1 Lau Amor nêŋ kiŋ samob, taŋ sêmoa bu Jordan ŋamakeŋ kêsi gamêŋ oc kêsêpŋa naŋ, ma lau Kanaan nêŋ kiŋ samob, taŋ sêŋgôŋ gwêctali naŋ, sêŋô ŋawae gebe Apômtau gêgôm bu Jordan kêpa kêtu lau Israelŋa e selom bu su, tec nêŋ ŋalêlôm kêtu palê ma nêŋ ŋaclai gêbacnê kêtu lau Israelŋa.

2 Gêdêŋ ŋasawa tonaŋ Apômtau kêsôm gêdêŋ Josua gebe “Ômansaŋ bôjaŋ poc ma ôsa lau Israel êtiam êtu luagêcŋa.” 3 Amboac tonaŋ Josua kêmasaŋ bôjaŋ poc ma kêsa lau Israel aŋga Gibeat-Haralot. 4 Josua kêsa êsêac kêtu ŋam amboac tonecŋa gebe lau to siŋwaga samob, taŋ sêwi Aiguptu siŋ naŋ, sêmac êndu aŋga intêna gamêŋ sawaŋa gêdêŋ taŋ sêwi Aiguptu siŋ su naŋ. 5 Êsêac sêsa lau samob, taŋ sêmêŋ naŋ, mago lau samob, taŋ teneŋi sêkôc êsêac gêdêŋ taŋ sêwi Aiguptu siŋ su ma sêmoa intêna gamêŋ sawaŋa naŋ, tec sêsa êsêac atom. 6 Gebe lau Israel sêsêlêŋ sêmoa gamêŋ sawa kêtôm jala 40 e lau samob to siŋwaga samob, taŋ sêwi Aiguptu siŋ naŋ, sêjaŋa aŋga gamêŋ sawa kêtu êsêac sêkêŋ taŋeŋ Apômtau awa atomŋa, tec Apômtau kêtôc lêma gebe êsêac sêlic gamêŋ, taŋ Apômtau gêjac mata gêdêŋ aêac tameŋi gebe êkêŋ gamêŋ, taŋ su to lêp keseleŋ êndêŋ aêac naŋ atom. 7 Amboac tonaŋ Josua kêsa êsêac gebe êsêac sêsa lau tonaŋ aŋga intêna atom.

8 Gêdêŋ taŋ sêsa lau samob su naŋ, sêŋgôŋ nêŋ gamêŋ becoboŋageŋ e kamoc gemo. 9 Ma Apômtau kêsôm gêdêŋ Josua gebe “Ocsalô tonec aê kakac biŋ majeŋ Aiguptuŋa su aŋga amacnêm.” Tec sê gamêŋ tau ŋaê gebe Gilgal e mêŋgêdêŋ galoc.

10 Lau Israel sê nêŋ becobo sêŋgôŋ Gilgal ma gêdêŋ ajôŋ tonaŋ ŋabêc kêtu 14 ŋagêbêc êsêac sêlic om Pasa. Êsêac sêmoa malac Jeriko ŋagamêŋ gaboaŋŋa. 11 Seŋ Pasa su ma ŋageleŋ êsêac seŋ gamêŋ tau ŋakôm ŋanô, seŋ polom ŋaluc to polom ŋanô, taŋ sêpac naŋ, gêdêŋ bêc tonaŋgeŋ. 12 Ma mana tau gêbacnê gêdêŋ bêbêcgeŋ tonaŋ, gêdêŋ taŋ seŋ gamêŋ tau ŋakôm ŋanô naŋ. Ma lau Israel têtap mana sa kêtiam atom, seŋ gamêŋ Kanaan ŋakôm ŋanô gêdêŋ jala tonaŋ.

13 Gêdêŋ taŋ Josua gêmoa Jeriko ŋamalac gala naŋ, eŋ gêôc mataanô sa ma gêlic ŋac teŋ kêkô eŋ laŋônêmŋa. Ŋac tau gê nê siŋ sa ma kêmêgôm siŋ tau ŋa lêma. Josua gêdêŋ eŋ gêja ma kêsôm gêdêŋ eŋ gebe “Aêacma ŋac aôm me ma ŋacjonêŋ ŋac aôm.” 14 Ma eŋ kêsôm gebe “Masi, aê Apômtaunê siŋwaganêŋ laumata. Galocgeŋ tec gamêŋ.” Go Josua gêu tau jagêc laŋôanô gêdêŋ nom ma keteŋ mec to kêsôm gêdêŋ eŋ gebe “Ŋoc apômtau êjatu biŋ ondoc êndêŋ nê sakiŋwaga.” 15 Ma Apômtaunê siŋwaganêŋ laumata kêsôm gêdêŋ Josua gebe “Ônu atapa su aŋga amtapa, gebe gamêŋ, taŋ kôkô naŋ, gamêŋ dabuŋ.” Ma Josua gêgôm kêtôm tonaŋ. *Gilgal ŋam gebe Takac su.