21
Kiŋi Tupamane Palaini Pua Jisasa Bala Jutusaleme Peane Oko
Maki 11:1-11; Luku 19:28-40; Jone 12:12-19
1-5 Wamba potopesa akali mindimane pii mindi loto, yakamato Sayone tano okona tane tupa lamawuato, yakamana kiŋi oko bala akali gene nayene gulo atoto, bala yia dongi mindina masianenga pitiyu epeya. Bala dongi talua okona masianenga pitiyu epeya oko andalapa lo lamai-yapape leaipia. Potopesa akali okonemane pii leane okone enene guleakale nembo toto, Jisasa balana disaipolo tupa towa Jutusaleme poyale Olipi wangiane okona puu iyu loto, Betepasi tano okona peakaiyu leai-angi, balato balana disaipolo lapo akali lamawuato, liyamba tano aŋako amo eya okona pulupa lea. Poto andolapi-kola, dongi mindi balana andopane oko towa atu andi latane atolapinga liyambato wamba kapoyale andolo-peyapi. Liyambato dongi okone-lapona ende tita lolapi-angi, akali mindimane liyamba tipa puato, anu peakale liyambato wuane peyapipe leando, liyambato bala lamawuato, Akali Andane okomane dongi mindina pituto, mangene mindi pukale nembo teya lalapape. Wuane lolapi-kola, akali okonemane dongi okonelapo wamba ini atu pulupa lolopeya. Wuane lola-kola, liyambato okonelapo atu namba ateyonga ipulupape. Jisasato wuane lea. *Sak 9:9
6 Wuane lea-kola, disaipolo okonelapo-mane poto, balato piyapape leane pua peapilipia. 7 Liyambato dongi angini, andopane-la, okonelapo atu epoto, Jisasa dongi talua okonena masianenga peteakale nembo toto, akali okonelapo-mane liyambana tona luu kenga peapili okolapo yokoto, dongi okonena masianenga yata yapili. Yata yapi-kola, Jisasa bala dongi okona masianenga pitiyu, Jutusaleme poyale pea.
8 Bala Jutusaleme poyale pea-angi, wandakali kambua longo-mane yakamana tona luu kenga peaini tupa yokoto, Jisasa poyale peane asininga panda pima peai. Dee, wandakali minditupa-mane ita kembone aŋako tupa yando moto, asininga panda pua yatama peai. 9 Wandakali bala poyale peane okona asininga ingane peaini tupapi, bala masianenga watama epeaini tupapi, utupane-mane pii taimane lama poto, yakamato kiŋi Dapiti yumbane oko laiyu lalapa leai. Akali Andane Goteto bala epeakale leya-kola, bala epeya-ko. Goteto bala wayumane moyo ateakalenga, ati kenga wetete ateya Gote okona gene oko laiyu lalapa lama peai. *Sam 118:25-26
10 Wuane lama poto, utupane yakama Jisasa towa atu Jutusaleme peakaiyu leai-kola, Jutusaleme tane wandakali pitakana nembo-tene ika lea-kola, akali epeya oko apipe lo tipa peai. 11 Tipa peai-kola, Jisasa towa atu epeaini wandakali tupamane utupane lamawuato, akali oko bala Galili disitiki tano Nasatesa tane potopesa akali Jisasa oko ateya leai.
Jisasa Bala Lotu Anda Andane Okona Peane Oko
Maki 11:15-19; Luku 19:45-48; Jone 2:13-22
12 Okone angi, Jisasa bala lotu anda andane okona ende anda-pangosa kolandaka loto andea-kola, minditaka makesa yo peteaini wandakali tupapi, minditaka kambo ateaini wandakali tupapi, utupane pitaka peyo watea. Utupane peyo watoto, muni lawa pua peteaini akali tupana tepolo toko tupapi, eka uya salimi lo peteaini akali tupana pitiyaini toko tupapi, utupane kulembo lo apea. 13 Apialu, balato wandakali utupane lamawuato, Gotena pii pepa pelene eya mindimane loto, wandakali-mane nambana anda oko bala pote lo pitulane anda mindi ateya lolopeyai layene eya tekeko, yakamato nambana anda oko pake nene wandakali tupa epo pitiyaini anda mindi gulaya eyai lea. *Ais 56:7; Jet 7:11
14 Wuane lalu, Jisasa bala lotu anda andane okonena atea-kola, wandakali lee koopi, kee koopi, utupane bala ateanga epeai. Epeai-kola, balato utupane mo atu ya. 15 Jisasato metekolo piape andane utupane pea-kola, andopane minditupa lotu anda andane okonena ende anda-pangosa atoto, balana gene oko laiyu loto, Dapitina yumbane oko laiyu lalapa, laka peai. Wuane laka peai-kola, pitisa akali kawane tupapi, loo tupana mana andene akali tupapi, utupane-mane andoto, yataka-mane omeai.
16 Yataka-mane omoto, utupane-mane Jisasa tipa puato, andopane tupamane pii leyai okone nimbato ale naelepe leai. Wuane leai-kola, Jisasato utupane lamawuato, nambato utupanena pii okone ale eyo tekeko, Gotena pii pepa pelene eya mindimane loto, Gote nimbato andopane andanepi, kambolopi, utupane-mane nimbana gene oko laiyu leakale laya alene layene eya lea. Yakamato pii layene okone alu mindikipi mindi wamba dii lo anda napeaipe lea. *Sam 8:2 17 Wuane lalu, balato pitisa akali kawanepi, loo tupana mana andene akalipi, utupane ateakale loto, Jutusaleme tepa alu, Betani tano okona poto, palea.
Yakamato Pote Lolai Pua Goteto Pulupeya Leane Oko
Maki 11:12-14,20-24
18 Upa pitane wete Jisasa bala Jutusaleme peke loyale asini poto, ulia nono ya. 19 Ulia nono wato, balato ita piki mindi asia ayatenenga ateane oko andoto, dini liyape lo andolo mandaka pea-kola, ita okonena dini mindikipi mindi lia napene, yokone angu ateanga andea. Andoto, balato ita piki okone lamawuato, matili-matilipi nimbato dini mindikipi mindi lia napula lea-kola, ita piki okone wamba ini kapoyale okone angi teke kuu lo kapu tea. 20 Kuu lo kapu tea-kola, balana disaipolo tupamane andoto, yakama moko wete loto, anu puato ita piki oko wamba ini andipa teke kapoyale wete kuu lo kapu teyape lo bala tipa peai.
21 Tipa peai-kola, Jisasato utupanena pii okone yano peyoto, nambato pii enene mindi yakama langeyo lea. Yakamato mini lapo palu ata napene, Gote lo bilipi leyama nayu leaindo, nambato ita piki okonga mangene mindi piyo okopene yakamatopi katulo pulupeyai. Dee, yakamato yuu wangiane oo eya oko lamawuato, nimba lopalu poto, ipa solewata angini andane okona tombenenga peaka nena laa leaindo, Goteto yuu wangiane oko lopalu, ipa solewata andane okona tombenenga aindaka lolopeya. *Mt 17:20; Lk 17:6; 1Ko 13:2; Jo 14:12-14 22 Yakamato pote lolai pua Goteto pulupeya lo bilipi leyama nayu loto, Gote nimbato mangene mindi pula lo pote laka peaindo, Goteto mangene utupane pitaka piki pulupeya. Jisasato wuane lea. *Mt 7:7-11; 18:19-20
Piape Utupane Pipe Lo Apito Nimba Langeape Leaini Oko
Maki 11:27-33; Luku 20:1-8
23 Jisasa bala lotu anda andane okonena ende anda-pangosa poto, wandakali tupa mana lamawua atea-kola, pitisa akali kawane tupapi, Juta yame ando atalaini akali tupapi, utupane yakama Jisasa ateanga epeai. Epoto, utupane-mane bala tipa puato, nimbato apina pii wato minuto, wandakali utupa mana lamawua atelepe. Apito nimba languato, piape utupa pipe lapia-kola, nimbato piape utupa pua atelepe leai. 24 Wuane leai-kola, Jisasato utupane lamawuato, nambato pii mindiki yakama tipa peyo lea. Yakamato nambana pii okone kuai lo yano peleaindo, piape utupane pipe lo namba langeane akali okona gene oko langukale.
25-26 Wamba Goteto Jone lamawuato, nimbato wandakali tupa ipa peya-maipe lea-kola, balato wandakali tupa ipa peya-mauwa ateape. Pee, wandakali-mane bala lamawuato, ipa peya-maipe leai-kola, balato wuane peape lea. Wuane lea-kola, akali utupane yakama teke-teke pii lalawa puato, wandakali pitaka-mane Jone bala potopesa akali mindi ateane nembo talaini-ko. Nanimato Jisasana pii okone yano peyoto, wandakali-mane Jone lamawuato, nimbato wandakali tupa ipa peya-maipe leai-kola, balato wandakali tupa ipa peya-mawua ateane lemando, wandakali pitaka-mane nanima towa yataka olopeyai lo yuku eyama. Wuane tekeko, nanimato balana pii okone yano peyoto, Goteto Jone lamawuato, nimbato wandakali tupa ipa peya-maipe lea-kola, balato wandakali tupa ipa peya-mawua ateane lemando, Jisasato nanima tipa puato, wuane yando, anu peakale yakamato Jonena pii oko bilipi naleaipe lolopeya leai. *Mt 14:3-5
27 Wuane lo yakama teke-teke pii lalawa piyu, utupane-mane Jisasana pii okone yano peyoto, nanima nembo nateyama leai. Wuane leai-kola, balato utupane lamawuato, wuane yando, piape utupa pipe lo namba langeane akali okona gene oko nambato yakama langi napukale teke lea.
Iwanane Lapona Pii Kokoli Oko
28-30 Jisasato pitisa akali kawane tupapi, Isatale tanena akali kawane waka tupapi, utupane pii mindi tako pua lamawuato, wamba akali mindina iwana lapo ateapele lea. Balato balana iwanane mindi ateanga poto, iwana, andipa nimbato getepe ee okona piape pulu puu leaipia. Wuane lea-kola, iwana okonemane balana ayiane lamawuato, akali andane, nambato piape pulu pokale leane tekeko, bala puu napene, konda yaepia. Balato piape pulu napea-kola, ayiane okomane balana iwanane mindoko ateanga poto, iwana, nimbato getepe ee okona piape pulu puu leaipia. Wuane lea-kola, iwanane okonemane balana ayiane lamawuato, nambato piape okone pulu napokale leane tekeko, matili balana nembo lawa piyu, piape pulu peaipia.
31-32 Iwanane okone-lapona andoko-mane ayiane-mane nembo teane pua peaipiape. Yakamato aki nembo teyaipe. Jisasato akali utupane tipa puato, wuane lea-kola, utupane-mane bala lamawuato, iwana piape pulu peane okomane bala ayiane okomane nembo teane pua peaipia leai. Wuane leai-kola, Jisasato utupane lamawuato, nambato pii enene mindi yakama langeyo lea. Wamba Joneto mana tika-pene tupa yakama langulu epea-kola, yakamato pii balato leane tupa bilipi naleaini tekeko, takisa muni mialaini akalipi, pamuku wandapi, utupane-mane Jonena pii leane oko ale wato, bilipi leai. Utupane-mane bilipi leaini okone andoto, Pitisa akali kawanepi, Isatale tanena akali kawanepi, yakamato yamapane lawa puato, pii balato leane tupa bilipi naleai. Tene okonena, takisa muni mialaini akalipi, pamuku wandapi, utupane-mane Gotena yuu epene okona makale nembo toto, yakama sia minuto, Gote nimbato nanima moyo ando atape ini kapoyale lalaini. Jisasato wuane lea. *Lk 3:12; 7:29-30
Getepe Ee Ando Ateaini Akali Koo Tupana Pii Kokoli Oko
Maki 12:1-12; Luku 20:9-19
33 Wuane lalu, Jisasato pitisa akali kawane tupapi, Isatale tanena akali kawane tupapi, utupane pii mindi tako pua lamawuato, yakamato pii kokoli waka mindi ale alapa lea. Yuu anduane mindimane getepe ee mindi yandoto, ende pua wata aindaka leaipia. Wuane piyu, matili dini tupana ipane penge lo mokale nembo toto, balato ana andane mindi kua peaipia. Kua piyu, akali mindimane ee okone ando ateakale loto, balato anda kenga luu wete mindi peaipia. Wuane piyu, balato akali minditupa lamawuato, yakamato nambana ee oko ando atalapape lalu, bala yuu tepanda waka mindinga poto ateaipia. *Ais 5:1-2
34 Matili getepe dini tupa mandulane oto oko epea-angi, ee anduane okomane balana piape akali minditupa lamawuato, nambana getepe ee ando atalaini akali tupamane getepe dini minditupa yo geakalenga, yakamato molo pulupa leaipia. 35 Balato wuane leane tekeko, ee ando atalaini akali tupamane balana piape akali utupane minuto, mindi kunju-mane peyalu, mindi peyo ome lalu, mindi ana-mane peyalu, peainipia.
36 Wamba ee anduane okomane piape akali aŋalapo angu pulupa lea-kola, balana ee ando atalaini akali utupane-mane akali utupane minu koyainipia. Tene okonena, ee anduane okomane balana piape akali kambua tako pua lamawuato, akali utupane-mane getepe dini minditupa yo geakalenga, yakamato molo pulupa leane tekeko, balana ee ando atalaini akali utupane-mane wamba peaini pua teke puato, balana piape akali utupane minu koyaini tekepia.
37 Wuane peai-kola, matili ee anduane okomane pii mindi loto, nambana ee ando atalaini akali utupane-mane nambana iwanane okona pii ale olopeyai lea. Wuane loto, balato balana iwanane oko lamawuato, akali utupane-mane getepe dindi minditupa yo geakalenga, nimbato molo puu leaipia. 38 Balato wuane leane tekeko, balana ee ando atalaini akali utupane-mane balana iwanane oko epeanga andoto, yakama teke-teke pii lalawa puato, matili iwana epeya okomane bala ayiane okona minditaka eya tupa pitaka paluni tane molopeya-ko. Nanimato bala peyo ome lalu, ee oko nanima wetete mia-makale leainipia. *Mt 27:16-19 39 Wuane lalu, utupane-mane bala minata wato, ee okonena ende kamaka awua poto, bala peyo ome leainipia. *Ip 13:12
40 Pii kokoli okone lalu, Jisasato pitisa akali kawane tupapi, Isatale tanena akali kawane waka tupapi, utupane tipa puato, balana ee ando atalaini akali utupane-mane wuane peaini okonena, matili ee anduane oko epola-angi, balato akali utupane towa anu pulu-peyape lea. 41 Wuane lea-kola, utupane-mane bala lamawuato, balato akali koo utupane tandaka andane mawuato, peyo ome lalu, akali waka minditupa-mane balana getepe ee okone ando ateakale lolopeya. Wuane lola-kola, getepe dini mandulane oto oko epola-angi, akali utupane-mane getepe dini tupa yoto, minditupa bala malupeyai leai.
42 Wuane leai-kola, Jisasato utupane lamawuato, Gotena pii pepa pelene eya mindimane loto, anda piyaini akali tupamane anda mindi puato, ita mindi andoto, oko koo ya loto, mo apeaini mindiki okone teke, Goteto moto, anda okonena pingina gulaya yane. Nanimato andeyama-kola, Gotena mana okone kuai-lene wete eya andeyama layene eya. Yakamato Gotena pii layene okone wamba alu mindikipi mindi dii lo anda napeaipe. *Sam 118:22-23; Lom 9:32-33; 1Pi 2:6-8 43 Piape akali utupane-mane piape kopeta peaini pua teke, yakamato Gotena piape oko kuai lo ando ata na-piyaini. Tene okonena, yakamato balana ee oko ando atalapale lo balato ando konda napulu-peya. Jia. Wandakali yame waka mindimane balana ee oko ando ateakale lo maula-kola, utupane-mane balana ee okona dini tupa yoto, bala maulupeya.
44 [Wandakali mindi aiya peyoto, anda pingina okona tokonga lomba-pene yando, wandakali okone bala tele lo toko lolopeya tekeko, anda pingina okone tepa wato, wandakali mindi peyo tele lola-kola, wandakali okone bala yuu kangalamu gulolo-peya lea].
45 Jisasato wuane lea-kola, pitisa akali kawane tupapi, Patasai tupapi, utupane-mane ale wato, balato pii kokoli utupane nanima andayo leya nembo teai. 46 Wuane nembo toto, utupane-mane bala andi laima lakae lo nembo teaini tekeko, wandakali kambua ateaini tupamane Jisasa bala potopesa akali mindi ateya nembo teai-kola, Juta yamena akali kawane tupamane bala andi loyale yuku wato, konda yai.