1 Gêdêŋ bêc teŋ lau undambêŋa jasêpi tageŋ kêtiam gebe sêkô Apômtau laŋônêmŋa. Ma Sadaŋ gêô lasê gêwiŋ êsêac amboac tonaŋgeŋ. 2 Apômtau katu kênac Sadaŋ gebe “Ma aôm gômôêŋ aŋga ondoc.” Sadaŋ gêjô Apômtau awa gebe “Aê gaja ônê ma gamêŋ onec to gajac laoc nom ŋagamêŋgeŋ.” 3 Go Apômtau kêsôm gêdêŋ Sadaŋ gebe “Aôm gôlic ŋoc sakiŋwaga Job me masi. Ŋac teŋ kêtôm eŋ gêmoa nom atom. Eŋ kêsa nê lêŋ tolaŋônêm sawageŋ ma eŋ ŋac gêdêŋ. Eŋ ketoc aê sa ma gejob tau gêdêŋ sec. Aôm kôkac aê e galôc sa gêdêŋ aôm, gebe onseŋ eŋ su ŋabiŋmêgeŋ. Mago eŋ kêsap nê kêkêŋ gêwiŋ tôŋ ŋapaŋ.” 4 Sadaŋ gêjô Apômtau awa gebe “Ŋaôlic êjô ŋaôlic. Ŋamalac ênac da tau ŋa gêŋ samob, taŋ gêc eŋŋa naŋ, gebe êmoa mata jali. 5 Galoc ômêtôc lêmam ma ômoasac Job ôli to nê ŋatêkwa acgom, go eŋ êpuc boa aôm êpi têmbêlamgeŋ.” 6 Tec Apômtau kêsôm gêdêŋ Sadaŋ gebe “Amboac tonaŋ, eŋ kêsêp aôm lêmam, tageŋ onseŋ eŋ su ênaŋa atom.”

7 Go Sadaŋ gêwi Apômtau laŋônêmŋa siŋ ma kêkêŋ kamoc gêjac têc Job ôli auc. 8 Ma Job kêkôc ku ŋapopoc teŋ ma kêgabe nê kamoc ŋatêkwi gêŋgôŋ wao ŋaô. 9 Ma nê awê kêsôm gêdêŋ eŋ gebe “Aôm kôsap nêm kôkêŋ gêwiŋ tôŋ ŋapaŋ me. Ôpuc boa Anôtô ma ômac êndumaŋ.”

10 Job gêjô eŋ awa gebe “Aôm kôsôm biŋ kêtôm awê meloc teŋ. Aêac takôc moasiŋ aŋga Anôtônêgeŋ, ma takôc gêŋwapac atom me.” Gêŋwapac samob tonaŋ ŋai kêtap Job sa, mago eŋ kêsôm biŋ sec teŋ kêsa awasuŋ atom.

11 Ma Jobnê lau têlêac sêmoa, Elipas aŋga malac Teman agêc Bildad aŋga gamêŋ Sua ma Sopar aŋga gamêŋ Nama. Êsêac sêŋô gêŋwapac kêtap Job sa ŋawae, tec sêmasaŋ biŋ sêwiŋ tauŋ ma dêdi sebe sênac eŋ kêsi to sênac eŋ têtac tôŋ. 12 Êsêac sêsa jaêcgeŋ ma sêlic Job, mago sêjala eŋ atom. Gêdêŋ taŋ sêjala eŋ naŋ, êsêac sêpuc taŋiboa sa ma têtaŋ ŋanô. Êsêac sêkac naŋ ŋakwê gêŋgic ma sêpalip kekop kêpi gêja ma kêsêp mêŋgêsac êsêac môkêŋapac. 13 Go sêŋgôŋ sic sêŋgôŋ nom sêwiŋ eŋ kêtôm bêc 7 to gêbêcauc 7, ma lau tau nêŋ teŋ kêsôm biŋ gêdêŋ eŋ atom, gebe êsêac sêlic gebe ênê ŋandaŋ kapôêŋanô.