8
GODNAGWI NƗNA NƗNDƗMBA LƗGA NYAN JISASA
1 Mbutuwa nyaangɨtna angwa kɨngiyan. Nɨn kat tɨga Godna nyingi maawut kat kwunatɨga nyan ngilɨga. Nyinangwut wokelaa Godna yaagindan naangamba ndaa lɨgandɨ. 2 God tɨga kavamba lɨga nɨn kat tɨga wan njɨvwa kwutɨgandɨ. Tamba la ndi Juda God tɨgiyaa ngay ndi selmba kwutndi. Jisas mbambala tɨga kava God tɨga kava ndinyangu wan ngepma ana kwutndi. Ndɨ God kapma kwutndɨ.
JISAS HETPRIS KWUTA NJƗVWA KWUTƗGANDƗ
3 Hetprisna njɨvwa kɨngiyan. Ndi kwanda kwanda God kat sɨvu kɨgakwilɨndi. Nat kwanda kwanda nda vatnyaga God kat kwunapmak wilɨgandi. Nɨna Hetpris Jisas ndɨno God kat kwindeya nda tɨndɨ. Ndɨna mbangɨ kwindɨ. kwindeya nda tɨlapman yigendan Hetprisna njɨvwa ana kwukendɨ. 4 Jisas wan kɨpma tɨgendan wan Hetpris kwuta njsvwa ana kwukendɨ. Kan kɨpmamba Hetprisna njɨvwa kwuta nɨmba wundɨgi lɨga. Moses kwiya nyaangɨt wandɨ maa ndi laataa wan njɨvwa kwutɨndi. 5 Ndi kɨpmamba lɨga Jisas nyinangwut wokelaa kwutɨnda vla kwutɨndi. Moses ndɨno nɨmbun God nyinangwupmba tɨga ngay vla Hetpris God kat kwunatɨnja ngay selmba kwutɨndɨ. Kwutɨnda njɨmbla God ndɨ kat wandɨ. Wan ngay kwo ke kwuka. Tamba nduwiat wokemɨn mala mɨn kat sɨmogwiwa vak vla wan ngay wupma agwuk mɨla waa wandɨ God. 6 Tamba la Hetpris kwutɨnja njɨvwa kavle njɨvwa ana ndɨ. Mbambala Jisas kwutɨnda njɨvwa tak kwutɨnja njɨvwa kat kwulatndɨ. Kwutɨnda njɨvwa apma ngleia. Tamba la nɨmba ndi kat God tamba mbutɨnda nyaangɨpmba wutaa kwutɨndi. Ndɨ Jisas God ngɨni mbukna nyaangɨpmba wutaa apma njɨvwa kwutɨgandɨ. God ngɨni mbukna nyaangɨt tamba mbuta nyaangɨt kat kwulatɨgandɨ.
KUPI NYAANGƗT YANDƗ MAA TAMBANA NYAANGƗT NGƗLƗNDƗ
7 God tamba wanda nyaangɨt apma nglei nyaangɨt tɨgendan ngɨni ana nat nyaangɨt mbukendɨ. 8 Tak kwiwa nyaangɨt samat ana nglaatndɨ waa waga God Juda kat tamba wandɨ, pɨlɨwutndi.
Ngɨni yaiga nandinya ngwuk kat wupma mandɨt kupi
nyaangɨt mbukiyowun. Juda waa Isrel walɨnja nɨmba kat mbukiyowun. 9 Ngwula walanga kat tamba mbukwa
nyaangɨt ngwuk kat mbukweya nyaangɨt kɨta
nyaangɨt ana ndɨ. Kapma kapma nyaangɨtna. Ndi
Isipmba lɨndi, ndi kat kwutaa kaliwa njsmbla ndi
kat tamba mbukwa nyaangɨt mbukwun. Ndi kat mbukwa
nyaangɨt kat kai walaa wan nyaangɨpmba ana yiga
yetɨndi. Ngi kat tɨga ndi kat kai wowun. 10 Ngɨni Isrel walɨnja nɨmba kat mbukweya nyaangɨtna vat
kɨngiyan. Wuna nyaangɨt ndina maawupmba
taagagiyowun. Ndi maawupmba yelavɨka kwutaa
lɨgiyandi. Ndina njambwi nyanat tɨgiyowun. Wuna
nyangu vla lɨgiyandi. 11 Ndi njambwi nyan walɨga
vapmba yetɨ ngwula waa awat sowat ana walɨgandi.
Ndi aywaa nɨma nɨmba mat nyangu wunai walɨga
vapmba yetɨgiyandi. 12 Kavle vat yiga yetɨnjeya
vak wan vak sɨlɨmbwigiyowun. Kavle vat yiga
yetɨnjeya vak kat ana njɨmbla njɨmbla yelavɨka
lɨgiyowun. Wan vak kat ana kimbut yigiyowun. Kwagalagiyowun waa wandɨ God.
13 God wandɨ. Mandɨt kupi nyaangɨt mbukiyowun. Wandɨ maa tak wanda nyaangɨt tamba nyaangɨtna waa vɨlɨganɨn. Tamba la nda aywaa ngɨli mɨna lɨgandɨ.