1 Mini gigabi ibu Ngode Datagaliwabenaga bi mana latagi haga Mosese heba mandagi haabo haya. Mosesenaga giha mini gigabi ibu howa Isaraelenaga biabe biyago bayale biaabo halu hene.✡Har 15.22–17.16 2 Isaraele ti dindi ko yobi iba dalu nabiaga wali agali nahaga wiagoha ibaga bialu hene. Ani bialu hariga mbira nawiore wiagoha balai anda bu haga bima pene. 3 Tinaga waitigi baba wai bialu hongo ho hene. Ani bialu waitigi hearu baba wai bialu bo he̱la dai bigi bini. 4 Isaraele wali agali ti iba noa halu dendebe lebola hayagola tigua í̠hondo iba ngi lalu olayagola í̠na ti iba nelo migi biri. Iba ogoni ege to̱le̱ hongohe timbuni heagoha howa gudulatagi hayagola ti nalu hene. 5 Ibame tinaga waitigi bai hene. Ai horo kongi ibame dege Isaraele tini biamogo bini.

6-8 Bamba Isaraele waitigi tigua mana mbira wabialu mana ogonime, Isaraele waneigini bu karu bibahendeore homelai holene nga, lene. Ai tigua mana ko bialu karu biadai biaga Ngode Datagaliwabe í̠na iba timbuni pialu haabo haga peago mo ko harigola iba biago daramabi haya. Ani bialu ai ti dindi ko iba dalu naibaga wiagoha heangi í̠naga wali agali tinaga dendebe lebola halu iba noa howa tungulo handalu haya. Í̠nime waitigi genda mo mirigo Isaraele tiguabi nde genda ogoaleda lo manda bilonaga biriya. Anidagua helo howa ai Isaraele ti homaramagonida lo manda bu hearia nde ti iba dewaore nelo miriya. 9 Waneigini abame ti waneigini tigatiga mana lalu biagadagua í̠na í̠naga wali agaliru bahandariya. Ainde kinime ibu waitigi baba keba halu homelo bo wahagadagua wali agali ko hearu daba bagi hariya. 10 Wali agali ko karu kinime ti baba keba halu dabowa deni helagadagua í̠na nde wali agali tigua bialu heago bahandalu mo tale biriya. 11 Isaraele ti Iyibi wali agali baba mandagi Iyibi dindiha heangi í̠na Iyibi wali agalihondo tandaga timbuni mo miriya. Ani bialu Isaraele ti Iyibi wahalu puwa kaundiaha heangi nde Iyibi wali agalihondo genda timbuni lone mo miriya. 12 Genda timbunime Iyibi wali agali halu ki mo ko hayiya. Tiha mo ko holene genda timbuni halu ki anda ibiyago labo mitangi bialu howa tigua dugu timbuni biya. Agali timuheme tandaga howa dugu biagadaguaore biya. 13 Anidagua binigo genda timbuni Iyibi tigua yu hayadagoni irane Isaraele biamogo bulenaga ani ibilene. Iyibi tigua mbirale o biyadagoni hale howa tigua manda bialu biabe ogoni Anduane Homogohanda ibunaga biabe dege biya lolebira. 14 Mosese ibu bamba emene galini tigua mo bagi howa nu mbiraha ngelowa mo panaho ngelene. Ai Mosese ibu anda halu agali heagola Iyibi wali agalime mege bialu ibu erembira mialu hene. Mani howa mbirale tara tara tagira ibiyagola ibunaga biabe timbuni taraore yu heago hondowa ti mogolo hene. Ani hondowa ai Isaraele wali agalinaga Ngode Datagaliwabehanda mana kirani hagayane hendene. Ngode Datagaliwabehanda Isaraele wali agali iba dewaore mialu Iyibi wali agali namiyane hendene.

15 Ani biyago hondowa wali agali ko uruni tigua mini ko dewaore wialu hene. Tininaga mini ko ogonime mo luluya hayagola tigua puya mini nawi wiagohondobi ema bialu piaga maru berearuhondobi bi pupu wialu hene. Ani bialu hearia í̠na ema bialu piaga tara tara biru hearu ibilalu ti mo ko hariya.✡Har 8.1-24, 10.12-15 16 Í̠na anidagua bialu mbirale ema bialu piaga tinime bi pupu wiaga biarume tini mo ko holene yu ibaga lalu Iyibi wali agali tini mo walia hariya. 17 Ngode Datagaliwabe í̠naga hongo timbuniore nge. Í̠ninaga hongome dindi ogo wabiriya. Ani bialu mbirale wia ko hearu í̠nime baya hangu mo dabadabaho ngelariya. Ani bialu biango dudu tara tarabi gabua laionobi wali agali mo ko halu bo wahai helo ibilabehe kegoni. 18 Í̠na ema bialu piaga gabua taraoreru wabulene hongo karulapeore ke. Ani bialu maru nde tinaga ngui harigaha ira datagi haluhebi wabibehe ke. Ani bialu ema bialu piaga maru nde bi dalimuore hongo tara howa ladaga haragola ira hagua ne harigaha timbuni datagi helalu maru nde tinaga deha howa ira hungu datagi hagaru wabibehe karulapeore ke. 19 Ai ema bialu piagane urunibi dindini hayagua nde urunime wali agali abale balu tongolo milolebira. Ani bialu wali agalime urunibi de handayagua ti gi timbuni howa mogo lalu abale tungulo mu wulebira. 20 Anidagua bulene í̠ni karulape kegonigo í̠na ema bialu piaga ko urunialego wali agali bo wahai helonaga naibilabe. Í̠naga dabolene tigabi ngegoria haru polene hamelo heagua nde í̠na bame í̠naga ne harigaha pu laregome wali agali ko bu karu bame odopebe bialu homai habehe ke. Anigo ainde í̠nime mbirale bibahende dewaore helobi daga lowaore manda buwa holene karulape ngadagua helobi wabiriya.

21 Ngode Datagaliwabe-o í̠naga hongo bibahendengi walia haabo habehe kegoni. Mbiralime í̠naga hongo mo bagi habe naheore. 22 Í̠naga deni dindini ngago ibu emeneore dabiabi iba mu alebi mbiraga pibiya ibira haragome egerebagi handalu keria dadimba dindini ngaligobibi nga. 23 Anigo ainde í̠nime mbirale bibahende wabiai habehe kegome wali agali bibahende dara holene irane nawi ngagoria howa dara hai haga ke. Í̠na mbirali ko biaga kago abale bo waholene ngago nabe kegoni irane ti mini beregedelo henge mialu handaya ho haga ke. 24 Í̠na dindini karubi ngarubi bibahende gubalini hai ho haga ke. Mbirale bibahende í̠nime wabini bu ngaru aria mbirago ko ngada lo manda nabi kegoni. Ani manda bidego irane mbirale bibahende wabialu howa í̠na ko í̠ni manga holene ale mbira nawabini. 25 Í̠na mbirale mbirago helo hame nalariyagua nde ogoni ibu bayale naholebira. Mbirale mbira dindini helo wa nabiriyagua ogoni ibu dindini bame anda ho habe nahe ka. 26 Anduane Homogo-o mbirale bibahende karubi ngarubi í̠naga dege ngaru bibahende uruni í̠nime gubalini hai howa handaya ho haga ke.