1 Lau sêŋô ŋawae gebe biŋ mockaiŋoŋa gêc amacŋa. Biŋ mockaiŋoŋa tau kaiŋ teŋ kêtôm lau samuc sêgôm atom. Ŋac teŋ gêjam tamanê awê. 2 Biŋ tonaŋ gêc, mago amac aboa taôm amoa me. Amoa tonêm ŋalêlôm ŋawapacgeŋmaŋ, ec atiŋ ŋac, taŋ gêgôm gêŋ tonaŋ naŋ, su aŋga amac ŋalêlôm.

3 Aê tec gamoa jaêc amac, mago ŋoc ŋalau gêmoa gêwiŋ amac tec kêmêtôc ŋac, taŋ gêgôm gêŋ tau naŋ, nê biŋ su amboac gamoa gawiŋ amac. 4 Amac embe akac sa anam aêacnêŋ Apômtau Jesu laŋô, naŋ ŋoc ŋalau to aêacnêŋ Apômtau Jesu nê ŋaclai wacêwiŋ amac, 5 ma akêŋ ŋac tau êsêp Sadaŋ lêma gebe enseŋ eŋ ôli, ec êndêŋ Apômtaunê bêc Anôtô ênam ênê ŋalau kêsi. 6 Amac waem ŋajam atom. Jist ŋagec kêtôm gebe ênam polom samucgeŋ auc. Biŋ tonaŋ amac ajala me masi. 7 Amac atu polom ŋaluc sugac. Amboac tonaŋ andec jist laŋgwa ênêcŋa gebe atu polom wakuc, gebe sêbuc aêacnêŋ domba Pasaŋa su. Domba Pasaŋa tau Kilisi. 8 Amboac tonaŋ talic nêŋ om tojist laŋgwa atom. Jist laŋgwa tau sec to geo. Talic topolom ŋalucgeŋ. Polom ŋaluc ŋam gebe talic toŋalêlôm ŋawa ma tobiŋŋanôgeŋ.

9 Aê kato gêdêŋ amac kêsêp papia teŋ su gebe Anac jaê lau mockaiŋŋa. 10 Aê taêc gêjam gebe êŋgamiŋ taôm êndêŋ nom tonec ŋalau mockaiŋŋa tapaôŋgeŋ nec atom me aŋgamiŋ taôm êndêŋ lau mateŋ katu gêŋŋa me kêjaŋgowaga me lau, taŋ sêjam sakiŋ gwam naŋ, atom amboac tonaŋ. Embe taêm ênam gebe aŋgamiŋ taôm êndêŋ lau samob amboac tonaŋ, naŋ awi nom siŋ acgom, go êtôm. 11 Aê kato gêdêŋ amac gebe ŋac, taŋ êsam tau gebe amac lasimi eŋ naŋ, embe eŋ ŋac mockaiŋŋa me ŋac mata katu gêŋŋa me ênam sakiŋ gwam me êsôm biŋ alôb-alôb me ênôm gêŋ anaboa me êjaŋgo gêŋboa, naŋ anac jaê eŋ ma aniŋ gêŋ aŋgôŋ awiŋ eŋ atom. 12 Amboac ondoc, aê jamêtôc lau, taŋ sêmoa môkêŋ samuc me. Masi. Amac amêtôc êsêac, taŋ sêmoa gôlôac ŋalêlôm naŋ. 13 Lau taŋ sêmoa môkêŋ samuc naŋ, Anôtô oc êmêtôc êsêac, ma amac atiŋ ŋac sec aŋga amacnêm êsa êna. *Asam biŋ jist‘a, taŋ gêc Mat 13:33. Mago Judawaga embe sêpac nêŋ polom Pasaŋa, go sêkêŋ jist êsêp êwiŋ atom. Êsêac sêkasiŋ nêŋ laclu samob ŋawasi kêsa gebe jist ŋagec êsap laclu tau tôŋ atomanô. Tec Paulu gêjam dôŋ lau buŋa kêpi polom Pasaŋa tau tonaŋ.