15
Apômtau têtac ŋandaŋ sec gêdêŋ Juda
1 Go Apômtau kêsôm gêdêŋ aê gebe “Mose agêc Samuel embe sêkô aê laŋôcnêmŋa, aêŋoc ŋalêlôm oc ênam tau ôkwi êndêŋ lau tonec atom. Onsoc êsêac sêc su aŋga aê laŋôc-anôŋa ma sêc sêna. 2 Ma êsêac embe têtu kênac aôm gebe ‘Aêac ana ondoc,’ go ôsôm êndêŋ êsêac gebe Apômtau kêsôm biŋ tonec gebe
Lau taŋ gêmac sec gêjac êsêac ŋawae naŋ,
sêndêŋ gêmac sec sêna.
Ma lau, taŋ siŋ gêjac êsêac ŋawae naŋ,
sêndêŋ siŋ sêna.
Ma lau, taŋ tôbôm gêjac êsêac ŋawae naŋ,
sêndêŋ tôbôm sêna.
Ma lau, taŋ kapoacwalô gêjac êsêac ŋawae naŋ,
sêndêŋ kapoacwalô sêna.”
3 Apômtau kêsôm gebe “Aê jajaliŋ gêŋ enseŋ êsêac suŋa aclê sa, siŋ gebe ênac êsêac, kêam gebe sêkac êsêac popoc, moc umboŋ ŋalabuŋa to bôc nomŋa gebe senseŋ to sêdaŋgôŋ êsêac. 4 Ma aê jaŋgôm êsêac têtu gêŋ êtakê nom ŋagamêŋ kiŋŋa samobŋa, kêtu Judanêŋ kiŋ Hiskia latu Manase nê sec, taŋ gêgôm aŋga Jerusalem naŋŋa.”
5 Apômtau kêsôm gebe
“O Jerusalem, asa oc taê walô aôm.
Ma asa êtaŋ aômŋa.
Asa ênac aôm kêsi
gebe êtu kênac gebe aôm gômoa amboac ondoc.
6 Aôm kôtiŋ aê su.
Aôm kôkêŋ dêmôêm aê.
Amboac tonaŋ aê kamêtôc lemoc ma gaseŋ aôm su
gebe aê ôlic ŋakam kêsa gebe taêc walô aôm.
7 Aŋga malac tonec ŋagamêŋ samob
aê katiŋ amac adêŋ mu amboac gêŋ ŋapaôma.
Aê gaseŋ aêŋoc lau amac su.
Aê gajac nêm ŋapalêo to ŋac êndu gebe awi nêm lêŋ sec siŋ atom.
8 Awêtuc aŋga nêm gamêŋ ŋanamba
kêlêlêc gaŋac gwêcŋa su.
Aê gajac nêm lau matac, taŋ sêmoa toŋaclai naŋ êndu
ma gagôm nêŋ teneŋi sêôc gêŋwapac.
Aê gajac êsêac sep tageŋ ŋa gêŋwapac e selendec ŋanô.
9 Ŋapalê 7, taŋ sêjaŋa naŋ, teneŋi mata kêlô
ma kêsi de sec.
Nê oc ŋawê gêjam tau ôkwi kêtu ŋakesec.
Eŋ maja kêsa-ma gêmoa towaemêgeŋ.
Aê gabe jakêŋ nêm ŋacjo sênac amac,
taŋ gacgeŋ amoa matem jali naŋ, ŋa siŋ.
Aê Apômtau tau, kasôm biŋ tonaŋ.”
Jeremia kêtaŋ gêdêŋ Apômtau
10 Ijoc aêma. O tinoc, kôkôc aê o wageŋ. Lau gamêŋ tonecŋa samob sêlic aê amboac kisamôkê to kalomtêna. Aê kakêŋ mone kêtu tôp gêdêŋ ŋac teŋ atom ma kateŋ gêŋ teŋ aŋga ŋac teŋnê atom, mago samob sêpuc boa aê. 11 O Apômtau, embe aê janam sakiŋ aôm ŋajam atom ma embe aê jateŋ gêŋ kêsi-kêsigeŋ êtu ŋoc soŋo-soŋo, taŋ sêmoa gêŋwapac to sêpô lêna ŋalêlôm naŋ atom, go êsêacnêŋ biŋ sêpuc boa aêŋa ŋanô êsamaŋ. 12 Teŋ êtôm gebe êpôŋ ain, ain aŋga gamêŋ gêmu kêsêpŋa (nodoŋa), taŋ sêgaluŋ gêwiŋ bras naŋ, tulu me. Oc masi samucgeŋ.
13 Apômtau kêsôm gêdêŋ aê gebe “Aê gabe jasakiŋ ŋacjo gebe sêjaŋgo amacnêm awa to gêlôŋ ŋajam-ŋajam su gebe êjô nêm sec, taŋ agôm kêtôm gamêŋ samobgeŋ naŋ. 14 Aê gabe jakêŋ amac anam sakiŋ nêm ŋacjo aŋga gamêŋ, taŋ ajam kauc naŋ, gebe aê têtac ŋandaŋ kêtôm ja, taŋ gelom gedeŋ tôŋgeŋ naŋ.”
15 Go aê kasôm gebe “O Apômtau, aôm kôjalagac. Taêm ênam aê ma ônam aê sa. Ôkêŋ ŋagêjô êndêŋ lau, taŋ sêlêsu aê naŋ. Ôê kanôŋ êsêac e sênac aê êndu nec atom. Taêm ênam gebe êsêac sêsôm biŋ kêsi-kêsigeŋ kêpi aê kêtu aômnêm ŋaêŋa. 16 Aômnêm biŋ gêôc ŋoc ŋalêlôm tôŋ. O Apômtau, lausiŋ undambêŋa nêŋ Anôtô, nêm biŋ gêgôm aê têtac ŋajam kêsa ma ôlic kêpi-kêpigeŋ. 17 Aê gaŋgôŋ gawiŋ lau ômacŋa ma katu samuc gawiŋ êsêac atom. Aôm lêmam kêkanôŋ aê, tec gamoa ŋoc lêtêgeŋ ma nêm têmtac ŋandaŋ gêjam aê auc. 18 Kêtu asageŋŋa gêŋwapac kêkôniŋ aê gêmoa. Kêtu asageŋŋa lau sêjam aêŋoc kamoc sa kêtôm atom. Kêtu asageŋŋa aêŋoc kamoc gemo atom. Aôm gobe ôŋgôm aê amboac bu, taŋ ŋakeleŋ kêsa gêdêŋ têm oc kêsaŋa naŋ me.”
19 Apômtau gêjô biŋ tonaŋ amboac tonec gebe “Aôm embe ômu ôndêŋ aê ômôêŋ, go jakôc aôm sa êtiam ma aôm ôtu aêŋoc sakiŋwaga êtiam. Aôm embe ôsôm biŋ ŋanô teŋ, biŋ agwa-agwa atom, go aôm ôtu ŋoc propete êtiam. Lau oc sêmu dêndêŋ aôm sêwac, tec aôm ôndêŋ êsêac ôna atom. 20 Aê oc jakêŋ aôm ôtu tuŋbôm bras ŋajaŋa êndêŋ êsêac. Êsêac oc sênac siŋ êndêŋ aôm, mago sêku aôm tulu atom. Aê gabe jamoa jawiŋ aôm ma japuc aôm tôŋ to janam aôm sa. 21 Aê oc janam aôm kêsi aŋga lau sec to alôb-alôb nêŋ ŋaclai. Aê Apômtau tau, kasôm biŋ tonaŋ.”
16:1–17:27 Lau Juda sênaŋa ŋapuc kêsêp ŋasêbu tonec. Jeremia keteŋ mec gebe Apômtau ênam eŋ sa ma Anôtô gêjac biŋsu lau gebe sênam dabuŋ om sabat.