(Kisim Bek)
Yämagurani
Anututä ämawebeniye Isip komi piäken nanik imagutkuko unitäŋo manbiŋam
3
Yämagurani 3:1-15
Yawetä Moses epän man iwetkuk
Mosestä yepmani wäpi Jetro, unitäŋo yawakiyeta watä it yämik täŋkukonik. Jetro uwä Midian nanik täŋo bämop äma. Täŋpäkaŋ kepma kubäta yawak kome kawuki kukŋi udude yäŋ-yäkŋat yäpmäŋ päŋku Yawe täŋo pom, wäpi Horep u ahäŋkuk. * Apos 7:30-34 Ahäŋpäŋ irirän Yawe täŋo aŋero päya keräpi pähämi gänaŋ itkaŋ kädäp mebet ude ahäŋ imiŋkuk. Ude ahäŋ imiŋirän Mosestä kaŋkuk; Päya u mebet abukopäŋ nämo ijiputkuk. Ude kaŋpäŋ ŋode nadäŋkuk; Inide kubä ahätak yäk. Päŋku imata nämo ijiputak yäŋ kaŋpäŋ nadäwa yäk.
Ude yäŋpäŋ imaka u kaŋpäŋ nadäkta kuŋkuk. Kwänä Yawetä kaŋpäŋ päya u pähämi gänaŋ naniktä Mosesta gera ŋode yäŋkuk; Moses! Ude yäŋirän Mosestä yäŋkuk; Näk ŋo yäk. Ude yäwänkaŋ Yawetä iwetkuk; Tuän äbeno! Kome itanken u kudupi unita kuroŋka ärärani yäŋopmäŋpäŋ pe yäk. Ude yäŋpäŋ ŋode iwetgän täŋkuk; Näk nanka täŋo Anutu, Abraham, Aisak, Jekop täŋo Anutu yäk. Ude yäwänä Mosestä Yawe kakta umuntaŋpäŋ iŋami dapun täŋpipiŋkuk.
Täŋpänkaŋ Yawetä ŋode yäŋkuk; Äma äbotnaye Isip komeken butewaki terak itkaŋ u yabäŋpäŋ-nadäŋkut yäk. Isip naniktä komi epän yämiŋirä konäm butewaki terak gera yäŋirä nadäŋpäŋ komi nadäkaŋ unita nadäwätäk täyat yäk. Unita Isip äma keriken nanik yämagut yäpmäŋ päŋku kome säkgämäninik, gakŋi taŋi nikekken yepmakta äpätat ŋo yäk. Kome uken yepmaŋpayäŋ täyat uwä Kenan, Hit, Amo, Peres, Hivi ba Jebus äbot unitäŋo kome yäk. Nadätan? Ŋowä Isrel äbot unitäŋo konäm butewaki nadäŋpäŋ Isip ämatä waki täŋ yämik täkaŋ u käyat. 10 Unita gäk akumaŋ ku. Isrel ämawebenaye, näkŋo äbot u Isip komeken nanik yäŋ-yäkŋat yäpmäŋ äbäkta Feroken ku yäŋ peŋ gäwetat.
11 Anututä ude iweränä Moses ŋode iwetkuk; Täga nämo yäk. Näk ŋodewanitä jide täŋpäŋ Feroken päŋku Isrel ämawebe Isip komeken nanik yäŋ-yäkŋat yäpmäŋ äbet? 12 Yäwänä Anututä iwetkuk; Näk gäkkät api itde yäk. Täŋpäkaŋ imaka ŋode ahäŋirän kaŋpäŋ Anutu näkŋa gepmaŋpa kuyan yäŋ api nadäwen; Gäkä Isrel ämawebe Isip komeken nanik yäŋ-yäkŋat yäpmäŋ pom ŋoken äbä itkaŋ Anutu näk api naniŋ oretneŋ.
13  * Kis 6:2-3 Anututä ude yäwänä Mosestä ŋode iwetkuk; Upäŋkaŋ näkä päŋku Isrel ämawebeken ahäŋpäŋ Nanjiye täŋo Anututä peŋ näwet-pewän äbätat yäŋ yäwerayäŋ täro uwä ŋode käwep api näwetneŋ; Eruk niwet! Anutu u wäpi netä? Ude yäŋirä jide api yäweret? 14  * Rev 1:4,8 Yäwänä Anututä iwetkuk; Näk Itkuronitä Itat. Unita Isrel äbot ŋode kaŋ yäwet; Wäpi Näk Itat unitä inken näwet-pewän äbätat. 15 Ude yäŋpäŋ ŋode iwetgän täŋkuk; Gäk päŋku Isrel ämawebe ŋo kaŋ yäwet; Yawe, Abraham täŋo Anutu, Aisak täŋo Anutu ba Jekop täŋo Anutu unitä inken näwet-pewän äbätat. Wäpna Yawe uwä wäpna tärek-täreki nämo api irek. Äbot kodakitä kodaki wäpna Yawe u pen api yäŋ yäpmäŋ kuneŋ.

*3:2: Apos 7:30-34

*3:13: Kis 6:2-3

*3:14: Rev 1:4,8