4
Kenda-pene Awua Atoto, Gotena Piape Pua Atape Leane Oko
Matili Jisasa Kataisa bala dee lapone epola-angi, bala kiŋi gulo atoto, wandakali omenepi, sakapi, utupane pitaka yapa lo tale pulupeya. Wuane pulupeya nembo toto, Jisasa Kataisa-la, Gote-la, okone-lapona wenonga nambato pii leyo nayu loto, nimbato piape wua pua atape leyo. Wandakali-mane Gotena pii oko ale amakale lo mandeke pitane ateaindopi, mandeke napene ateaindopi, nimbato Gotena pii oko lamawua atape. Nimbato Gotena piape oko puyale wamba ini kepa naene, wandakali tupana mana mo tika puato, yakamato mana koo tupa kondalu, Gotena mana epene tupa wato minu atalapa lo mana lamawua atape.
Matili wandakali-mane Gotena pii tika-pene okone ale aa napimakale loto, pii yakama tane epele alaini okonetaka tupa ale aima lakae lo nembo tolopeyai. Wuane nembo toto, wandakali utupane-mane pii okonepene tupa mana lamai-yaini akali tisa kambua yapa lo molopeyai. * 1Ti 4:1-2 Wuane piyu, wandakali utupane-mane Gotena pii enene oko ale oyale kepawa masia mawuato, tisa utupanena mee pii temane tupa epelewa ale olopeyai. Wandakali utupane-mane wuane pulupeyai tekeko, ole dindi lo Timoti nimba tane mana kuai lo wete ando atoto, kenda-pene nimbanga epola tupa awua atape. Nimbato Gotena pii layene epene oko wandakali tupa lamawua atoto, piape Goteto nimba geane tupa pitaka peyo nayu pua atape.
Namba omolane oto oko mandaka gulo epeya-ko. Wandakali-mane minditaka Gote lo opa maiyaini pua teke, namba omolowa-angi, nambana tundupa oko Gote lo opa maiyene okonepene gulolo-peya. * Pl 2:17 Nambato Jisasa lo bilipi lalawane oko awua tepa naene, bilipi leyo nayu loto, Satane towa yanda tailo puato, sia minewa. Nambato Gotena asini epene okona tai lewane oko tai lama-lama ipulu, koyo pua epolane maki okona peakaiyu leyo. * 1Ti 6:12
Tene okonena, Jisasato yole epene mindi namba gukale lo makande piyene eya. Matili yuu oko koyo pula-angi, wandakali kuai lo tale piyane Akali Andane okomane yole epene okone namba giyu, namba akali epene tika-pene ateya lolopeya. Balato yole okone namba angu gii napulu-peya. Jia. Akali Andane okomane yole epene okonepene tupa bala panakame epola oko andaima lakae lo maliyo atolai wandakali tupa pitakanga malupeya. * 1Ko 9:24-25
Poloto Timoti Nimba Wamba Ini Ipupe Leane Oko
9-12 Akali Dimasa bala yuu okona minditaka eya tupa epele wete wato, namba tepa alu, Tesalonaika tano okona pea. Akali Ketesenasa bala Galesia potopinjia okona pea. Taitasa bala Dalamesia disitiki okona pea. Nambato akali Tikikasa bala Epesasa tano okona peakale lewa. Andipa Luku nalipa angu ateyapa-ko. Nimba epolane asia mindi yando, Timoti nimba wamba ini ipupe. Maki balato namba moyo Gotena piape oko piyane-ko. Nimbato bala lamialu, atu ipulupape. * 2Ko 8:23; Ap 15:37-39; Kol 4:14
13 Wamba namba Totasa tano oko tepa alu epewa-angi, nambana umbaininga pulane sakesa luu mindi buku minditupa towa akali Kapusa okona andaka yakale epewaepia-ko. Nimba epole-angi, utupane pitaka mo awua ipu-gipe. Buku sipisipi umbaini-mane waa-pene tupa yakale embesa olene. Mo awua ipu-gipe. * Ap 20:6
Akali Andane Okomane Namba Molo-peke Lolopeya Leane Oko
14-15 Kopapi, batasapi, aenepi, okonetaka-mane minditaka waa piyane akali Aleke-sandato Gotena pii nanimato lalamane oko laa napene kondalapa loto, kenda-pene kambua namba geane. Aleke-sandato mana koo minia okonena, matili Akali Andane okomane paini yole koo mindi bala malupeya. Akali koo okonemane kenda-pene mindi nimba gulane. Waiwa ando atape. * 1Ti 1:18-20; Sam 62:12; Lom 2:6
16 Wamba gapomane wenonga wandakali-mane namba kosimi leai-angi, akali mindikipi mindimane namba moyo ata napeai. Jia. Wandakali pitaka-mane namba awua tepa alu, peai-kola, nambato pote loto, Gote nimbato akali utupane-mane mana koo mineaini okone nembo natape lewa. 17 Nambato Gotena pii oko wandakali yame waka tupa lamalu-wakola, wandakali pitaka-mane pii okone ale yiake leakale nembo toto, Akali Andane oko bala namba towa atu atoto, namba minu tai laya yane. Alu mindi pusi kapua andane wete gene layone lene tupamane namba neai-yale tekeko, Akali Andane okomane namba molo-peke leane.
18 Wuane pua teke, matili wandakali-mane namba kenda-pene gulai-angi, Akali Andane okomane namba molo-peke lolopeya. Dee, namba omolowa-angi, balato namba ati kenga balana yuu epene okona atama ipu lolopeya. Matili-matilipi nanimato balana gene oko laiyu lamakale. Enene.
Pii Lokoyo Pua Leane Tupa
19 Nambato wanda Pitisilapi, akali Akuwilapi, Onesi-potasa okona yame tupapi, utupane ando kuai lo atalapape leyo oko nimbato utupane lamai-gipe. * Ap 18:2; 2Ti 1:16-17 20 Akali Etasatusa bala namba towa atu naepene, Kotini tano okona atea. Akali Topimasa bala siki pelea andala, nambato bala Mailitasa tano okona ateakale lo tepa alu epewane. * Ap 19:21-22; 20:4; Lom 16:23
21 Nimba wamba ini epolane asia mindi yando, pipiya peyoto, aisa andane epalane ana oko naepola-kola, nimba wamba ini ipupe. Akali Yupulusapi, Putenesapi, Lainasapi, wanda Kolotiyapi, dee Kitisene wandakali waka tupapi, utupane pitaka-mane nimba kuai lo atape leyai. 22 Akali Andane oko bala nimbana tandini oko towa atu atoto, yakama pitaka ondowa moyo ateakale lo pote leyo.

*4:3: 1Ti 4:1-2

*4:6: Pl 2:17

*4:7: 1Ti 6:12

*4:8: 1Ko 9:24-25

*4:9-12: 2Ko 8:23; Ap 15:37-39; Kol 4:14

*4:13: Ap 20:6

*4:14-15: 1Ti 1:18-20; Sam 62:12; Lom 2:6

*4:19: Ap 18:2; 2Ti 1:16-17

*4:20: Ap 19:21-22; 20:4; Lom 16:23