1 Mago Apômtau kêsôm gêdêŋ Mose gebe “Galoc aôm oc ôlic gêŋ, taŋ aê gabe jaŋgôm êndêŋ Parao naŋ. Eŋ oc êkac êsêac toŋaclaigeŋ gebe sêwi gamêŋ siŋ, ma êjanda êsêac toŋaclaigeŋ gebe sêwi ênê gamêŋ siŋ.”

2 Ma Anôtô kêsôm gêdêŋ Mose gebe “Aê Apômtau. 3 Aê gaoc tauc lasê gêdêŋ Abraham agêc Isak ma Jakob gebe Ŋaniniŋ Ŋatau aê, mago aê kawaka tauc sa gêdêŋ êsêac ŋa ŋoc ŋaê Aê-Gamoa-Amboac-Gamoa nec atom. 4 Aê kamoatiŋ poac gêdêŋ êsêac gebe jakêŋ gamêŋ Kanaan êndêŋ êsêac. Gamêŋ tau, taŋ êsêac sêmoa têtôm lau jabageŋ naŋ. 5 Ma aê gaŋô lau Israel, taŋ lau Aiguptu sêlêsu êsêac ŋa kôm ŋawapac naŋ, nêŋ taŋiboa ma taêc gêjam ŋoc poac. 6 Kêtu tonaŋŋa ôsôm êndêŋ lau Israel gebe ‘Aê Apômtau tau. Aê gabe jaê amac sa aŋga Aiguptunêŋ kôm ŋawapac, taŋ kêkôniŋ amac naŋ, to jaŋgamboac amac su aŋga êsêacnêŋ sakiŋ gêŋômaŋa ma jamêtôc lemoc gebe janam amac sa to jaŋgôm gêŋsêga gebe jamêtôc êsêac. 7 Aê gabe jakôc amac sa atu ŋoc lau ma gabe jatu nêm Anôtô. Amac ajalamaŋ gebe aê Apômtau, amacnêm Anôtô, taŋ gaê amac sa aŋga Aiguptunêŋ kôm ŋawapac. 8 Aê gabe jawê amac aô lasê gamêŋ, taŋ katôc lemoc gebe jakêŋ êndêŋ Abraham agêc Isak ma Jakob. Aê gabe jakêŋ gamêŋ tau êndêŋ amac êtu amacnêm nom. Aê Apômtau oc jaŋgôm.’ ” 9 Mose kêsôm biŋ tonaŋ gêdêŋ lau Israel, mago êsêac sêkêŋ taŋeŋ Mosenê biŋ atom, gebe nêŋ ŋalêlôm popoc ma kôm tau ŋawapacgosu.

10 Ma Apômtau kêsôm gêdêŋ Mose gebe 11 “Ôsô naôsôm êndêŋ Aiguptunêŋ kiŋ Parao gebe êlôc ma lau Israel sêwi ênê gamêŋ siŋ.” 12 Mago Mose kêsôm gêdêŋ Apômtau gebe “Ôlic acgom, lau Israel sêkêŋ taŋeŋ ŋoc biŋ atom, ma Parao oc êkêŋ taŋa aê, taŋ aocsuŋ ŋawapac naŋ, amboac ondoc.” 13 Go Apômtau gêjam biŋgalôm gêwiŋ Mose agêc Aron ma kêjatu êsêagêc gebe sêsôm êndêŋ lau Israel to êndêŋ Aiguptunêŋ kiŋ Parao gebe agêc awê lau Israel sêwi gamêŋ Aiguptuŋa siŋ.

28 Gêdêŋ bêc, taŋ Apômtau kêsôm biŋ gêdêŋ Mose aŋga gamêŋ Aiguptuŋa naŋ, 29 Apômtau kêsôm gêdêŋ Mose gebe “Aê Apômtau tau. Ôsôm biŋ samob, taŋ aê jasôm êndêŋ aôm naŋ êndêŋ Aiguptunêŋ kiŋ Parao.” 30 Mago Mose kêsôm gêdêŋ Apômtau gebe “Ôlic acgom, aê aocsuŋ ŋawapac, tec Parao oc êkêŋ taŋa aê amboac ondoc.”