8
Anduane Homogo Yarusaleme mo bayale hole lalu bi lowinigo ogo
Anduane Homogo Hongo Haiheore kago ibugua bi ogo Segaraiahondo lamini. Ibugua lalu, I̱na Yarusaleme wali agali gubaliniore ho kogo howa i̱na ti biamogo bua ho haabo harugoni. I̱na ti gubalini ho haore bidogome tinaga waitigi bu karuhondo keba timbuniore ho kogoni. I̱naga tano loma bia hene Yarusalemeni daibu holebero. Wali agali tara bu karume i̱naga wali agali Yarusaleme tanoni bu karuni de hondowa lalu, De handa naberego. Yarusaleme wali agali bu karume Anduane Homogo heneneore talima pialu kagoni ndobe, lolebira. Hari Saiono Anduane Homogo Hongo Haiheore kogonaga ngago wali agali bibahendeme hari ogoni Anduane Homogonaga lomabia heneore nga lolebira. Tano ogoniha wai bulenebi genda tara maru ngaru ariabi mbira naibulebiraore. Wali agali tano ogoniha haga karu ti hadege bialu hodagua halu halimburu yu howa tanoha hariga ngarunaga birulebira. Tano ogoniha ti bayale dege hai holebira. Waneigini dewaore andaho howa tano ogoninaga harigani gini bialu bu holebira.
Wali agali yu wahene emene hangu bu karume i̱na ogo ale mbira bulebira larogoni nabibeheore lo manda bu holebira. Anigo i̱ Anduane Homogo Hongo Haiheore kogome mbirale mbira nabibehe nawi. I̱na mbirale bibahende biai habehe kogoni. 7-8 Ainde waitigirume ibalu i̱naga wali agaliru minu garabaya bu yalu maru dindi ni tagira ibiragohayagi pialu maru nde ni paliragohayagi pialu biya. Ani yalu piyagoha howa i̱na i̱naga wali agali uruni lone haru dai berogola ti Yarusalemeni holebira. Ani kagola ti i̱naga wali agali helalu i̱ni tinaga Ngode Datagaliwabe howa i̱na mana tigabi ngaru hangu bialu holeneme handayaho halu haru haabo holebero. Yar 3.17, Ese 11.20, Seb 3.20, Seg 10.10
Tígua biabe hongo howaore bialu holene nga. I̱naga anda biago pigane bialu hemingi i̱naga bi mana latagi haga agali biarume bi latagi hayaru manda bilimu. Áyubi nde tí bi mbiraore ogoni aria dege hale haramigoni. 10 Anduane Homogonaga bi mana latagi haga agali uruni tigua bi latagi nahe heangi marume wali agali garabaya biabe ale bialu helo yolo bulenebi nogo bulumagame biabe bilonaga yolo bulenebi uruni nawiyagola bame hene. Tinaga damene dege hearuni mo waitigi haga birugola tini baya hangu ha nabi gi ho harimi. 11 Anigo áyu i̱na wali agali yu wahene emene bu karuni baba mana tara mende ale bialu holebero. 12 Tinaga bu miniha mo palia holene karulo helo merogola tigua tini mabuha tomoru hangalu haga haga bulebira. Iba dalu ibilarogola ti mabuha pu kuabu ale mbira lini daga mini gerebiru anda halu lini bayaleru dalu tomo tara tararubi anda hai holebira. I̱naga wali agali yu wahene emene karu baba howa mbirale bayale urunidagua bialu holebero. 13 Yuda wali agalirubi Isaraele wali agali bu kamirubi tígua bi larogo hale hadaba. Hameigini dindi tara taraha hearume tí mo ko hene wiago hondowa tini ha halu lalu, Tíore bayale ha ndo Yuda wali agaliru Isaraele wali agalirubi homo da hai hayadagua tíbi homo ereba halimu, lalu ha haga biya. Anigo ai i̱na Yuda wali agalibi Isaraele wali agalibi haru daibu heledoru mo bayale holebero. Ani heledogola hameigini dindi tara taraha haga o biarume tí hondowa ogodagua tini laga laga bialu lalu, Tíore Yuda wali agalibi Isaraele wali agalibi ti bayale kagobi dege bayale halimulo hameledema laga bulebira. Ani lolebirago ai tígua gi nahe howa hongo ho halimu, laya lene.
14 Anduane Homogo Hongo Haiheore kago ibugua lalu, Bamba tínaga mamalirume i̱ mo keba hayagola i̱naga miniha mo iriari bulene manda nabi howa i̱na ti mo ko holene manda birudagua ti mo ko halu bo wahai haru. 15 Anigo áyu Yarusalemebi Yuda bibahendebi mo bayale hai hole manda manda bu kogoni. Anidagua buleberogo ai tí gi nahe hongo ho holene nga. 16 Ani howa tígua bialu holene ngago ogo, Mendeali kagohondo bi henenego hangu laabo holene nga. Godi lole bi hale halu howa tiga tiga kirabalinaga hanuni howa mbirago ibu bi manda bu yu haabo nahelo abale mo tiga bulene nga. Eb 4.25 17 Wali agali mende karu mo ko holene mitangi nabi holene nga. Tígua godi lole pu howa ke̱ howa nalalimu. Bi ke̱ howa lolenebi godi lalu howa tiga tiga ndo mendeali mo hondo howa lolenebi keba halu guraga bulenebi uruni aleru bibahende i̱na hame naleore kogoni, laya lene. Min 3.29, Seg 5.3-4, 7.10
18 Anduane Homogo Hongo Haiheore kago ibugua Segaraiahondo bi mende lamini. 19 Ibugua lalu, Tígua ege maneru dauniru kaneru piniru tagira ibugu biragola ege uruninaga horo mbiru mbirungi tíha genda tagira ibiyago mitangi howa tí tomo nane haga wirimigo. Ai mani horo uruni Yuda wali agali tínaga horo tíni mo ngoaiho howa turu hagabu holene mbira wia aribia holebira. Ani bu holeberemigo mitangi bialu áyu howa tígua bi henene lolenegobi wali agali mende kago baba turu hagabu hangu holenegobi manda bialu gubalini ho halimu, lalu lamini.
20 Anduane Homogo Hongo Haiheore kago ibugua laabo halu lalu, Mani howa wali agali tano dewaore bu ngaruha howa Yarusaleme íbu ngoai holebira. 21 Wali agali tano mbiraha haga karu tigua wali agali tano mendeha haga karuhondo ogodagua lalu, Iname Anduane Homogo Hongo Haiheore kago mitangi bialu lotu lalu ibuhondo ina biamogo bia lole Yarusaleme poromago tíbi nde ina haru mandagi maibidaba, laga bulebira. 22 Wali agali dewaore hongohe dindi timbuni tara tara ngaruha howa Yarusalemeha ibuwa tigua Anduane Homogo Hongo Haiheore kago mitangi bialu lotu lalu ibuhondo ina biamogo bibe lole ibugu bulebira.
23 Horo ogoningi hameigini dindi tara tara ngaruha howa agali pirali ibalu tigua Yudali mbira kago minu yania howa ibuhondo lalu, Ngode Datagaliwabe ibu tí Yuda wali agali baba ka layane hale harima. Ani hale howa inabi nde tí baba ho mbiraore hoa biragonaga ibirima, lolebira lene.

8:7-8: Yar 3.17, Ese 11.20, Seb 3.20, Seg 10.10

8:16: Eb 4.25

8:17: Min 3.29, Seg 5.3-4, 7.10