1 Tonaŋ su, ma têm ŋagêdô gêjaŋa acgom, go kiŋ Aiguptuŋa nê ŋac kêpip wain ŋanôŋa to nê ŋac kêpac polomŋa sêgôm keso teŋ gêdêŋ nêŋ ŋatau, kiŋ Aiguptuŋa tau. 2 Ma Parao têtac ŋandaŋ gêdêŋ nê laumata luagêc tonec, gêdêŋ laumata wainŋa to laumata polomŋa 3 ma eŋ kêkêŋ êsêagêc sêsô siŋwaganêŋ kapitainê andu gebe sejopŋa. Andu kapoacwalôŋa tau, naŋ Josep gêŋgôŋ naŋ. 4 Ma siŋwaganêŋ kapitai kêkêŋ Josep gêjam sakiŋ êsêagêc. Ma êsêagêc sêŋgôŋ kapoacwalô ŋasawa ec teŋ.

5 Ma gêdêŋ gêbêc tageŋ êsêagêc lulugeŋ sêc ma teŋ-kiŋ Aiguptuŋa nê ŋac kêpip wain ŋanôŋa agêc ŋac kêpac polomŋa, taŋ sêŋgôŋ kapoacwalô naŋ — agêc sêc nêŋ mê keso tau ma agêc lulugeŋ nêŋ ma ŋam keso tau amboac tonaŋgeŋ. 6 Gêdêŋ bêbêcgeŋ Josep gêdêŋ êsêagêc gêja ma gêlic êsêagêc semoa tonêŋ ŋalêlôm ŋawapacgeŋ. 7 Ma eŋ kêtu kênac Paraonê laumata, taŋ sêŋgôŋ ênê ŋataunê andu sêwiŋ eŋ gebe sejop êsêacŋa naŋ, gebe “Agêc laŋômanô bêlê-bêlê kêtu asageŋŋa.” 8 Agêc sêsôm gêdêŋ eŋ gebe “Aêagêc aêc mê ma ŋac êwa mê ŋam saŋa teŋ gêmoa atom.” Ma Josep kêsôm gêdêŋ êsêagêc gebe “Kôm dawa ma saŋa gêjac Anôtô ŋawae. Anac miŋ mê tau êndêŋ aêmaŋ.”

9 Go laumata wainŋa gêjac miŋ nê mê gêdêŋ Josep ma kêsôm gêdêŋ eŋ gebe “Aê gaêc mê ma galic wain ŋamôkê teŋ kêkô. 10 Wain ŋamôkê tau ŋalaka têlêac kêkô. Ma gêŋ tau kêpô katôm e ŋaola kêsa sebeŋ ma gêjam ŋanô. 11 Aê kakôc Paraonê laclu. Go kakôc wain ŋanô ma kapip ma katêwiŋ ŋatêkwi kêsap Paraonê laclu ma kakêŋ laclu tau kêsêp Parao lêma.” 12 Ma Josep kêsôm gêdêŋ eŋ gebe “Mê tonaŋ ŋam amboac tonec gebe Ŋalaka têlêac kêtôm bêc têlêac. 13 Bêc têlêac ênaŋa acgom, go Parao êsa aôm têmbêlam sa ma êkêŋ aôm ônam sakiŋ eŋ êtiam. Aôm ôkêŋ laclu êsêp Parao lêma êtiam êtôm gôgôm gêdêŋ têm, taŋ kôtu ênê ŋac kêpip wain ŋanôŋa naŋ. 14 Mago aôm embe ômoa ŋajam, go taêm ênam aê. Taêm walô aê ma ôkêŋ aê ŋawae andaŋ Parao ma ônam aê sa gebe jawi andu tonec siŋ. 15 Gebe êsêac sêjam geŋgeŋ aê aŋga Ebolainêŋ gamêŋ, ma aê gagôm gêŋ sec teŋ aŋga gamêŋ tonec kêtôm gebe sêmbaliŋ aê jasêp gêsuŋŋa atom.”

16 Laumata polomŋa gêŋô gebe gêwa mê ŋam sa ŋajamgeŋ, tec kêsôm gêdêŋ Josep gebe “Aê gaêc ma teŋ amboac tonaŋgeŋ. Aê kakuc gadob polomŋa têlêac. 17 Ma gêŋ tokaiŋ-tokaiŋ, taŋ sêpac kêtu Paraoŋa naŋ, kêsêp gadob ŋaôŋa. Mago moc mêŋseŋ gêŋ aŋga gadob, taŋ aê kakuc naŋ.” 18 Ma Josep gêjô eŋ awa gebe “Ŋam amboac tonec gebe Gadob têlêac kêtôm bêc têlêac. 19 Bêc têlêac ênaŋa acgom, go Parao êsa aôm têmbêlam sa gebe êkêŋ aôm ôŋkaleŋ ka teŋ ma moc sêkac nêm ŋamêsôm.

20 Bêc kêtu têlêacŋa kêtu Paraonê bêc têna kêkôc eŋŋa, tec geno moasiŋ gêdêŋ nê sakiŋwaga samob ma kêsa ŋac kêpip wain ŋanôŋa agêc ŋac kêpac polomŋa teŋbeleŋ sa gêdêŋ nê sakiŋwaga. 21 Eŋ kêkêŋ sakiŋ wainŋa gêdêŋ ŋac kêpip wain ŋanôŋa gêwê kaiŋ kêtiam, tec kêkêŋ laclu kêsêp Parao lêma. 22 Mago eŋ kêkêŋ ŋac kêpac polomŋa geŋkaleŋ ka kêtôm Josep gêwa sa gêdêŋ êsêagêc su naŋ. 23 Tageŋ ŋac kêpip wain ŋanôŋa taê gêjam Josep atom, kêliŋ eŋ siŋ gacgeŋ.