1 Go Anôtô kêsôm gêdêŋ aê gebe “Ŋamalac latu, ôniŋ gêŋ, taŋ gêc aôm laŋômnêmŋa naŋ, ôniŋ papia toluŋ tonaŋ, go ôna ma ôsôm biŋ andêŋ lau Israel.”

2 Amboac tonaŋ aê gaŋa aocsuŋ ma eŋ kêkêŋ luŋ tau gêdêŋ aê gebe janiŋ. 3 Ma eŋ kasôm gebe “Ŋamalac latu, ôniŋ papia tec kakêŋ gêdêŋ aôm nec e ênam têmtacsêga auc.” Aa gaeŋ gêŋ tau ma kasaê ŋakana kêtôm lap.

4 Go Anôtô kasôm gebe “Ŋamalac latu, ôndêŋ lau Israel ôna ma ôsôm ŋoc biŋ lasê êndêŋ êsêac. 5 Aê jasakiŋ aôm ôndêŋ lau toaweŋ talô ma toaweŋ ŋawapac nec atom, jasakiŋ aôm ôndêŋ lau Israelgeŋ. 6 Aê jasakiŋ aôm ôndêŋ lau-m ŋagêdô, taŋ sêsôm aweŋ jaba, taŋ aôm gôŋô atom naŋ atom amboac tonaŋgeŋ. Embe jasakiŋ aôm ôndêŋ lau-m amboac tonaŋ, oc sêkêŋ taŋeŋ aôm awam. 7 Mago lau Israel oc sêkêŋ taŋeŋ aôm awam atom gebe êsêac dedec gebe sêkêŋ taŋeŋ aê aoc. Biŋ tonaŋ ŋam gebe lau Israel samob gêsuŋtêkwa ŋatoŋ ma naŋ ŋalêlôm ŋadani. 8 Ôlic acgom, galoc aê jaŋgôm aôm laŋômsiboa atôm êsêacnêŋ ma têmbêlam ŋajaŋa êtôm êsêac teŋbeleŋ. 9 Biŋŋanô, aê kakêŋ aôm têmbêlam ŋajaŋa kêtôm pocawa kaiŋ teŋ diamand su. Ôtêc êsêac atom ma êsêac laŋôŋsiboa êtakê aôm atom gebe êsêac lau toŋ teŋ, taŋ sêli tauŋ sa ŋasec naŋ.”

10 Go Anôtô kêsôm biŋ tonec gêwiŋ gebe “Ŋamalac latu, biŋ samob, taŋ jasôm êndêŋ aôm naŋ, ênêc nêm ŋalêlôm ma ôkêŋ taŋam aê aoc tau. 11 Gocgo ôndêŋ nêm lau, taŋ sêŋgôŋ kapoacwalô naŋ, ôna ma ôsôm êndêŋ êsêac, taŋ sêkêŋ taŋeŋ me sêkêŋ taŋeŋ atom gebe ‘Apômtaunê biŋ tau tonec.’ ”

12 Go Anôtônê Ŋalau kêsip aê sa ma gêdêŋ taŋ Apômtau toŋawasi gêdi naŋ, aê gaŋô ôjô gêjam ŋakicsêa kapôêŋ aŋga aê dêmôêcmuŋa. 13 Ŋakicsêa tau ŋam kêsêp gêŋ mateŋ jali sêkac ŋamagê kêpi tau ma wil kêsêlêŋ gêwiŋ êsêac. Ma ŋakicsêa tau tonaŋ kêtôm ôjô ŋakicsêa. 14 Go ŋalau kêsip aê sa ma kêkôc aê gêc gêja. Ma aê gaêc gaja toŋaclaigeŋ e ŋalêlôm kêpuc aê ma Apômtaunê lêma kêkôniŋ aê ŋanôgeŋ. 15 Tec aê gaô lasê lau kapoacwalôŋa, taŋ sêŋgôŋ malac Tel Abib aŋga bu Kebar ŋatali naŋ. Aê gaŋgôŋ êsêac ŋalêlôm bêc 7 toŋoc ŋalêlôm gêmô aêgeŋ kêtu gêŋ, taŋ galic to gaŋô naŋ.

16 Gêdêŋ taŋ bêc 7 gêjaŋa naŋ, Apômtau kêsôm biŋ gêdêŋ aê. 17 Eŋ kêsôm gebe “Ŋamalac latu, aê kakêŋ aôm kôtu dibwaga lau Israelŋa. Êndêŋ taŋ ôŋô biŋ êsa aocsuŋ, naŋ naôkêŋ puc êsêac ônam aê laŋôc. 18 Aê embe jasôm êndêŋ ŋac alôb-alôb teŋ gebe eŋ oc êmac êndu, mago aôm embe ôkêŋ puc to ôsôm biŋ êndêŋ eŋ e êwi nê lêŋ sec siŋ ma êmoa mata jali nec atom, oc ŋac alôb-alôb êmac êndu êtu nê secŋa, mago aôm oc ôwê ênê dec ŋakaiŋ. 19 Mago aôm embe ôkêŋ puc ŋac alôb-alôb ma eŋ êwi siŋ atom to ênam tau ôkwi aŋga nê lêŋ sec atom, go eŋ oc êmac êndu amboac ŋac alôb-alôb, mago aôm gôjam taôm kêsi.

20 “Ma teŋ. Ŋac gêdêŋ teŋ embe êwi nê lêŋ gêdêŋ siŋ ma êŋgôm sec ma aê jakêŋ eŋ êka selelec, eŋ oc êmac êndu, gebe aôm kôkêŋ puc eŋ atom, tec eŋ êmac êndu êtu ênê secŋa. Aê oc taêc ênam nê koleŋ ŋajam, taŋ eŋ gêgôm naŋ, êtiam atom. Mago aôm oc ôwê nê dec ŋakaiŋ. 21 Mago aôm embe ôkêŋ puc ŋac gêdêŋ teŋ gebe êŋgôm sec atom ma eŋ embe endec sec, naŋgo êmoa mata jali gebe eŋ kêkêŋ taŋa nêm puc ma aôm oc ônam taôm katôm kêsi amboac tonaŋgeŋ.”

22 Ma Apômtau lêma gêsac aê ma eŋ kêsôm gêdêŋ aê gebe “Ôndi sa ma ôsa gaboaŋ ôna. Aê gabe jasôm biŋ êndêŋ aôm aŋga tônê.”

23 Amboac tonaŋ aê kasa gaboaŋ gaja ma aŋga tonaŋ aê galic Apômtaunê ŋawasi kêtôm aê galic su aŋga bu Kebar ŋatali. Aê gau tauc laŋôcanô gêdêŋ nom, 24 mago Apômtaunê Ŋalau gêjam aêŋoc ŋalêlôm auc. Ma Apômtau kêsôm gêdêŋ aê gebe “Naôsô nêm andu ma ôlai katam auc. 25 O ŋamalac latu, oc sêsô aôm tôŋ ŋa lêpoa ma aôm ôtôm gebe ôsa awê ôndêŋ lau atom. 26 Ma aê gabe jakêŋ imbêlam êsap lômboam tôŋ gebe awammê êsa ma ôtôm gebe ônac biŋsu êsêac atom gebe êsêac lau toŋ teŋ, taŋ sêli tauŋ sa sec naŋ. 27 Mago êndêŋ taŋ jasôm biŋ êndêŋ aôm naŋ, jandelec awamsuŋ, go aôm ôsôm êndêŋ êsêac gebe ‘Apômtau Anôtô nê biŋ tonec’. Ŋac taŋ êkêŋ taŋa naŋ, êŋô biŋ tau. Ŋac taŋ endec naŋ, endecgeŋ gebe êsêac lau toŋ teŋ, taŋ sêli tauŋ sa sec naŋ.”