18
Ulke kombu awili Babilon kamukumu bembo nimu ungumu
1 Oi akumu kanopolio, altopo kanoru wali ensel te mulu kombuna mainye orumu. Akumu yu kombu nokombalo enge paa awili te pepa, yunge pa enge nilimuni mai kombuna pa tenderimu. 2 Yuni paa enge nimbe alako topalie nimbei,
“Ulke Kombu Awili Imbi Paa Olandopa Mololi Babilon kamukumu bembo nimo.
Kamukumu beambo nimbe pora timo.
Oi kombu pengamu nalo kinye kuro kerima linonga kombumu ningo akuna peremele.
Kuro keri kalaro mololima kinye
kera kalaro mololima kinye kera keri lelima kinye akuna peremele.
3 Kano kombuna imbo moloringimani
wapu ulu kerinali tenge uluma peremo no wain paa enge nilimu
we kombumanga pali imbo talapema noringimunga kamukumu keri lerimu.
Kombumanga pali iye nomi kingimani kape yu kinye wapu ulu kerinale teringi.
Maina bisnis teringi iyemani eno none teko mele kerima eio konopu leko
eno yu kinye bisnis teko kou mone awini ltingi,” nimu.
4-5 Kano wali pele, mulu kombuna ungu te lupe wendo orumuna pileru wali nimbei,
“Nanga imboma, aku ulke kombumunga ulu pulu kerima lepa mulu kombuna ola oromo,
aku kombuna tepa kenjirimu uluma
Goteni pilipe moromo kani eno aku ulke kombumu tiye kolko wendo pangei!
Yunge ulu pulu keri teremo akuma peya kopu tepo naa teamili!
Ulu pulu keri teremo akumanga
Goteni umbuni timbeloma lino waye naa liemili ningo wendo waio!
6 Yuni yando tepa kenjirimu akumunga
enoni nendo aku teko yu pundu toko tiengei!
Yuni yando terimu akumunga
enoni nendo te panjiko pundu tangei!
Yuni no enge nili mingi kapona tepa wamopa
terimumu liko no enge nili olandopa purumo te panjiko yu nopili tiengei!
7 Yu yunu oi molopo kondambo nimbe yunge imbi lipe ola mundupe
yu none tepa molorumu aku tepa mele pundu toko
olandopa olandopa yu mindili tiko umbunima mepili tiengei!
Yuni konopuna kelkele topalie nimbei,
‘Na ambo nomi kwin molopo kwininga polona moro.
Na ambo waire naa moro.
Na walite kape kola tepo kola ulke naa molombo,’ nimbe konopu ltemo.
8 Akumunga wali tendekumunga yunge umbunima wendo ombalo.
Imbo kolonge kuro awini wendo omba, imbo awini kola teko,
kombumu engele lembalo. Tipeni yu nomba pora timbelo.
Yuni uluma aku tepa tepa kenjirimomunga
yu kot tendepa pimo Gote Awilimu
paa enge nili olandopa peremo iyemuni yu moke tepa mindili akuma timbelo.
9 Yu kinye wapu ulu kerinali teko, yu eio konopu leko eno none teringi iye nomi kingimani yu tipeni nomba ilio wendo ombalona kanokolio kondo kolko kola teko konopu keri lenge. 10 Yu mindili nombalo ulu kanokolio mini lteko tule teko angilkolio ningei,
‘Ai ya! Ai ya! Ulke kombu imbi paa ola mololimu,
kombu paa awili enge nili Babilon!
Ena mongo tendekumunga kau
nunge teko kenjirinumunga uluma walitikale wendo oromo,’ ninge.
11 “Maina bisnis teremele iyema enonga bisnis teko kou mone linge melema naa lingemunga eno kola teko konopu keri lenge. 12 Bisnis teko noinge mele akuma i tepa: Kou gol kinye kou silva kinye kou mone awili tepa purumo kouma kinye kulumbulu kake kou mone paa olandopa purumoma kinye maminye kake pengama kinye, maminye kondoli lupe lupema kinye, unjo lupe lupe mune tolima kinye, mele lupe lupe kongi elepen geromanoni teko wamoko teringi melema kinye, unjo kou mone awili tepa pulimani teko wamoko tenge melema kinye, kou bras kinye kou ain kinye kou wape telima kinye aku koumani teko wamoko tenge melema kinye, aku melema noiko, 13 kangina mune topili ningo wel teko wamoko, teko karomele sinamon kinye langi tingo tepili mele mare kinye, paura keku karomele wali mune toromoma kinye, wel lupe lupe mune tolima kinye, no wain kinye unjo oliv wele kinye rais wit kinye, rais witimuni teko wamoko teremele plawa kinye kongi kao sipsipima kinye kongi os kinye oseni kundurumo karoma kinye kongono we tendenge kendemande molonge imboma kinye; aku mele noingema pali limbelo imbo te naa moromo, molo.
14 Enoni ningei, ‘Nu mele penga kou mone olandopa purumo melema paa liemboa konopu ltenoma mainye pumo. Mele penga lupe lupema nu aie konopu lenioma kinye nunge au nino mele kou mone olandopa purumo pengama kinye kamukumu nu tiye kolko mainye punge. Melema altopa nu kinye naa lembalo kanonio,’ ninge. 15 Aku melema bisnis teko kou mone awini liko tenge iyemani tule teko angilko yu mindili awili tepa nombalo ulu kanokolio paa mini ltenge. Kola teko konopu keri lekolio 16 ru ningolio ningei,
‘Ai ya! Ai ya! Ulke kombu imbi paa ola mololimu,
ambo kamakoma pakoko moromele mele wale pakoli kondoli pakopa,
kou gol kinye kou kangi lupe lupe kololi kou mone awili tepa purumoma kinye,
kulumbu kake tepa kou mone awili tepa purumoma kinye akumani yu au nimbei molorumu.
17 Ena mongo tendekumunga yu kou mone awili purumu mele noirimoma paa kamukumu keri ltemo,’ ninge.
Nomu kutana andoli sip nokoromele iyema kinye sipimanga kongono teremele iyema kinye nona andoko bisnis teko kou mone limele imboma kinye tule teko angilkolio 18 tipe nombalomunga iliomu kanokolio ningei, ‘I ulke kombu awilimu none teli te lerimuya?’ ninge. 19 Mai kungupo liko pakoko kola teko molkolio ru ningolio ningei,
‘Ai ya! Ai ya! Ulke kombu imbi paa ola mololimu,
sip meko andoko akuna kou mone awili tepa noirimu kou mone awili teko ltingi kombumu!
Ena mongo tendekumunga aku kombumu kamukumu beambo nimo,’ ninge.
20 Mulu kombuna moromele imboma kinye,
Gotenga imboma kinye Kraistini yunge kongonomu tendepaio nimbe lipe mundurumu iyema kinye
Gotenga nimbe munduli ungu nili imbo profetema
kinye i kombumuni eno mindili tipe tepa kenjirimumunga
Goteni moke tepalie yu mindili tipe tepa
kenjirimumunga eno konopu tiko tono kolaio nimbelo.”
21 Kano kinye ensel paa enge nili teni kou paa awili te ola lipe nomu kutana topa mainye mundupelie nimbei,
“I tero mele aku tepa ulu enge nili wendo ombalo
teni ulke kombu awili imbi paa ola mololi kombu Babilon topa mainye mundumbelona
imbomani i kombumu altoko naa kanonge.
22 Gita toko, kolape mingi langoko, biukel popo toko,
kunana ningo, aku teko ulu teremele unguma altoko naa pilinge.
Ulke takoko mele teko wamoko teremele kongonomanga imboma altoko naa kanonge.
Plawa teamili ningo kou awili teni rais wit kai
ltemele kinye ungu nimo ungumu altopa naa nimbelona pilinge.
23 Nu kombumu tipe lam pa naa tembalo.
Iye te ambo limbei molo ambo te iye pumbeindo ungu nimele mele
nu kombumu altoko naa pilinge.
Oi nunge bisnis teringi iyema kombumanga pali
iye kamakoma moloringi.
Nunge kuro koiringi ulumuni nuni mai kombuna
imboma pali kolo toko kondi toko tirinu akumuni imbomani ulu keri awini teringi.
24 Gotenga imbo profetema kinye Gote yunge imboma
kinye Babilononi topa kondorumumanga memema aku kombuna ltemo.
Mai kombumanga pali toko kondoringi imbomanga memema kape aku kombuna ltemo.
Aku uluma pali wendo orumuma kombu
Babilon yuni kau tepa kenjirimu,” nimu.