1-2 Amene imalini yame, wamba yakama aitene wandakali ateai-angi, yakamato owato gote pii na-lalaini tupa lotu lo atalapale nembo toto, sipitisa koo tupamane yakama kilau lo meaini oko yakamato nembo teyai okoni. Andipa yakamato Oli Sipitisa okona piape oko wayumane nembo tapiai lakae lo nembo teyo. 3 Wuane nembo toto, nambato yakama languato, Gotena Oli Sipitisa oko wandakali mindinga atoto, piape pua ateando, wandakali okonemane Jisasa bala yuu koo okona peakale na-lalane. Dee, Oli Sipitisa ata napene wandakali tupamane katulo Jisasa bala Akali Andane oko ateya na-lalaini teke. Jia. *1Jo 4:1-3

4 Gotena piape mindipene-mindipene pulane tai-lene kambua eya tekeko, Oli Sipitisa mindiki angu ateya okomane piape pulane tai-lene utupane tale puato, wandakali mindiki-mindiki lo maiyane. *Lom 12:6 5 Wandakali mindiki-mindiki lo Gotena piape mindipene-mindipene tupa piyaini tekeko, Akali Andane mindiki angu ateya okomane wandakali utupane pitakana piape tupa ando atalane.

6 Gotena piape pulane mana mindipene-mindipene tupa eya tekeko, Gote mindiki angu ateya okomane balana piape pulane mana mindiki-mindiki lo balana wandakali tupa andawa leya-kola, utupane-mane katulo balana piape utupane pitaka piyaini. 7 Kitisene wandakali mindiki-mindiki lo wandakali waka tupa moyakale nemboto, Oli Sipitisa okomane Gotena piape mindipene-mindipene pulane tai-lene kambua tupa tale puato, utupane maiya-kola, utupane-mane piape utupane pua atoto, Oli Sipitisa oko utupanenga ateya lo andawa lalane.

8 Oli Sipitisa okonemane wandakali minditupa mo wai-ene gulaya eya-kola, utupane-mane Gotena pii oko wayumane nembo toto, Goteto yakama wua piyapape leya lo wandakali tupa mana kuai lo lamai-yaini. Oli Sipitisa mindiki okonemane teke Gotena pii tene tupa wandakali minditupanga andawa leya-kola, utupane-mane Gotena pii tene tupa kuai lo mana lamai-yaini.

9 Oli Sipitisa mindiki okonemane teke wandakali minditupana bilipi oko minu tai wete laya alane. Oli Sipitisa mindiki okonemane teke wandakali siki pelene tupa mo atu yolane tai-lene oko wandakali minditupanga maiyane. 10 Wandakali minditupa-mane metekolo piape tupa peakale nembo toto, Oli Sipitisa mindiki okonemane teke metekolo piape pulane tai-lene okone wandakali utupanenga maiyane. Akali minditupa-mane Gotena pii oko wandakali tupa kuai lo lamai-yakale nembo toto, Oli Sipitisa mindiki okonemane teke tai-lene okone akali utupane maiyane. Wandakali mindimane mangene mindi peya-angi, sipitisa koo mindimane bala moyo ateya-kola, balato mangene okone katulo peyape, pee Oli Sipitisa okomane bala moyo ateya-kola, balato mangene okone katulo peyape lo wandakali minditupa-mane tatake alalaini. Wuaneko, wandakali minditupa-mane okonetaka yapa lo tale peakale nembo toto, Oli Sipitisa mindiki okonemane tai-lene okone wandakali utupane maiyane. Wandakali minditupa-mane wandakali yame waka tupana pii lalaini oko mo leakale nembo toto, Oli Sipitisa mindiki okonemane tai-lene okone wandakali utupanenga maiyane. Wandakali minditupa-mane wandakali utupanena pii lalaini tupa mopeke leakale nembo toto, Oli Sipitisa mindiki okonemane tai-lene okone wandakali utupanenga maiyane. 11 Oli Sipitisa mindiki okonemane teke Gotena piape utupane pitakana pulane tai-lene tupa tale pukale nembo tolane pua teke tale puato, nanima mindiki-mindiki lo giyane. *1Ko 7:7

12-14 Kini mindiki angu nimbana umbaini utumane ata napeya. Jia. Kene mindiki angu nimbana umbaini utumane ata napeya teke. Nimbana kinipi, kenepi, lenepi, alenepi, okonetaka tupa pitaka mina mindiki lene oko nimbana umbaini utumane ateya. Nimbana umbaini okona okonetaka kambua atalane tekeko, nimbana umbaini mindiki angu ateya. Wuane pua teke, wandakali yame waka-waka kambua ateyai tekeko, Kataisana sosa oko yame mindiki atoto, umbaini mindiki gulo ateya. Wandakali minditupa-mane piape puato, yole mialaini tekeko, wandakali minditupa-mane yole mia napene, katapusa atene gulo atoto, wandakali waka tupana piape mee pimai-yaini. Wandakali minditupa Juta yame ateyai. Wandakali minditupa yame waka mindi ateyai. Wuane tekeko, wandakali yame waka-waka nanima pitaka-mane Oli Sipitisa mindiki okona tai-lene oko mialapale nembo toto, Goteto balana Oli Sipitisa okone nanima geane. Nanima ipa mema-angi, Oli Sipitisa okonemane nanima pitaka Kataisana yame mindiki gulaya ya-kola, nanima Kataisana umbaini mindiki gulo ateyama. *1Ko 10:14-18; Ga 3:26-28

15 Nimbana kene mindimane nimba languato, namba kini mindi ata napeyo okonena, namba nimbana umbaini okona ata napeyo leando, kene okone nimbana umbaini okona mee atolopeya okoni. 16 Nimbana alene mindimane nimba languato, namba lene mindi ata napeyo okonena, namba nimbana umbaini okona ata napeyo leando, alene okone nimbana umbaini okona mee atolopeya okoni. 17 Nimbana umbaininga alene ata napene, lene angu atapia-yale, nimbato anu puato, pii ale api-yalepe. Nimbana umbaininga ingane ata napene, alene angu atapia-yale, nimbato anu puato, minditaka tupa tunduma api-yalepe.

18-19 Nimbana umbaini okona okonetaka mindiki angu atapia-yale, okone nimbana umbaini utumane ata napipia-yale. Jia. Wuane tekeko, Goteto nimbana lenepi, alenepi, kinipi, kenepi, okonetaka tupa pitaka mindiki-mindiki lo nimbana umbaini okona ateakale nembo teane pua teke waa puato, ate leaipia. 20 Nimbana umbaini okona minditaka kambua ateya tekeko, nimbana umbaini mindiki angu ateya.

21-22 Nimbato nimbana umbaini okona okonetaka ateya tupana minditupa tai nalene ateya nembo talene tekeko, utupane ata napipia-yale, okone katu nalapia-yaleko. Nimbana lene okomane nimbana kini oko lamawuato, nimba ata napipi-yale, okone katu lapia-yale nalape-pene. Wuane pua teke, nimbana kawane okomane nimbana kene oko lamawuato, nimba ata napipi-yale, okone katu lapia-yale nalape-pene teke. Jia. 23 Wandakali-mane nimbana umbaini okona yala-pene tupa andeaindo, nimba yala olowane nembo toto, nimbato utupane wayumane ombo alene. Wandakali-mane nimbana umbaini okona waka minditaka andeaindo, utupane-mane embo olopeyai nembo toto, nimbato utupane yati puyale, tona pilini.

24 Wandakali-mane nimbana lee-inga andeaindo, utupane-mane epele olopeyai nembo toto, nimbato okone mee panakame yakale lo ando kondalene. Nimba tane umbaini okona minditaka mindi anda napi lapi-yale tekeko, okonemane piape andane mindi peakale nembo toto, Goteto nimbana umbaini oko kuai lo waa peaipia. 25 Goteto nimbana kinipi, kenepi, lenepi, alenepi, okone taka tupa yame lapo gulo ata napene, mindi moyaka pua ateakale nembo toto, utupane pitaka mina mindiki loto, nimbana umbaini oko waa peaipia.

26 Tene okonena, nimbana umbaini okona minditaka tandaka peando, nimbana umbaininga atalane tupa pitaka tandaka piyane. Wandakali-mane nimbana kini yandopi, kene yandopi, okonetaka mindi laiyu leaindo, nimbana kini yandopi, kene yandopi, okonemane angu epele na-olopeya. Jia. Nimbato epele olopele. 27 Yakama mindiki-mindiki lo Kataisana kini yandopi, kene yandopi, okonetaka mindi gulo ateyai okonena, yakama pitaka mina mindiki lene atoto, balana umbaini gulo ateyai. *Lom 12:3-5

28 Wamba ini bulupane Goteto sosa okona akali minditupa aposolo akali ateakale leaipia. Lapone balato wandakali minditupa potopisa akali atoto, balana pii lamawua ateakale leaipia. Tepone balato wandakali minditupa tisa atoto, balana pii mana lamawua ateakale leaipia. Balato metekolo piape piyaini wandakali tupapi, yangone siki pelene tupa mo atu yalaini wandakali tupapi, yangone moyalaini wandakali tupapi, piape ando atalaini wandakali tupapi, yame waka tupana pii lalaini oko mo lalaini wandakali tupapi, utupane pitaka-mane piape utupane pua ateakale leaipia. *Ep 4:11-12

29 Goteto piape utupane pitaka tale puato, yakama gea-kola, yakama pitaka aposolo akali ateyaipe. Yakama pitaka-mane balana pii lamawua atalainipe. Yakama pitaka tisa ateyaipe. Yakama pitaka-mane metekolo piape tupa piyainipe. 30 Yakama pitaka-mane wandakali siki pelene tupa mo atu yalainipe. Yakama pitaka-mane wandakali waka tupa moyalainipe. Yakama pitaka-mane wandakali yame waka tupana pii lalaini tupa mo lalainipe. Yakama pitaka-mane wandakali utupanena pii lalaini tupa mopeke lalainipe. Jia. 31a Yakama pitaka-mane wuane na-piyaini tekeko, yakama mindiki-mindiki lo Gotena piape epene wete utupanena mindi piwa lakae lo nembo talapape.

31b Andipa nambato mana epene wetete mindi yakama langeyo. *1Ko 14:1