1 siŋ tonaŋ gêbacnê, go Abram katu gêlic Apômtau ma awa gêjac eŋ gebe “Abram, ôtêc taôm atom. Aê katu aômnêm lautuc. Moasiŋ kapôêŋ êtap aôm sa.” 2 Mago Abram kêsôm gebe “O Apômtau Anôtô, aôm gobe ôkêŋ asageŋ êndêŋ aê. Aêŋoc gôlôac masianô ma Elieser aŋga Damaskus êtu ŋac oc êwê kaiŋ aêŋoc gêŋlênsêm.” 3 Ma Abram kêsôm gebe “Ôlic acgom, aôm kôkêŋ gôlôac gêdêŋ aê atom ma gêŋôma teŋ, taŋ têna kêkôc eŋ aŋga ŋoc andu naŋ, oc êtu ŋac êwê kaiŋ aêŋoc gêŋlênsêm.” 4 Mago Apômtaunê biŋ gêdêŋ eŋ gebe “Ŋac tonec êwê kaiŋ nêm gêŋlênsêm atom, aôm latôm solop êtu ŋac êwê kaiŋ nêm gêŋlênsêm.” 5 Go gêwê eŋ kêsa awê gêja ma kêsôm gebe “Matam endec umboŋ ma embe ôtôm gebe ôsa utitalata sa, go ôsa samaŋ.” Go kêsôm gêdêŋ eŋ gebe “Nêm wakuc oc têtôm tonaŋ.” 6 Ma eŋ kêkêŋ gêwiŋ Apômtau, tec gêlic eŋ ŋac gêdêŋ.

7 Ma Apômtau kêsôm gêdêŋ eŋ gebe “Aê Apômtau, taŋ kakôc aôm aŋga Ur Kaldeaŋa gebe jakêŋ gamêŋ tonec êndêŋ aôm ôwê kaiŋ.” 8 Mago Abram kêsôm gebe “O Apômtau Anôtô, aê jajala amboac ondoc gebe jawê kaiŋ gamêŋ tau.” 9 Eŋ kêsôm gêdêŋ eŋ gebe “Ôkôc bulimakao têna ŋajala kêtu têlêac to noniŋ têna ŋajala kêtu têlêac ma domba kapoac ŋajala kêtu têlêac ma balôsi teŋ to moŋgôm ŋalatu teŋ, go ômôêŋ.” 10 Ma eŋ kêkôc gêŋ samob tonaŋ ma kêsêlê kêkôc gêja luagêc-luagêc ma kêdênaŋ makeŋ-makeŋ kêkanôŋ tau, mago moc, tec kêsêlê atom. 11 Ma moc, taŋ seŋ gêŋ todec naŋ, sêpôp sêsêp sebe sêniŋ gwada, tec Abram gesoc.

12 Oc jakêsêp ma Abram gêc bêc e kêliŋ tau siŋ ma nê ŋalêlôm ôluŋ-ôluŋgeŋ to ŋakesec kêkôm eŋ auc. 13 Go Apômtau kêsôm gêdêŋ Abram gebe “Ôŋô, ma ôjala êtu tôŋ gebe nêm wakuc oc têtu lau jaba aŋga gamêŋ, taŋ êsêac tauŋ sêwê kaiŋ atom naŋ, ma têtu gêŋôma ma sêkôniŋ êsêac êtôm jala 400. 14 Mago aê jamêtôc lau, tê sênam sakiŋ êndêŋ êsêac nê, go êsêac sêwi gamêŋ tau siŋ towaba taêsam ŋanô lasê. 15 Mago aôm taôm tec ôndêŋ tamami ôna tobiŋmalôgeŋ ma nêm jala êtu taêsam acgom, go sênsuŋ aôm. 16 Ma nêm gôlôac ŋatoŋ têtu aclêŋa oc sêmu sêmêŋ gamêŋ tonec êtiam, gebe lau gamêŋ Amorŋa nêŋ alôb-alôb gêjac pep atom tageŋ.”

17 Oc jakêsêp ma gamêŋ ŋakesec kêsa, go ku tojadauŋ teŋ ma daweŋ teŋ gelom lasê gêmoa bôc tau ŋasawa. 18 Gêdêŋ bêc tonaŋ Apômtau kêmoatiŋ poac gêdêŋ Abram ma kêsôm gebe “Aê kakêŋ gamêŋ tonec gêdêŋ nêm wakuc su aŋga bu Aiguptuŋa e gêdêŋ bu kapôêŋ Euprat, 19 gamêŋ taŋ lau Ken to Kenis ma Kadmon 20 to Het ma Peris to Repaim 21 ma Amor to Kanaan ma Girgas to Jebus sêwê kaiŋ.”