu bame tambehe ngaligobi inanaga homa tingini bame amburibi wiaga. 4 Ina homedemagola mbirale iname bialu harimaru abaleore embeda holebira. Inanaga minibi abale embedaho waholebira. Inanaga holene egerebagi ginu pobo wiagagobi kemago ai ni tagira ibiragola mbirale uruni ereba hagadagua inanaga holene abale ereba holebira. 5 Dindi ogoria inanaga holene emene tigi mbira hanguore puriabu pulo yu ibalu abale bolangua hagagobi kema. Iname homolene ngago wandialu pubagi holene nakarulapeore. Ina bibahendenaga homolene horo mbira mbira wiai kago ogoningi ina homoleneore wini nga. Mbiralime ibuninaga homolene horo ngago mo yamu holene nakarulapeore ndobe.

6 Marume ogodagua lolebira ai holene ogonibi wiagua nde mini burugu nale waha. Ina wandari igiri daliaheme hagadagua howa bibahende ngaruha inanaga hame ledago biba hama ibaga bimi̱ya.✡Ais 22.13, 1 Ko 15.32 7-8 Iname waini iba bayaleru dewa naabo halu pauda baya ngabi mini sanda muni dewaoreme miaga ngarume tingini hai halu bimi̱ya. Yári biagane baya tara dedaru bame dalu dogolo wanahe iname dowa mandariha yari bialu hami̱ya. 9 Ina bibahende mo ngoai ho hai howa mali lialu tomo timbuni nalu mali ligimbu bimi̱ya. Wali agali bu karume ina turu ho kemago hendelo ina ibaga bialu dindi ngaruha piai hami̱ya. Mana ogonibi bialu holenego baya tara mbira nga.

10 Wali agali yagibano bu karu ko heaguabi bayale heaguabi ta nabi bo hengedo wahai hama mali̱ya. Wali ti agalini homene bedaru dara nahami̱ya. Ani bialu wali agali waheale karubi dagua peleore bu karubi daga nawinigo waha. 11 Ina hongohe kamagoni ndobe. Ani kamagonaga ai mana inanenaga tara wabialu inanenaga hame ngemago biba halu holene karulape kema. Wali agali hongo nahe karu ti daga nawini habane nabulene bame ka. 12 Wali agali mana tigabi talialu hagane bu karuni mo ko holene hariga handa walia harimagoni. Uruni tigua inanaga hariga hapai haga ka. Tigua inanaga mana bialu kemago hondowa inahondo keba howa lalu iname Mosesenaga manabi ina mamalirunaga manabi puguaga kemi laga ka. 13 Tigua Ngode Datagaliwabe baya hangu manda bialu ibunaga waneigini karubi manda bidema laga ka. 14 Mana tinaga ngago damene bibahende inanaga mana ngemago bibahende baba waitigi haga nga. Wali agali uruni ale bu karuni manga timbuni ho kemagoni ndobe. 15 Ti wali agali tara maru bu hama pedaru ale ndo tinaga mana tarore nga. 16 Tigua handalu karia mana iname bialu kemago ko dodohe beremago handalu ti kaundiaha haga ka. Tigua lalu, Wali agali mana bayale bialu haga karu ti mani turu ho holebira, laga ka. Ani lowa tigua kudaga bi lalu Ngode Datagaliwabe ti aba ka laga ka. 17 Anigo hondo ha hadaba mani tinaga bi ogoni henenedabe be bame lenedabe handa handami̱ya. Ainde mani tiha agile tagira ibulubadabe. 18 Ainde wali agali tigabi bu karu ti heneneore Ngode Datagaliwabe waneiginiore heneyagua nde tiha mo ko holene tagira ibirangi Ngode Datagaliwabe ibunime ti waitiginaga giha howa haru dai birane handami̱ya. 19 Ai ti agua birabe handami̱ya ai ti bahandalu tandaga mo mima nalaremi. Tigua tandaga agira nelo mulene karulapeda.Tinaga bu mini mo palia howa hendore ha holebadabe naholebada. 20 Ai ayu howa bimi̱yago lo wima. Wali agali maru karunaga deni ti mo taga halu bo wahami̱ya. Tinime lalu ti Ngode Datagaliwabe ibunime ti handaya ho holebira layago ai tiha gi holene nawulebira.

21 Ai ogoni hangu wali agali ko biaga bu karu tigua tinaga miniha ngago latagi haga ka. Anigo ti luluore ka. Tininaga mana ko ngagome tini mo hondo henego ka. 22 Ngode Datagaliwabehanda wali agali mana bayale ngago talialu biaga karuhondo yolo bayale miaga kago ti manda nabiore ka. Ngode Datagaliwabenaga mini timbuni ngago manda nabiore ka. 23 Tinaga miniha mini putara halu mo libilaba lai heneore ka. Ngode Datagaliwabenaga mini ngago ogo. Ibugua wali agali homelo hame naleore ka. Irane ibuni haluhe haabobo haga kagome wali agali ibuniale helo wabini.✡Pig 1.26-27 24 Anigo ai dama heyolabeme wali agali heago dimagoli timbuni hayagome dindini homolene yu anda ibiyagoni. Ani binigome wali agali dama ibu aria bu karu bibahende homai halu pu ereba hai holebira.