9
Têna kêkôc biŋmalô ŋatau ma eŋ kêkôc nê gôliŋ sa
1 Lau taŋ sêŋgôŋ gêsuŋbôm naŋ, sêlic ja kapôêŋ teŋ.
Ma ŋawê kêpô êsêac, taŋ sêŋgôŋ gêmac ŋagamêŋ kanucŋa naŋ.
2 Aôm kôkêŋ lau têtu taêsam
ma gôgôm êsêac têntac ŋajam gêjam sêga.
Êsêac sêmoa aôm laŋômnêmŋa toôliŋ kêpigeŋ
têtôm lau, taŋ seŋ mo lasê naŋ,
ma amboac lau, taŋ sêjac sam ŋacjonêŋ awamata.
3 Gebe gêŋwapac ŋata, taŋ gêsac êsêac naŋ,
ma tôc magiŋmŋa to nêŋ ŋac, taŋ kêlêsu êsêac naŋ, nê sêm
naŋ aôm kôpôŋ tulu toc tageŋ amboac gêdêŋ Midiannê têm.
4 Gebe siŋwaganêŋ atapa samob
to nêŋ ŋakwê siŋŋa, taŋ dec gi auc naŋ,
êsa ja ma êniŋ su.
5 Gebe awê teŋ kêkôc ŋapalê teŋ kêtu aêacŋa,
kêkêŋ latu teŋ gêdêŋ aêac gêmêŋ.
Ŋagôliŋ gêsac eŋ magim ma sêsam eŋ gebe
“Mêtêŋam, Laimôkê, Teŋgeŋŋam, Biŋmalôtau.”
6 Ênê gôliŋ oc ênam sêga,
ma biŋmalô oc ênêc teŋgeŋ
aŋga Dawidnê lêpôŋ to nê gamêŋ kiŋŋa.
Gebe eŋ oc ênac m ŋagôliŋ tau to êpuc tôŋ
ŋa mêtôc gêdêŋ to biŋ gêdêŋ
êndêŋ galoc ma endeŋ tôŋgeŋ.
Lausiŋ undambêŋa nêŋ Apômtau nê ŋalêlôm kêkac eŋ,
tec êŋgôm biŋ tonaŋ êtu tôŋ.
9:7–10:34 Anôtô kêmêtôc gamêŋ Israelŋa kêtu puc gêdeŋ gamêŋ Judaŋa. Mago lau Asuria, taŋ têtu Anôtônê waba mêtôcŋa gebe êmêtôc nê lau sec naŋ, têtap gêŋwapac sa e sênaŋa amboac tonaŋgeŋ. *Ŋalô êsêac kêkanôŋ lau Juda to Jerusalem.