5
Anania agêc Sapira nêŋ biŋ
Ŋac teŋ, nê ŋaê Anania, agêc nê awê Sapira sêkêŋ nêŋ kôm ŋagêdô teŋ lau sêjam ôli. Ŋac tau gêjam ŋaawa ŋagêdô auc, nê awê gêlic, ma kêkôc ŋagêdô jaketoc gêc aposolo eŋkaiŋŋa. Ma Petere kêsôm gebe “Anania, amboac ondoc Sadaŋ gêjam nêm ŋalêlôm auc e kôsau Ŋalau Dabuŋ ma gôjam kôm ŋaawa ŋagêdô auc. Aôm kôkêŋ gêdêŋ lau sêjam ôli atomgeŋ, tec taôm kôtu nêm gêŋ ŋatau. Kôkêŋ gêdêŋ lau sêjam ôli su, tec kôtu ŋaawa ŋatau amboac tonaŋ. Amboac ondoc tec taêm gêjam biŋ amboac tonaŋ gêc nêm ŋalêlôm. Aôm kôsau ŋamalac atom, aôm kôsau Anôtôgoc.” Anania gêŋô biŋ tonaŋ e gêu tau jatomatêgeŋ gêc. Ma lau samob, taŋ sêŋô biŋ tonaŋ ŋawae naŋ, têtêc tauŋ ŋanô. Go lau matac dêdi jasêsabaŋ eŋ ma sêbalaŋ eŋ sêsa awê jasêsuŋ eŋ.
Ockatu ŋasawa amboac têlêac gêjaŋa, ma ŋac tau nê awê gêjam kauc biŋ, taŋ gêgôm nê akweŋ naŋ, tec gêmêŋ. Ma Petere kêtu kênac eŋ gebe “Ôsôm êndêŋ aê acgom gebe Amagêc akôc kôm ŋaôli tau tecenecgeŋ me.” Ma awê tau kêsôm gebe “Aec, gêŋ tau tecenaŋgeŋ.” Tec Petere kêsôm gêdêŋ eŋ gebe “Amboac ondoc amagêcnêm ŋalêlôm kêpi tageŋ abe ansaê Apômtaunê Ŋalau. Ôlic acgom, lau taŋ sêsuŋ nêm akweŋ su naŋ, eŋmata gêdiŋ katam sebe sêmbalaŋ aôm sêsa sêna.” 10 Ma gacgeŋ awê tau kêku e jatomatêgeŋ gêc eŋ akaiŋŋa. Lau matac sêsô sêja e sêlic awê tau tomatêgeŋ gêc, tec sêbalaŋ eŋ jasêsuŋ eŋ gêwiŋ nê akweŋ. 11 Gôlôac dabuŋ pebeŋ têtakê ŋanô e lau ŋagêdô samob, taŋ sêŋô biŋ tau ŋawae naŋ, têtakê amboac tonaŋgeŋ.
Aposolo sêgôm gêŋtalô to gêŋsêga taêsam
12 Aposolo sêgôm gêŋtalô to gêŋsêga taêsam sêmoa lau ŋalêlôm ma lausêkêŋ-gêwiŋwaga samob sêkac tauŋ sa semoa Salomonê lôm sêlêb. 13 Lau ŋagêdô têtêc tauŋ, tec sêsap êsêac tôŋ atom, mago tetoc êsêac sa têtôm apômtau towae. 14 Ma êsêac, taŋ sêkêŋ gêwiŋ Apômtau naŋ, têtu gwalêkiŋ, gebe lauo to ŋac taêsam. 15 Lau tau sejoŋ nêŋ gêmac sêsa malacluŋ sêja jasêkêŋ êsêac sêc mê to sac ma taêŋ kêka gebe Petere embe êsêlêŋ êmêŋ, naŋ katu naênêc ajuŋ ênsac êsêacnêŋ ŋagêdô êwiŋ-êwiŋ. 16 Ma lau taêsam aŋga malac, taŋ gêc Jerusalem ŋagala naŋ, sejoŋ lau gêmac to lau ŋagêdô, taŋ ŋalau ŋatêmui gêgôm êsêac naŋ sêmêŋ, tec aposolo sêgôm êsêac ôliŋ ŋajam kêsa samob.
Sêkôc aposolo tôŋ kêtu dim luagêcŋa
17 Ma ŋac dabuŋsêga to nê lau samob, taŋ aŋga Sadukainêŋ toŋ naŋ, sêjam lêmuŋ aposolo ŋanô 18 e sêkam êsêac tôŋ ma sêkêŋ êsêac sêŋgôŋ andu kapoacwalôŋa. 19 Gêdêŋ gêbêc Apômtaunê aŋela teŋ jagêlêc katam andu kapoacwalôŋa su, go gêwê êsêac sêsa sêja ma kêsôm gebe 20 “Ana anam mêtê lau akô lôm dabuŋ ma asôm biŋ aŋgôŋ matem jaliŋa samob lasê.” 21 Ac sêŋô biŋ tonaŋ, tec bêbêc kanucgeŋ sêsô lôm dabuŋ sêja ma têdôŋ lau.
Go ŋac dabuŋsêga to nê lau sêkac tauŋ sa ma sêkalem laumata to Israelnêŋ lau ŋanô samob sa ma sêkêŋ lau sêja andu kapoacwalôŋa gebe sêkôc aposolo tau sêmêŋ. 22 Tec sakiŋwaga sêja e têtap aposolo sa sêmoa andu kapoacwalôŋa atom, go sêmu sêja ma sêsôm gebe 23 “Aêac aja e alic sêlai andu kapoacwalôŋa auc e paŋ tageŋ to gejobwaga sejop katam sêkô, mago alêc katam su e alic jaôb tageŋ.” 24 Lôm dabuŋ ŋakapitai to lau dabuŋsêga sêŋô biŋ tonaŋ ma taêŋ gêjam jakêsa-jakêsa. 25 Go ŋac teŋ kasôm gedeŋ êsêac gebe “Alic acgom, lau tau, taŋ akeŋ êsêac sêŋgôŋ kapoacwalô naŋ, tê jatedôŋ lau sêkô lôm dabuŋ.” 26 Amboac tonaŋ kapitai gêwiŋ nê sakiŋwaga jasêkôc aposolo. Sêkôc êsêac sêjam saicgeŋ atom, têtêc gebe lau oc têtuc êsêac ŋa poc êndu.
27 Amboac tonaŋ sêwê êsêac sêja laumata sêkac sa ŋamala. Ŋac dabuŋsêga kêtu kênac êsêac gebe 28 “Aêac ajac jao ŋajaŋa gêdêŋ amac gebe andôŋ ŋaê tonaŋ êtiam atom, mago alic acgom, amacnêm mêtê gêjam Jerusalem aucgeŋ. Amac abe aê ŋamalac tônê nê dec êpi aêac me.” 29 Tec Petere to aposolo sêjô êsêac aweŋ gebe “Aêac taŋeŋ wamu Anôtô êlêlêc ŋamalac. 30 Jesu taŋ amac akêŋ eŋ geŋkaleŋ kakesotau jaaseŋ eŋ su naŋ, tec aêac tameŋinêŋ Anôtô gêŋu eŋ sa. 31 Ŋac tau Anôtô ketoc eŋ sa gêŋgôŋ ênê anôŋa, gebe êtu laumata to kêsiwaga ma ênam Israel ôkwi to êsuc êsêacnêŋ sec ôkwi. 32 Biŋ tonaŋ ŋai aêac alic ŋanô, tec awa sa amoa, aêac to Ŋalau Dabuŋ, taŋ Anôtô kêkêŋ gêdêŋ lau taŋeŋ wamu eŋŋa naŋ.”
33 Lau tonaŋ ŋai sêŋô biŋ tonaŋ e gêli nêŋ ŋalêlôm sa secanô sebe sênac aposolo endu. 34 Go laumatanêŋ teŋ gêdi sa, eŋ Parisai teŋ, nê ŋaê Gamaliel. Eŋ kêdôŋwaga biŋsuŋa teŋ ma lau samob tetoc eŋ sa. Eŋ kêjatu gebe sejoŋ aposolo sêsa awê sauŋgeŋ. 35 Go kêsôm gêdêŋ laumata gebe “Amac lau Israelwaga, alic taôm ŋapep, aŋgôm lau tonaŋ amboac secgeŋmaŋ. 36 Gêdêŋ ŋasawa teŋ Teuda ketoc tau sa gebe êtu ŋac towae ma lau 400 sêsap eŋ tôŋ. Tec sêjac eŋ endu, ma lau, taŋ sêsap eŋ tôŋ naŋ, sêjanda êsêac samob sêc êliŋêliŋgeŋ e nêŋ kôm gê su. 37 Tonaŋ su, go gêdêŋ bêc, taŋ sêsa lau saŋa naŋ, ŋac Galilaiaŋa Juda gêdi ma kêlêtôm lau e taêsam sêsap eŋ tôŋ. Sêmoa e ŋac tau gêjaŋa ma seseŋ êsêac, taŋ sêsap eŋ tôŋ naŋ, samob êliŋ-êliŋ. 38 Ma galoc jasôm ŋoc ŋalêlôm êndêŋ amac gebe Awi lau tônê siŋ ma akêŋ êsêac sêc sêna. Gêŋ amboac tônê embe ŋamalac tauŋ taêŋ ênam me sêŋgôm, oc êtu goloŋ. 39 Ma embe aŋga Anôtônê, oc anseŋ su atôm atom. Ajop tageŋ tonec, anseŋ Anôtô atom.”
40 Lau tau sêkêŋ gêwiŋ Gamalielnê biŋ, go sêmôêc aposolo jasi êsêac ŋa palipgeŋ ma sêjac biŋsu êsêac gebe sênam mêtê êpi Jesunê ŋaê êtiam atom. Go sêkêŋ êsêac sêsa sêja. 41 Lau tau sêwi laumata siŋ sêsa sêja totêntac ŋajamgeŋ, gebe Anôtô ketoc êsêac sa ma gêlic êsêac têtôm gebe lau sêgôm êsêac majeŋ kêsa kêtu Jesunê ŋaêŋa. 42 Êsêac têdôŋ lau aŋga lôm dabuŋ to andu kêtôm bêcgeŋ ma sêsôm ŋawae ŋajam lasê gebe Jesu eŋ Kilisi, sêwi siŋ atom.