16
Lau sêjatu gêŋtalô
(Mar 8:11-13; Luk 12:54-56)
Ma Parisai to Sadukai dêdêŋ Jesu jasêlêtôm eŋ ma teteŋ eŋ gebe êtôc gêŋtalô umdambêŋa teŋ êndêŋ êsêac sêlic. Tec eŋ gêjô êsêac aweŋ gebe “Êndêŋ êtula amac asôm gebe ‘Gêjac wêcdêlaŋ, oc gamêŋ ŋajam.’ Ma bêbêc asôm gebe ‘Gêjac wêcdêlaŋ ma gamêŋ kêtuŋ tau. Ocsalô gamêŋ oc êtu sec.’ Gamêŋ ŋapuc tec ajala, mago têm to noc ŋabelo tec ajam kauc. GôIôac sec to mockaiŋŋa sêgôm mocsac gêŋtalô, mago gêŋtalô teŋ oc êndêŋ êsêac atom, gêŋtalô Jonaŋa tageŋ.” Go gêjam dêmôê êsêac gacgeŋ sêkô ma gêc gêja.
Parisai to Sadukai nêŋ jist
(Mar 8:14-21)
Ŋacseŋomi jasêsô ŋamakeŋ ônêŋa ma sêliŋ polom siŋ sêkôc gêwiŋ atom. Tec Jesu kêsôm gêdêŋ êsêac gebe “Alic ma ajop taôm ŋapep êndêŋ Parisai to Sadukai nêŋ jist.” Ma êsêac taêŋ gêjam gêc tauŋŋa ma sêsôm gebe “Kec, aêac takôc polom gêwiŋ atom, tec kêsôm biŋ tonec.” Ma Jesu kêjala ma kêsôm gebe “O amac, akêŋ gêwiŋ kwalec, kêtu ageŋŋa amac taêm gêjam gêc taômŋageŋ gebe akôc polom gêwiŋ atom. Nêm kauc kêsa atom tageŋ me. Taêm gêjam polom lemeŋ teŋgeŋ, naŋ gêdêŋ lau 5,000 me masi. Ma ajoŋ ŋagêdô-gêdô sa ŋagadob tendocgeŋ. 10 Ma polom 7, naŋ gêdêŋ lau 4,000 naŋ amboac ondoc. Ajoŋ ŋagêdô-gêdô sa ŋagadob tendocgeŋ. 11 Amboac ondoc nêm kauc kêsa atom gebe aê kasôm biŋ kêpi polom gêdêŋ amac nec atom. Ajop taôm êndêŋ Parisai to Sadukai nêŋ jist.” 12 Gêdêŋ tonaŋ nêŋ kauc kêsa gebe eŋ kêsôm biŋ sejop tauŋŋa kêpi jist polomŋa atom, kêsôm kêpi Parisai to Sadukai nêŋ mêtê.
Petere kêsôm Jesu ŋam
(Mar 8:27-30; Luk 9:18-21)
13 Jesu kêsa gamêŋ Kaisarea Pilipiŋa, go kêtu kênac gêdêŋ nê ŋacseŋomi gebe “Lau sêsam Ŋamalacnê Latu sebe asa.” 14 Ma êsêac sêjô eŋ awa gebe “Lau ŋagêdô sebe ŋackêsagu Joaŋ, ma ŋagêdô sebe Elia, ma ŋagêdô sebe Jeremia me propetenêŋ teŋ.” 15 Go gêjam kênac êsêac gebe “Ma amac nec asam aê abe asa.” 16 Go Simon Petere gêjô eŋ awa gebe “Aôm Kilisi tau, Anôtô mata jali nê Latu aôm.” 17 Ma Jesu gêjô eŋ awa gebe “Jona latu Simon, aê aoc êôc aôm gebe ŋamalac teŋ geoc biŋ tonaŋ lasê gêdêŋ aôm atom, Tamoc taugeŋ, taŋ gêŋgôŋ undambê naŋ. 18 Ma aêgeŋ mêŋjasôm êndêŋ aôm gebe Petere, aôm poc teŋ ma jansuŋ ŋoc gôlôac sa êsêp poc tonec naêkô, ma lamboam ŋaŋaclai êku tulu atom. 19 Aê jakêŋ gamêŋ undambêŋa ŋaki êndêŋ aôm gebe gêŋ, taŋ aôm ôi tôŋ aŋga nom naŋ, oc si tôŋ aŋga undambê ma gêŋ, taŋ aôm ônac pêla aŋga nom naŋ, oc sênac pêla aŋga undambê.” 20 Go gêjam ŋacseŋomi aweŋ auc gebe sêsôm eŋ wae Kilisiŋa lasê êndêŋ lau teŋ atom.
Kilisi geoc êmac êndu to êndi saŋa lasê
(Mar 8:31–9:1; Luk 8:22-27)
21 Gêdêŋ tonaŋ Jesu geoc lasê gêdêŋ nê ŋacseŋomi kêtu ŋamata gebe “Aê oc jana Jerusalem ma laumata to dabuŋsêga ma biŋsutau sêkêŋ ŋandaŋ taêsam êndêŋ aê ma sênac aê êndu e ŋabêc êtu têlêac, go jandi sa matoc jali êsa êtiam.” 22 Tec Petere gê eŋ jakêsôm eŋ gebe “Apômtau, Anôtô êkô biŋ tonaŋ auc. Biŋ amboac tonaŋ êtap aôm sa atommaŋ.” 23 Tec Jesu kêsa tau ôkwi jakêsôm gêdêŋ Petere gebe “Sadaŋ, ôkôc taôm sa naôkô jaêc, aôm gôwa lakô aê. Aôm taêm gêjam biŋ Anôtôŋa atom, taêm gêjam biŋ ŋamalacŋageŋ.”
24 Go Jesu kêsôm gêdêŋ nê ŋacseŋomi gebe “Ŋac teŋ embe taê ênam gebe êsap aê tôŋ, naŋ ênac kapoac tau ma êôc nê kakesotau êndaŋguc aê, 25 gebe ŋac teŋ embe êŋgôm mocsac gebe êmoa mata jali, naŋ oc êmac êndu. Ma teŋ embe êmac êndu êtu aêŋa, naŋ oc êŋgôŋ mata jali. 26 Ŋac teŋ embe ênsôb gêŋ nomŋa samob sa êtu ênê gêŋ, mago êjaiŋ katu, oc ênam eŋ sa me masi. Oc ênam eŋ sa atom. Ŋamalac oc ênac da katu ŋa asageŋ. 27 Gebe Ŋamalacnê Latu oc êmêŋ to Tamanê ŋasawi ma nê aŋela oc sêwiŋ, ma êkêŋ ŋagêjô êndêŋ ŋamalac samob êndêŋ-êndêŋgeŋ êtôm gêŋ, taŋ êsêac tau ŋ sêgôm. 28 Biŋŋanô, aê jasôm êndêŋ amac gebe Êsêac tec sêkô nec nêŋ ŋagêdô oc sêmac êndu atomgeŋ, e sêlic Ŋamalacnê Latu tonê gôliŋ êmêŋ acgom.” * Apômtau gêjam dôŋ Parisai to Sadukai nêŋ mêtê kêpi jist. Jist êtôm gebe polom samucgrŋ auc (alic Mat 13:33) ma Parisai to Sadukai nêŋ mêtê êtôm gebe êenam launêŋ ŋalêlôm auc amboac tonaŋgeŋ. Ŋaê Petere ŋam be poc. (Alic Joaŋ 1 42)

*16:28: Apômtau gêjam dôŋ Parisai to Sadukai nêŋ mêtê

16:28: Ŋaê Petere ŋam be poc. (Alic Joaŋ 1 42)