1 Go Israelnêŋ gôlôacmôkê samob sêô lasê gadêŋ Dawid aŋga Hebron ma sêsôm gêdêŋ eŋ gebe “Aêacma ŋatê ŋagêdô aôm. 2 Gêmuŋŋa gêdêŋ taŋ Saul kêtu kiŋ naŋ, aôm gôwê lau Israel kêtu siŋŋa sêja ma kôkôc êsêac sêmu sêmêŋ kêtiam. Ma Apômtau kêsôm gêdêŋ aôm gebe ‘Aôm oc ôtu aêŋoc lau Israelnêŋ gejobwaga ma ôtu êsêacnêŋ gôliŋwaga.’ ” 3 Go lau Israelnêŋ kasêga samob sêô lasê gêdêŋ kiŋ aŋga Hebron ma kiŋ Dawid kêmoatiŋ poac gêwiŋ êsêac aŋga Hebron semoa Apômtau laŋônêm, go seŋ oso Dawid kêtu kiŋ Israelŋa gêwiŋ. 4 Dawidnê jala kêtu 30 ma kêtu kiŋ. Ma eŋ gêjam gôliŋ êsêac jala 40. 5 Eŋ kêtu kiŋ Judaŋa aŋga Hebron kêtôm jala 7 ma ajôŋ 6 ma aŋga Jerusalem eŋ kêtu Israel to Juda samobnêŋ kiŋ kêtôm jala 33.

6 Kiŋ to nê lausiŋ sêja Jerusalem gebe sênac lau Jebus, taŋ têtu malac ŋatau naŋ. Êsêac sêsôm gedeŋ Dawid gebe “Aôm ôsô tonec ômôêŋ atomanô, lau mateŋpec to puliŋ oc sêkô aôm auc.” Biŋ tonaŋ ŋam gebe Dawid oc êku malac tulu atomanô. 7 Mago Dawid kêku malac totuŋbôm ŋajaŋa tulu, tec sêsam malac tau gebe Dawidnê malac. 8 Gêdêŋ bêc tonaŋ Dawid kêsôm gebe “Ŋac taŋ êsêli êsô gasuc buŋa naênac lau Jebus ma enseŋ lau puliŋ to mateŋpec Dawid gedec ŋanôgeŋ naŋ su, go êtu ŋac ŋamataŋa.” Kêtu tonaŋŋa sêsôm biŋ tonec sêmoa gebe “Mateŋpec to puliŋ oc sêsô Apômtaunê andu atom.” 9 Dawid gêŋgôŋ malac totuŋbôm ŋajaŋa tau ma kêsam gamêŋ tau gebe Dawidnê malac. Eŋ kêkwê malac tau kêgigeŋ gêjam m aŋga Milo ma kêsô gêja. 10 Amboac tonaŋ Dawidnê ŋaclai kêpi ec-kêpi ec gebe Apômtau lausiŋ undambêŋa nêŋ Anôtô gêmoa gêwiŋ eŋ.

11 Lau Tirus nêŋ kiŋ Hiram kêsakiŋ lau jaeŋŋa gêdêŋ Dawid. Eŋ kêsakiŋ kaseda to kamunda ma sêsap-pocwaga ma sêkwê Dawidnê andu. 12 Tec Dawid kêjala gebe Apômtau kêkêŋ eŋ kêtu kiŋ Israelŋa biŋŋanôgeŋ-ma ketoc ênê gôliŋ kiŋŋa sa kêtu ênê lau Israelŋa.

13 Gêdêŋ taŋ Dawid gêwi Hebron siŋ jagêŋgôŋ Jerusalem naŋ, eŋ gêjam lauo ŋagêdô mêŋsêwiŋ, tec sêkôc ênê latuio to ŋac ŋagêdô. 14 Latui taŋ teneŋi sêkôc aŋga Jerusalem naŋ, nêŋ ŋaê tonec Samua agêc Soba ma Natan agêc Salomo 15 ma Ibkar agêc Elisua ma Nepeg agêc Japia 16 ma Elisama agêc Eliada ma Elipelet.

17 Gêdêŋ taŋ lau Pilisti sêŋô gebe seŋ oso Dawid kêtu kiŋ Israelŋa naŋ, lau Pilisti samob sêwê sêpi sêja gebe sêkôc Dawid tôŋ. Mago Dawid gêŋô biŋ tau ŋawae ma kêsêp jagêŋgôŋ malac totuŋbôm ŋajaŋa tau. 18 Lau Pilisti sêô lasê gaboaŋ Repaim ma sêŋgôŋ gamêŋ aucgeŋ. 19 Go Dawid kêtu kênac Apômtau ma kêsôm gebe “Aê oc japi jandêŋ lau Pilisti jana ma aôm ôkêŋ êsêac sêsêp aê lemoc me masi.” Ma Apômtau gêjô eŋ awa gebe “Aec, ôpi ôna, gebe aê oc jakêŋ lau Pilisti sêsêp aôm lêmam biŋŋanôgeŋ.” 20 Amboac tonaŋ Dawid gêô lasê Bal-Perasim ma kêku êsêac tulu aŋga tonaŋ. Go eŋ kêsôm gebe “Apômtau gêjac ŋoc ŋacjo gêmuŋ aê amboac bu kêsap lêndaŋ.” Kêtu tonaŋŋa sêsam gamêŋ tonaŋ gebe Bal-Perasim (Apômtau kêku tulu). 21 Lau Pilisti sêwi nêŋ anôtôi gwam siŋ sêc tonaŋ ma Dawid to nê lau sêkôc sa ma sêc sêja.

22 Go lau Pilisti sêpi jasêô lasê gaboaŋ Repaim kêtiam ma sêŋgôŋ sêjam gamêŋ aucgeŋ. 23 Gêdêŋ taŋ Dawid kêtu kênac Apômtau kêtiam naŋ, Apômtau gêjô eŋ awa gebe “Ôpi ôna atom. Ômbuc ômoa êsêac dêmôêŋmuŋageŋ ma ônac êsêac aŋga gamêŋ, taŋ kêkanôŋ ka môsê kêkô naŋ. 24 Ma embe ôŋô lau sêsêlêŋ ŋakicsêa aŋga ka lôlôcŋa, go ôlêti gebe êndêŋ tonaŋ Apômtau êsêlêŋ êmuŋ aôm gebe ênac Pilisti nêŋ lausiŋ.” 25 Dawid gêgôm kêtôm Apômtau kêjatu eŋ ma gêjac lau Pilisti aŋga Geba e gêdêŋ Geser.