1 Matili nambato andewa-kola, enjole waka mindi ati kenga atoto, yuunga epea. Balanga tai-lene andane wete ya-kola, balana tii-pene okomane yuu pitakana tii pikoyo pea.

2-3 Balato pii taimane wete loto, wamba Bapilone tano andane okona tane wandakali tupamane minditaka kambua wetete tupa kambo yatawa ataima lakae lo nembo teai lea. Wuane nembo teai-kola, bisanisa piape piyaini wandakali minditupa yuu waka tupana atoto, pinju kambua mandu epoto, muni kambua wetete meai. Dee, Bapilone tane wandakali tupamane pamuku pua ateai-kola, yuu tupa pitakana wandakali yame palu peya tupana minditupa-mane utupane towa pamuku pua atoto, Bapilone tane tupana bia ipa tai tupa no atene ateai. Yuu tupa pitakana kiŋi tupamanepi, Bapilone tano andane okone towa pamuku pua atene ateaini teke. Tene okonena, Goteto yataka wato, tano andane okone minu koyane oko koyatane eya. Enene, wetete koyatane eya. Tano okone koyalu, ukuna ateya-kola, andipa eka koo embo-pene yame waka-waka tupa pitakapi, Satanena sipitisa koo yame waka-waka tupa pitakapi, utupane angu tano okonena epo ateyai. Enjole okonemane wuane lea. *Lap 14:8; Ais 13:21; 34:11-14; Jet 50:39

4-5 Enjole okonemane wuane lea-angi, nambato ale ewa-kola, mindimane ati kenga atoto, pii mindi leane oko loto, Bapilone tane wandakali tupamane mana koo kambua wetete minu atalaini lea. Wandakali utupanena mana koo utupane yomo atane atama poto, ati kenga giau latane ateya-kola, Goteto wandakali utupanena mana koo utupane nembo tatawa ateya. Wandakali utupane-mane mana koo mindi minulai-angi, nambana wandakali yakamato wandakali utupane towa atu atoto, mana koo okone mineaindo, matili Goteto yole koo mindi wandakali utupane maula-angi, yakamatopi yole koo okone molopeyai. Nambana wandakali yakamato wuane pulumane nembo toto, Bapilone tepa alu, ipulupape. *Ais 48:20; Jet 50:8; 51:6,9,45; 2Ko 6:17; Jen 18:20-21

6 Pamuku wanda okonemane yakama minu koyane, wuane pua teke yakamatopi bala minu koyalapape. Balato kenda-pene mindiki-mindiki lo oko-tuma yakama geane nembo toto, yakamato paini yano peyoto, kenda-pene lapo-lapo lo bala maiyapape. Balato ipa koo wete mindi kapo mindikina pete loto, yakama nalapale loto geane nembo toto, yakamato ipa koo tai-lene wete kapo laponga pete loto, lapotaka bala neakale maiyapape. *Sam 137:8; Jet 50:15,29; 2Tes 1:5-7

7 Pamuku wanda okonemane mana koo mindi wato minuto, bala tane angu nembo toto, minditaka kambua wete moto, bala tanena gene oko laiyu loto, namba wanda yalo mindi piti napeyo. Jia. Namba wanda kuwini peteyo okonena, namba yamapane mo kenda piya alane mindi ando mia napulu-peyo lalane. Balato bala tanena gene oko laiyu loto, wuane lalane nembo toto, yakamato tandaka okone-tuma teke bala mawuato, mo ai andane wete laya alapape. *Ais 47:7-9

8 Bapilone tano andane yapa lo tale pulane Akali Andane Gote oko bala tai-lene wetete ateya okomane kenda-pene kambua tano okonenga malupeya. Ulia nono andanepi, siki waka-waka tupapi, utupane epola-kola, wandakali minditupa omolo-peyai. Dee, yanda-pene akali tupamane Bapilone tano okone yango apolopeyai teke. Kenda-pene utupane pitaka oto mindiki okone angi teke Bapilone tane wandakali utupanenga epola-kola, utupane-mane ai lo atolopeyai. *Lap 17:13-18

9 Wamba yuu tupa pitakana kiŋi tupa tano okonena poto, tano okonena minditaka kambua yane tupa epele wato, tano okonena tane wandakali tupa towa pamuku pua ateaini. Wuaneko, matili tano okone tola okona ita tua pula oko andoto, kiŋi utupane-mane ai lo yamataka lolopeyai. *Ese 26:17; 27:30-35 10 Bapilone tola-angi, tano okonena tane wandakali tupamane tandaka andane wete nolai-kola, kiŋi utupane yakama yuku wato, tano okonena mandaka napolo-peyai. Jia. Utupane yakama tepanda amonga waka mindinga atoto, pii mindi leaini oko loto, yali, ae, Bapilone, wamba nimba tano andane tai-lene wete mindi yee tekeko, Goteto nimba yapa lo tale puato, yole koo mindi nimba giya-kola, wane awa angu pala-kola, nimba koyale. Tene okonena, nanimato nimba ondo wete eyama lolopeyai.

11 Dee, Bapilone tola-angi, tano okonena tane wandakali tupamane yuu waka tupana bisanisa piape piyaini wandakali tupana pinju tupa kamba napulu-peyai nembo toto, yuu waka tupana bisanisa piape piyaini wandakali utupane-mane yamapane kenda wato, ai lolopeyai. *Ese 27:36

12 Wamba Bapilone tane wandakali tupamane bisanisa piape piyaini wandakali utupanena golopi, silipapi, ana epene wete muni kambua-mane kambenepi, mamakupi, utupane pitaka kambaka piki pua ateai. Dee, Bapilone tane tupamane lapalapa epene wete ake-penepi, tundupa-pene waka-wakapi, lemba-lemba penepi, utupane kambeai. Dee, wamba wandakali-mane ita tunduma-pene yame waka-waka tupa pitakapi, ita muni kambua-mane kambenepi, yia elepenena nenepi, aenepi, batasapi, ana yati penepi, okonetaka minditupa moto, minditaka tupa waa peai-kola, Bapilone tane tupamane okonetaka tupa pitaka kambeai. *Ese 27:12,13,22

13 Wamba utupane-mane tomo mo tende piyalane sinamonepi, wele tunduma-pene waka-waka tupapi, ita tua tunduma peakale lo minditaka yangalaini tupapi, dee ipa waenepi, olipi ipanepi, palawa epenepi, witi dinipi, utupane kambeai. Dee, utupane-mane yia osapi, yia osa-mane kilau lo auwa palaini wandakali pitulane katesa tupapi, bulumakaopi, sipisipipi, utupane pitaka kambeai. Utupane-mane katapusa piape piyaini selepe wandakali tupa kambeai-kola, wandakali utupanena tandini tupa kambene ateaini teke.

14-15 Wamba Bapilone tane wandakali tupamane okonetaka tupa kambua wete kambeai-kola, yuu waka tane bisanisa piape piyaini wandakali tupamane muni kambua wete moto, amango guleai. Matili Bapilone tano okone tola-angi, tano okonena tane wandakali tupamane tandaka andane wete nolai-kola, yuu waka tane bisanisa piape piyaini wandakali utupane yakama yuku wato, Bapilone okona mandaka puu napene, amonga tepanda waka mindinga atoto, yamapane kenda wato, ai lo atolopeyai. Ai lo atoto, utupane-mane Bapilone tane wandakali tupa lamawuato, yakamana yati epene tupapi, minditaka epene wete tupapi, minditaka waka-waka muni andane-mane kambene tupapi, utupane pitaka tala lolopeyai. Tala-kola, yakamato utupane dee lapone anda napulu-peyai. Enene, wamba yakamato minditaka utupane miauwa lakae lo nembo toto, kambo yatawa ateaini tekeko, andipa utupane pitaka tokoyo piya-kola, yakamanga naeya. *Ese 27:31,36

16-17 Wamba Bapilone tane wandakali tupamane tona epene wete ake-penepi, tundupa-pene yame lapopi, utupane puato, golopi, ana epene muni andane-mane kambenepi, mamaku yale mumbipi, okonetaka tupamane yakamana umbaini tupa yati pitane ateai. Yali, ae, andipa wane awa angu pala-kola, yakamana minditaka kambua wete muni andane-mane kambene tupa pitaka koyala. Tene okonena, nanimato Bapilone tano andane okona tane wandakali tupa ondo wete eyama lolopeyai. Dee, tano oko tola-angi, sipi ando atalaini akali tupapi, sipi tupana piape piyaini akali tupapi, sipinga pitiyu yuu waka tupana palaini wandakali tupapi, sipinga pitiyu yuu waka tupana poto bisanisa piape piyaini wandakali tupapi, wandakali utupane yakama Bapilone tano okona mandaka puu napene kondalu, tepanda amonga waka mindinga atolopeyai. *Lap 17:4; Ais 23:14; Ese 27:27-29

18 Tano okone tola-kola, utupane-mane sia tua andoto, tano andane okonepene tano andoko eyape lolopeyai. *Ese 27:32 19 Bapilone tane wandakali tupamane minditaka kambua kambamakale loto, muni kambua yatawa ateai-kola, sipi yalaini akali tupamane pinju kambua tano okonena mandu poto, yakamana muni kambua mialu, amango guleai-ko. Yali, ae, andipa awa mindiki angu pala-kola, tano andane oko koyapia okonena, nanimato ondo wete eyama lolopeyai. Wuane loto, utupane-mane yamapane kenda wato, yuu yeyau puato, ai lo atolopeyai.

20 Wamba Bapilone tane wandakali utupane-mane Gotena wandakalipi, potopesa akalipi, utupane minu koyoto, kenda-pene minditupa maiki pua ateaini okonena, Goteto Bapilone tane wandakali utupane yapa lo tale puato, kenda-pene utupane maipia. Tene okonena, yakamapi, ati kenga atalaini tupapi, yakama pitaka-mane epele alapape. Enjole okonemane wuane lea. *Ais 44:23; Lo 32:43; Jet 51:48

21-24 Wuane lea-kola, matili enjole tai-lene mindimane ana andane wetete mindi minaiyu loto, ipa solewata okona taimane peya amo loto, Bapilone tane wandakali tupa lamawuato, wua lea: Wamba yakamato posini pua atoto, yuu yoo peya tupa pitakana wandakali tupa minakasa yai. Wuane puato, yakamana bisanisa piape piyaini wandakali tupamane yuu waka tane wandakali tupa pitaka sia minuto, gene andane yene ateai. Dee, yakamato potopesa akali tupapi, Gotena wandakali tupapi, utupanena minditupa peyo ome laka piki pua ateai okonena, koo tene mindi yakamanga eya. Yuu waka tupa pitakana wandakali minditupa-mane wandakali minditupa peyo ome leaini okonena, koo tene okone Bapilone tane wandakali yakamanga eya teke. Tene okonena, nambato wua leyo. Nambato ana andane oko ipa solewata okona taimane peya amo lalo-kola, latako piya. Wuane pua teke, matili Goteto Bapilone tano andane oko taimane peya amo lola-kola, tano okona wandakali atalaini tupa latako pulupeyai. Wuaneko, matili-matilipi gitapi, pupepi, biakulupi, musikipi, utupanena mindi peyolane wandakali mindi tano okonena ata napulai-kola, mindimane musiki ale na-olopeya. Minditaka waa piyaini wandakali mindi ata napulu-peya teke. Dee, witi dini minu kokope lolane wandakali mindi ata napula-kola, witi dini minu kokope lalane ana oko gili galo laa napulu-peya teke. Wanda kee lolane akalipi, akali polane wandapi, okonelapo tano okonena pii lo ata napulu-peyapi teke. Wandakali mindikipi mindi tano okonena ata napulai-kola, tano okonena lamu mindikipi mindi taa napulu-peya. Enjole okonemane wuane lea. *Jet 7:34; 16:9; 25:10; 51:49,63-64; Ese 26:13,21; Ais 24:8; Lap 17:6