88
Ŋac togêŋwapac nê wê kêtaŋ tauŋa
1 O Apômtau, taŋ kôtu aêŋoc kêsiwaga to Anôtô naŋ,
aê gamôêc gêdêŋ ocsalô ma aoc gêjac aôm gêdêŋ gêbêc.
2 Ôŋô ŋoc mec
ma wê taŋam ŋoc taŋiboa gebe ônam sa.
3 Gebe katuc gêôc gêŋwapac e têkwa gêbac
ma kasa paŋ lamboam ŋalêndaŋ.
4 Êsêac sêsam aê gawiŋ lau, taŋ sê su sêsêp sêlêlôm sêja naŋ.
Aê katôm ŋac, taŋ nê ôliwalô gêjaŋa su naŋ.
5 Aêŋoc mê gêc ŋacmatê ŋalêlôm
katôm êsêac, taŋ sêjac êsêac êndu sêc sêlêlôm naŋ.
Lau tonaŋ ŋai aôm taêm gêjam êsêac kêtiam atom
gebe lêmam gêjam êsêac sapu sugac.
6 Aôm kôtiŋ aê su kasêp lamboam ŋalabuanô gaja,
kasêp gêsuŋbôm ŋakêlêndiŋ sec.
7 Aômnêm têmtac ŋandaŋ kêsac aê êndu.
Ma nêm têmtac ŋandaŋ ŋadembom samob kêkôniŋ aê tôŋ.
8 Aôm kôkêŋ ŋoc lau mêŋbaŋ samob sêjac jaê aê gebe sêlic aê amboac gêŋ ŋanô masi teŋ.
Kôlai aê auc, tec gabe jasa e jatuc-jatuc.
9 Gaŋgôŋ jageo e matocanô kêtu wao.
O Apômtau, aê aoc gêjac aôm kêtôm bêcgeŋ ma galam lemoc gêdêŋ aôm.
10 Aôm oc ôŋgôm gêŋtalô êpi ŋacmatê me masi.
Êsêac oc dêndi mêŋsêlanem aôm me masi.
11 Êsêac oc sênac miŋ biŋ êpi aômnêm têmtac gêwiŋ teŋgeŋŋa aŋga sêlêlôm me masi.
Oc sêsôm biŋ êpi aômnêm biŋ ŋaŋêŋ aŋga gêŋ gêmôb ŋamala me masi.
12 Êsêac oc sêsôm aômnêm gêŋtalô ŋawae aŋga gêsuŋbôm me masi.
Oc sêsôm nêm biŋgêdêŋ lasê aŋga gamêŋ sêliŋ tauŋ siŋŋa me masi.
13 O Apômtau, amboac tonaŋ aoc gêjac aôm.
Ŋoc mec gêdêŋ aôm gêwac kêtôm bêbêcgeŋ samob.
14 O Apômtau, amboac ondoc kôtiŋ aê su
ma gôsaŋ laŋômanô auc gêdêŋ aê.
15 Aê tekoc saki masi gêdêŋ ŋapalêgeŋ ma tec gamoa jageo ŋapaŋ.
Aê tekoc gêbac kêtu nêm ŋagêjô ŋawapacŋa.
16 Aôm têmtac ŋandaŋ ŋawaô kêku aê tulu.
Aômnêm gêŋwapac kêtakê aê e katuc uŋ tageŋ.
17 Kêtôm bêc samob kêkôm aê auc amboac bu ŋasamac
ma gêjam aê auc samucgeŋ.
18 Aôm kôkêŋ ŋoc ŋac to tawaŋ sêjac tauŋ gêŋgic aŋga aêŋoc
ma galic gêsuŋbôm kêtu ŋoc tawaŋ.