1 O Jakob, o Israel, galoc Apômtau, taŋ kêkêŋ aôm

ma kêmasaŋ aôm naŋ, kêsôm biŋ tonec gebe

“Ôtêc taôm atom, gebe aê gajam aôm kêsi su.

Aê gamôêc aôm ma kasam nêm ŋaê anôgeŋ, aôm kôtu aêŋoc gêŋ.

2 Embe olom gwêc, aê oc mêŋjawiŋ aôm.

Ma embe ôsêlêŋ ômoa ja ŋalêlôm, oc ênam aôm atom

ma jawaô oc êniŋ aôm atom,

3 gebe Apômtau, aômnêm Anôtô aê,

Israelnêŋ ŋac dabuŋ to nêm kêsiwaga aê.

Aê kakêŋ Aiguptu kêtu awa gêjam ôli aôm suŋa

ma kakêŋ Aitiopia to Seba gêjô aôm

4 gebe aê galic aôm kôtôm awamata teŋ

ma kakiaŋ aôm sa to têtac gêwiŋ aôm.

Aê kakêŋ gamêŋ gêjô aôm

ma kakêŋ lau tomôkê-tomôkê gebe ômoa matam jali.

5 Ôtêc taôm atom gebe aê mêŋgawiŋ aôm,

aê oc jajoŋ nêm wakuc sa aŋga oc kêpiŋa

ma janac aôm sa aŋga oc kêsêpŋa.

6 Aê oc jasôm êndêŋ musaŋgu-m gebe Ôwi siŋmaŋ,

ma êndêŋ mula-m gebe Ôŋgamiŋ atommaŋ.

Ôkêŋ latuci aŋga gamêŋ jaêc

to ŋoc latucio aŋga nom ŋamadiŋ

7 ma lau samob, taŋ sêwê kaiŋ ŋoc ŋaê

ma kakêŋ to kamasaŋ êsêac kêtu ŋoc waecŋa naŋ,

sêndêŋ aê sêmêŋ.

8 “Akêŋ lau, taŋ mateŋpec, mago mateŋanô gêc naŋ,

to lau, taŋ taŋeŋsuŋbic, mago taŋeŋsuŋ gêc naŋ, sêsa sêmêŋ.

9 Akêŋ tenteŋlatu samob sênac tauŋ sa

ma lau tomôkê-tomôkê sêkac sa sêpi tageŋ.

Êsêacnêŋ asa kêtôm gebe êwa gêŋ tonec sa

ma êtôc gêŋ andaŋgeŋŋa êndêŋ aêac.

Êsêac sêkêŋ nêŋ lau, taŋ sêpuc êsêacnêŋ biŋ tôŋ naŋ, sêsa sêmêŋ gebe sêwaka êsêac sa

e sêŋô ma sêsôm gebe Biŋ tau biŋŋanô.”

10 Apômtau kêsôm gebe “Aêŋoc lau-sêpuc-ŋoc-biŋ-tôŋwaga

to ŋoc sakiŋwaga, taŋ kajaliŋ êsêac sa naŋ amac

gebe amac ajala to akêŋ êwiŋ aê

ma nêm kauc êsa gebe aê tau tonec.

Anôtô teŋ kêsa gêmuŋ aê atom

ma teŋ oc êndaŋguc aê atom.

11 Aê, aê taucgeŋ Apômtau

ma kêsiwaga teŋ gêmoa gêwiŋ atomanô.”

12 Apômtau kêsôm gebe “Aê kasôm biŋ lasê to gajam amac kêsi

ma aê kakêŋ ŋawae gêdêŋ amac gêmuŋ su.

Gêdêŋ tonaŋ anôtô jaba teŋ gêmoa amac ŋalêlôm atom

ma amac atu ŋoc lau-sêpuc-ŋoc-biŋ-tôŋwaga.

13 Aê Anôtô gêdêŋ andaŋgeŋŋa

ma galoc amboac tonaŋgeŋ

ma teŋ kêtôm gebe êjaŋgo gêŋ su aŋga aê lemoc atom.

Aê gajam kôm ma asa oc êtôm gebe êkô kôm tau auc.”

14 Apômtau, nêm kêsiwaga ma Israelnêŋ ŋac dabuŋ kêsôm biŋ tonec gebe

“Aê oc jasakiŋ biŋ êna Babel êtu amacŋa

ma jatuc kapoacwalô ŋabalaŋ popoc

ma lau Kaldea nêŋ lasê ênam tau ôkwi êtu taŋiboa.

15 Aê Apômtau, amacnêm ŋac dabuŋ,

aê kakêŋ Israel ma katu amacnêm kiŋ.”

16 Apômtau gêjam intêna kêsêp gwêc ŋalêlôm

ma gêjam intêna gelom bu ŋaweŋweŋ

17 ma gêwê kareta to hos ma siŋwaga to nêŋ siŋsêlêc sêja

e sêsêp jasêc, êsêac oc sêndi sa êtiam atom.

Êsêac sêmac amboac daweŋ gasilana.

Apômtau, taŋ gêgôm gêŋ tonaŋ naŋ, kêsôm biŋ tonec gebe

18 “Taêm ênam gêŋ laŋgwa atom

ma aê go taôm êtu gêŋ gêmuŋŋaŋa atom.

19 Alic acgom, aê gagôm gêŋ wakuc teŋ

ma galic gêŋ tau kêpoa.

Amac alic gêŋ tau atom me.

Aê oc janam intêna êsa gamêŋ sawa êna

ma jakêŋ bu enseleŋ êsa gamêŋ ŋakeleŋ.

20 Bôc saleŋŋa ma kêambôm to kêcsêwa oc tetoc aê sa

gebe kakêŋ bu kêpoac gamêŋ sawa

ma bu kapôêŋ keseleŋ kêsa gamêŋ ŋakeleŋ

gebe êkêŋ bu êndêŋ ŋoc lau, taŋ kajaliŋ êsêac sa naŋ sênôm.

21 Aê kakêŋ êsêac têtu ŋoc lau gebe sêsôm ŋoc waec lasê.

22 “O Jakob, aôm awam gêjac aê atom.

O Israel, aôm gôim taôm su kêtu aêŋa atom.

23 Aôm kôkêŋ domba kêtu daja gêdêŋ aê

me kotoc aê sa ŋa nêm da ŋagêdô atom.

Aê kakôniŋ amac ŋa da atom

ma kalênsôŋ amac ŋa biŋ da ŋamaluŋa atom.

24 Aôm gôjam ôli tê kêtu aêŋa ŋa nêm mone

me kômoasiŋ aê ŋa nêm da toŋalêsi atom.

Aôm kôkôniŋ aê ŋa nêm sec

to kôlênsôŋ aê ŋa nêm geogeŋ.

25 Aê, aê taucgeŋ gaseŋ nêm geo su

ma oc taêc ênam nêm sec êtiam atom kêtu aê taucŋa.

26 Taêm ênam ma ôkêŋ puc aê gebe tajô biŋ tau dawiŋ tauŋ.

Aôm ôwa nêm biŋ sa ma ôwaka taôm sa gebe kôsôm biŋŋanô.

27 Tamam ŋamataŋa gêgôm sec

ma nêm sêliŋwaga sêgêli ŋoc biŋ.

28 Kêtu tonaŋŋa aê kakôc ŋoc dabuŋ su aŋga kasêga lôm dabuŋŋa

ma kakêŋ Jakob gebe lau senseŋ eŋ su

ma kakêŋ Israel gebe lau sêsôm biŋ êpi eŋ.”