1 Nɨn mbaapma nɨmba, ngwuk kat mbutɨna nyaangɨtna ngtɨni la lɨga nyaangɨt kɨngiyan ngwuk kat mbutna. Nɨn kat tɨga God kat wagala ngwula. Ngepma ngepmamba lɨga kwiyatapman mbutseli mbutsela mbutnjangat wagala ngwula. Wan apma nyaangɨt ndi kat kwulatndangat wagala ngwula. Ngwuk kat mbutnɨn, wan apma nyaangɨt ngwuk kat kwulatndɨ, ngwula maawupmba yelavɨka kwutaa lɨngwuk. 2 Nɨn kat kavle vat yivat walɨga kavle nɨmba nɨn kat mbaa kwulatandi waa wagala ngwula. Wan nɨmba nɨna mbaapmamba lɨga nɨmba ana ndi. Ngepma ngepmamba lɨga nɨmba nɨna mbaapmamba ana aywaa lɨgandi. Ndina nat nɨmba mɨna nɨna mbaapmamba lɨgandi. 3 Njambwi nyan waiga nyaangɨtmba yigiyandɨ. Ngwuk kat ava kwindɨ mala lɨgiyangwuk. Ngwuk kat God tɨvwi kɨlɨndɨ mala ngwuk kat Seten ana wuleiga kavle vat yigiyandɨ. 4 Njambwi nyan ngwula maawutmba ngwandɨndɨ maa ngwuk kat wana nyaangɨtmba yiga yetɨgiyangwuk. Yiga yetɨngweya vak kat nɨna mbangɨ ana kɨlɨpangɨ yigiyandɨ. Nguwk wan vak tamba yiga yetɨlɨngwa vatna. 5 Njambwi nyan njwula maawupmba ngwandɨla lɨndɨ maa God kat woviyaguga lɨngwangat wanɨn. Kraist wan nyaangɨtmba ngwula maawupmba yelavɨka nɨma vat kwutaa lɨngwangat wanɨn.

6 Kɨta mbaapma nɨmba njambwi nyan Jisas Kraistna sɨmba ngwuk kat nɨmamba mbutɨganɨn. Ngwula kɨta nyan njɨvwa kwutapman kwo lɨndeyan ndɨnagwinala ana lɨgiyangwuk. Wan nyan tat ngwuk kat mbutna vapmba ana yetɨlɨgandɨ. 7 Yetɨna vapmba yetɨ ngwula. Ngwutnagwinala tɨga njɨvwa kwutapman kwo ana yetɨlɨnɨn. Vɨga lɨngwuk. 8 Nat nɨmbana nao kwo klalaa ana kɨlɨnɨn sanya kwilapman. Ngwutnamba sanya klavak kat kai walaa nandinya ngan nɨma njɨvwa kwutɨnɨn. Ngwuk kat nɨma njɨvwa kwivak kat kai wanɨn. 9 Yetɨna vapmba yetɨ ngwula waa ngwuk kat mbupmak wanɨn. Ngi kat nɨma njɨvwa kwivak kat kai wanɨn. Ngwutnamba tamba sanya klalɨgenɨn nglaakendɨ. Yetɨna vapmba yetɨ ngwula waa ngwuk kat mbupmak wanɨn. Ngi kat tɨga ngwutnamba sanya ana klanɨn. 10 Ngwulogwinana lɨga wan nyaangɨt ngwuk kat mbutnɨn. Kɨta nyan ndɨ njɨvwa kwupmak kat kai wandeyan ndɨ kat nao ke kwiga. 11 Ngwutno nat nɨmba ndina njɨvwa kwagalalaa nat nɨmbana njɨvwa kat ndi njangumba wuka yiga vɨndi. Yinja vak wuka lɨnɨn. 12 Njambwi nyan Jisas Kraist waa vapmba wundi nyangu kat njsvwa agwut walɨganɨn. Nat nɨmbana njɨvwa kat njangumba wuka ke yilɨngwa waa walɨganɨn. Ndina njɨvwamba kwuka sanya klaigandi. 13 Kɨta mbaapma nɨmba, ngwuk apma njɨvwa kwupmak kat ngwula mbangɨ kɨlɨpangɨ yilandɨ. 14 Kɨta nyan wan pasmba pɨlɨwutna nyaangɨk kat kai wandeya ndɨ kat yigumba avɨmba. Ndɨ kat kwagala. Ndɨ kat kwagalangweyan ndɨna mbangɨ ngwuk kat vɨndeyan wup yigiayndɨ. 15 Maama nɨmba kat yinja vak vla ndɨ kat wupma ke yingwa. Ndɨ kat ambupmbangwuk. 16 Apma vat kwilɨga njambwi nyan ngwuk kat maawupmba apma vat kwindangat wanɨn. Njɨmbla njɨmbla mandɨt mandɨt vapmba kwindangat wanɨn. Njambwi nyan ngwutnogwinala kɨta vat tɨndangat wanɨn.

17 Wun Pol wun ngwuk kat apma nandinya waa pɨlɨwupmak wowun. Ngi kat tɨga wuna taambamba wan kavamba wan vandi pɨlɨwutɨgowun. Pɨlɨwukwa pas aywaa pɨlɨwutɨgowun. 18 Nɨna njambwi nyan Jisas Kraist nɨn kat awagapma kwinda vak klambangwuk walaa ngwuk kat walɨgowun.