20
Biŋsu lemeŋ lu
1 Ma Apômtau kêsôm biŋ samob tonec ŋai gebe 2 “Apômtau, aômnêm Anôtô, aê. Aê gawê aôm kôsa aŋga gamêŋ Aiguptuŋa gômôêŋ, kôsa aŋga andu gêŋômaŋa.
3 “Ônam sakiŋ anôtôi jaba êwiŋ atom, ônam sakiŋ aê taucgeŋ.
4 “Ôŋgôm gêŋ, taŋ gêmoa undambê me gêmoa nom me gêmoa bu, taŋ kêpoac nom ŋalêlôm naŋ, ŋateŋ ŋakatu ênam gêŋ tau laŋô atom. 5 Owec êndêŋ gwam tonaŋ to ônam sakiŋ gêŋ tau atom, gebe aê Apômtau, aômnêm Anôtô, gajob ŋoc lau gebe têntac êwiŋ aê taucgeŋ nec. Aê jakêŋ lau, taŋ têntac gedec aê naŋ, nêŋ geo ŋagêjô êpi êsêac latuŋi to dêbuŋi ma abeŋi. 6 Mago aê jakêŋ moasiŋ êndêŋ lau, taŋ têntac gêwiŋ aê to sêmasaŋ aêŋoc biŋsu naŋ, nêŋ gôlôac to gôlôac ŋêŋgeŋ êna.
7 “Ôjaiŋ Apômtau, aômnêm Anôtô, nê ŋaê atom gebe Apômtau oc êmêtôc ŋac, taŋ êjaiŋ ênê ŋaê naŋ.
8 “Taêm ênam sabat gebe dabuŋ ma ômansaŋ ŋapep. 9 Êndêŋ bêc 6 aôm ônam kôm to ôŋgôm nêm gêŋ samob. 10 Mago bêc êtu 7ŋa êtu Apômtau, aômnêm Anôtô, nê sabat. Êndêŋ bêc tonaŋ aôm ônam kôm teŋ atomanô. Aôm to nêm latômio to ŋac ma nêm sakiŋwagao to ŋac ma nêm bulimakao to lau jaba, taŋ sêŋgôŋ sêwiŋ aôm naŋ, anam kôm teŋ atom amboac tonaŋgeŋ. 11 Gebe gêdêŋ bêc 6 Apômtau kêkêŋ undambê to nom ma gwêc to ŋagêŋ samob, taŋ sêmoa mateŋ jali naŋ. Ma gêdêŋ bêc kêtu 7ŋa naŋ, eŋ kêlêwaŋ tau. Kêtu tonaŋŋa Apômtau gêjam mec sabat tau ma gêjam dabuŋ.
12 “Otoc tamam agêc tênam sa, gebe ômoa ŋasawa baliŋ aŋga gamêŋ, taŋ Apômtau, aômnêm Anôtô, êkêŋ êndêŋ aôm naŋ.
13 “Ônac ŋamalac êndu atom.
14 “Ôŋgôm gêŋ mockaiŋo to mockaiŋŋa atom.
15 “Ônam geŋgeŋ atom.
16 “Ôŋga biŋ êpi lau wacbaŋ aôm atom.
17 “Matam katu lau wacbaŋ aôm nêŋ andu atom. Matam katu lau wacbaŋ aôm nêŋ awê to sakiŋwagao to ŋac ma bulimakao to doŋki ma gêŋ ŋagêdô teŋ atom.”
Lau têtêc tauŋ
18 Lau samob sêsaê wapap gêjac to ôsic kêkac ma dauc kêtaŋ ŋakicsêa to jadauŋ kêsa lôc tau ma têtêc tauŋ e têtênêp ma sêkô jaêcgeŋ. 19 Ma êsêac sêsôm gêdêŋ Mose gebe “Aôm taôm ôsôm biŋ êndêŋ aêac ma aêac akêŋ taŋeŋ. Anôtô embe êsôm biŋ êndêŋ aêac, oc amac êndu.” 20 Ma Mose kêsôm gêdêŋ lau gebe “Atêc taôm atom, gebe Anôtô gêmêŋ gebe ênsaê amac, ec taêm ênam biŋ atêc eŋŋa ŋapaŋ gebe aŋgôm sec atom.”
21 Gêdêŋ taŋ Mose kêtu gasuc tao majaŋ, taŋ Anôtô gêmoa ŋalêlôm naŋ, lau sêkô jaêcgeŋ.
20:22–23:33 Biŋsu to ŋagôliŋ ŋagêdô kêsêp ŋasêbu tonec. Biŋsu ŋagêdô kêmasaŋ launêŋ lêŋ sêmoasiŋ nêŋ lau jabaŋ êsêacŋa ŋapep. Biŋsu ŋagêdô gêwa lêŋ tamêtôc lau, taŋ sêgôm sec tokaiŋ-tokaiŋ naŋ, jagêdêŋgeŋŋa sa. Ŋagôliŋ ŋagêdô kêkanôŋ lau-sêmêtôc-biŋwaganêŋ kôm. Ŋagêdô kêmasaŋ lêŋ tajô launêŋ gêŋ, taŋ dagôm kêtu sec naŋŋa. Ma ŋagêdô kêjatu om ŋasakiŋ to sakiŋ om toê-toê, taŋ lau Israel sêlic kêtôm jalageŋ naŋŋa.