1 Jona bala pisa andane wetete okona ini anda pangosa paluto, balana Gote Akali Andane okone-lo pote leae-pia: 2-3 Akali Andane nambanga kendapene ipupia-kola nimba ee lawuako, nimbato yano peyapi. Namba wandakali omene atalaini yuu okona atoto, nimbato namba moyola-lo ai lawua-kola, nimbato nambana ai lawuako alewato yano peyapi. Nimbato solewatanga namba awua aindaka lapi-kola solewata mane namba ombo atane pango nenanga wete ateyo. 4 Nimbato namba wato apipini-yalo lawua tekeko, nambato nimbana lotu anda andane ateya oko andolo peke lokaleya.

5 Solewata ika loto, namba yame peya mangua wato namba peyo ome loyale pi-pia. Solewata okona tani kamalumbi ateane tupamane nambana kawanenga epoto, yame peyo ombo apiya. 6 Solewata kundu pango nenanga wete okona namba andi lapia-kola, solewata mandaka ati peleya tupana pini tupamane namba andi latane atauwa tekeko, nambana Gote, nimbato namba molo peke lapi. 7 Namba omape-pene guu-lo yoto nambato Gote nimba nembo tolo-peke loto, pote lawuako nimbana lotu anda andane okona atoto, ale apini yaa.

8 Owato gote tupamane katulo wandakali tupa moya napiyaini tekeko, wandakali minditupa-mane utupane-lo lotu lalaini. Gote-to owato gote lotu lalaini wandakali utupane ondo wato, moyapia-yale tekeko, utupane-mane balana ondo ene oko masia mayiaini. 9 Gote nimbato angu nanima molo peke lalene. Tene okonena nambato wee-tomo tupa loto, opa nimba giyu, nimbana gene oko layu lokale. Minditaka pukale-lo nimba towa potomisa lawua tupa pukale leae-pia. 10 Jona-to wuane lea-kola, Gote-to ale wato, pisa andane wetete okomane Jona miangu-tangu, solewata ayatenenga aikamaka leakale lea-kola pisa okone mane Jona miangu-tangu aikamaka leae-pia.