4 “Aê Apômtau, aômnêm Anôtô, gêdêŋ taŋ aôm gômoa Aiguptu naŋ. Aôm kôjala Anôtô teŋ gêwiŋ atom, aê taucgeŋ ma Kêsiwaga teŋ gêmoa atomanô. 5 Aê gajam aôm sa aŋga gamêŋ sawa to gamêŋ ŋakeleŋ. 6 Mago gêdêŋ taŋ sêsô gamêŋ ŋajamanô tau naŋ, seŋ gêŋ gêôc êsêac tôŋ. Ma gêdêŋ taŋ seŋ gêôc êsêac tôŋ naŋ, go tetoc tauŋ sa ma sêliŋ aê siŋ. 7 Tec aê gajam duc êsêac amboac lewe ma gadib êsêac aŋga intêna ŋamagê amboac pusip saleŋŋa leopard. 8 Aê oc jajanda amac amboac bôc ber têna teŋ, taŋ sêkôc ênê ŋalatu su naŋ, jajanda ma jakac êsêac ôliŋ lasê ma jandaŋgôŋ êsêac amboac lewe kêdaŋgôŋ gwada ma amboac bôcbôm êkac êsêac popoc.

9 “O Israel, aê oc janseŋ amac su. Asa êtôm gebe ênam amac sa. 10 Amacnêm ŋagêdô sêsôm gebe ‘Ôkêŋ kiŋ to gôliŋwaga êndêŋ aêac’ ma galoc nêm kiŋ gêmoa ondoc gebe ênam amac kêsi. Nêm gôliŋwaga, taŋ sênac siŋ êtu amacŋa naŋ, sêmoa ondoc. 11 Kêtu ŋoc têtac ŋandaŋŋa aê kakêŋ kiŋ teŋ gêdêŋ amac ma kêtu ŋoc ŋalêlôm kêbôli aucŋa aê kakôc eŋ su.

12 “Aê kakic Israelnêŋ sec to keso tôŋ, ma gajac ênê sec sa to gajob. 13 Gabêsi mêŋgêô lasê kêtu eŋŋa, mago eŋ latu masi, gebe galoc eŋ gedec gebe êwi ŋaabêlôŋ siŋ. 14 Aê oc janam êsêac kêsi êndêŋ lamboam atom. Jakac êsêac su aŋga ŋaclai gêmacanôŋa atom. Gêmacanô, nêm ŋaclai gêc ondoc. Lamboam, nêm ŋaclai onseŋ suŋa gêc ondoc. Aê taêc walô lau tonec êtiam atom. 15 Epraim oc êtôp amboac siŋ, mago mu oc kêpiŋa oc êmêŋ, Apômtaunê mutêna oc êô lasê aŋga gamêŋ sawa, go êŋgôm ênê bumata êpa ma ênê bu ŋamôkê ŋakeleŋ êsa ma êjaŋgo awamata samob su aŋga ênê kanom. 16 Samaria oc êôc nê ŋagêjô êtu gêli tau sa gêdêŋ nê Anôtôŋa. Siŋ oc enseŋ êsêac su. Oc sênac êsêacnêŋ ŋapalê ŋasec-ŋasec popoc ma sêsêlê lauo, taŋ sêmoa teŋ naŋ, nêŋ têntacwalô.”