1 Ôndi, ŋawê êsa gebe nêm ŋawê mêŋgêô lasê su

ma Apômtaunê ŋawasi mêŋkêpô aôm.

2 Ôlic acgom, ŋakesec gêsaŋ nom auc

ma gêsuŋbôm gêjam tenteŋlatu auc,

mago Apômtau oc mêŋêpô aôm

ma nê ŋawasi oc mêŋênsac aôm ŋaô.

3 Ma tenteŋlatu oc dêndêŋ nêm ŋawê

ma kiŋ oc dêndêŋ ŋawasi, taŋ mêŋêpô aôm naŋ sêmêŋ.

4 Ôc matamanô sa ma matam enso ôlic gebe

Êsêac samob sêkac tauŋ sa ma dêdêŋ aôm sêmêŋ.

Nêm latômi oc sêmêŋ aŋga gamêŋ jaêc

ma lau oc sêsip nêm latômio.

5 Aôm oc ôlic gêŋ tau totêmbêlam aŋgeŋ

ma nêm ŋalêlôm êkac aôm to têmtac ŋajam êsa

gebe gwêc ŋaawa totau-totau oc êndêŋ aôm êwac

ma tenteŋlatu oc sêkêŋ nêŋ awamata êndêŋ aôm.

6 Kamele taêsam oc sênsaŋ aôm auc

ma kamele ŋalatu sêmêŋ aŋga Midian to Epa.

Lau Seba samob oc sêmêŋ

ma sêkôc gold to gêŋmalu sêmêŋ

ma sêsôm Apômtaunê wae lasê.

7 Êsêac oc sejoŋ domba samob aŋga Kedar sêndêŋ aôm sêmêŋ

ma domba kapoac aŋga Nebaiot oc sênam sakiŋ aôm.

Êsêac oc sênsac ŋoc altar têtu da ŋajam

ma aê jaŋgêlôŋ ŋoc andu ŋawasi.

8 Asa lau tec sêlôp amboac tao

ma amboac moŋgôm, taŋ sêlôp dêdêŋ nêŋ kakai.

9 Êsêac sêjac waŋ sa kêtu aêŋa

ma lau Tarsis nêŋ waŋ têtu ŋamata

gebe sêkôc nêm latômi aŋga gamêŋ jaêc sêmêŋ

tonêŋ gold ma silbergeŋ

sebe tetoc Apômtau, aômnêm Anôtô

ma Israelnêŋ ŋac dabuŋ sa gebe eŋ kêwaka nêm ŋawasi sa.

10 “Ma lau jaba oc sêmboa nêm tuŋbôm sa

ma nêŋ kiŋ oc sênam sakiŋ aôm.

Gebe aê gajac aôm kêtu têtac ŋandaŋŋa,

mago kêtu ŋoc moasiŋŋa tec oc taêc walô aôm.

11 Ma nêm katam oc êlêc su êkôgeŋ endeŋ tôŋgeŋ

êtôm êmbêc to eleŋ oc sênsaŋ auc atom

gebe lau oc sejoŋ tenteŋlatunêŋ awamata dêndêŋ aôm sêmêŋ

ma nêŋ kiŋ oc sêwê sêmuŋ êsêac.

12 Gebe tenteŋlatu teŋ me gamêŋ kiŋŋa teŋ, taŋ ênam sakiŋ aôm atom naŋ, oc ênaŋa.

Lau amboac tonaŋ oc sênaŋa samucgeŋ.

13 Lebanon ŋaŋawasi oc êndêŋ aôm êmêŋ,

kaleloŋ to kêmêsic ma kabôêŋ amboac tonaŋgeŋ

gebe sêŋgêlôŋ ŋoc lôm dabuŋ ŋamala

ma aê gabe jatoc octapa ŋamala sa.

14 Go êsêac, taŋ sêkôniŋ aôm naŋ, nêŋ latuŋi oc sewec dêndêŋ aôm

ma êsêac samob, taŋ sêsu aôm susu naŋ, oc mêŋsêu tauŋ sênêc aôm amkaiŋŋa

ma oc sêsam aôm gebe ‘Apômtaunê malac,

Israelnêŋ ŋac dabuŋ nê Sion.’

15 “Lau sêwi aôm siŋ to sedec aôm

ma lau teŋ sêsa nêm gamêŋ atom,

mago galoc oc jawaka nêm waem sa ênêc endeŋ tôŋgeŋ

ma lau oc têntac ŋajam êtu aômŋa ênêc teŋgeŋ ma teŋgeŋ.

16 Aôm oc ônôm tenteŋlatunêŋ su, kiŋnêŋ su oc êlôm aôm.

Ma aôm oc ôjala gebe aê Apômtau, aômnêm kêsiwaga

ma nêm gêjamsawaga aê, Jakobnê ŋac toŋaclai.

17 “Aê oc jakêŋ gold êjô ki joŋjoŋ

ma silber êjô ki jejec

ma ki joŋjoŋ êjô ka

ma ki jejec êjô poc.

Ma jakêŋ biŋmalô êtu nêm gejobwaga

ma biŋgêdêŋ êtu nêm gôliŋwaga.

18 Lau sêŋô gêŋ ŋaclai wauc-wauc-geŋŋa aŋga nêm gamêŋ

to senseŋ gêŋ su ma sênac gêŋ popoc aŋga nêm gamêŋ ŋamadiŋ ŋawae êtiam atom.

Ma aôm ôsam nêm tuŋbôm gebe Gêjam-kêsi

ma nêm sacgêdô gebe Lambiŋ.

19 “Oc oc êkêŋ ŋawê êndêŋ aôm êndêŋ eleŋŋa êtiam atom

ma ajôŋ ŋawê êpô aôm êndêŋ êmbêc atom amboac tonaŋgeŋ

gebe Apômtau oc êtu nêm ŋawê teŋgeŋŋa

ma nêm Anôtô oc êtu nêm ŋawasi.

20 Nêm oc naêsêp êtiam atom

ma nêm ajôŋ oc naênam tôŋ êtiam atom

gebe Apômtau oc êtu nêm ŋawê teŋgeŋŋa

ma nêm bêc ôtaŋ taŋiboaŋa oc êmbacnê.

21 Nêm lau pebeŋ oc têtu lau gêdêŋ

ma oc sêwê kaiŋ gamêŋ tonec endeŋ tôŋgeŋ.

Êsêac oc têtu ŋoc ka, taŋ kasê naŋ, ŋasêli

ma ŋoc lemoc ŋakôm ŋanô,

gebe sêwaka aêŋoc ŋawasi sa.

22 Ŋac sauŋ tau oc êtu gôlôac kapôêŋ,

ma ŋac ŋamu êtu lau-m toŋaclai.

Aê Apômtau oc jaŋgôm biŋ tau ŋanô êsa sebeŋ êndêŋ ŋanoc.” *Lebanon ŋaŋawasi tau kaseda, taŋ kêkô lôc tau naŋ.