18
Babel kêku sa
1 Tonaŋ su, go galic aŋela tauŋa teŋ aŋga undambê kêsêp gêmêŋ, eŋ toŋaclai kapôêŋ, ma nê ŋawasi kêpô nom. 2 Eŋ gêmôêc ŋa awa kapôêŋ gebe
“Sêku Babel kapôêŋ tulu, sêku tulugac,
Babel kêtu ŋalau sec nêŋ malac sêŋgôŋŋa
ma kêtu ŋalau ŋatêmui to moc sec, taŋ ŋamalac dedec naŋ ŋagêsuŋ,
3 gebe lau samuc samob sênôm ênê wain mockaiŋoŋa
to kiŋ nomŋa sêgôm mockaiŋ gêdêŋ eŋ
ma eŋ mata katu gêŋboa, tec gêjam ôli gêŋ gêdêŋ lau-têtuiu-gaŋwaga nomŋa ŋawaô e êsêac têtu lau toêlôm.”
4 Go gaŋô awa teŋ kêsa aŋga undambê gebe
“O ŋoc lauac, awi malac tonaŋ siŋ
asa amêŋ, gebe awê kaiŋ ênê sec awiŋ atom,
ma atap ênê gêŋwapac sa awiŋ atom.
5 Eŋ gêgôm sec jagêboa-jagêboa
ma ŋatêpôê kêpi e jagêjam undambê tôŋ,
ma Anôtô taê gêjam ênê lêŋ keso tonaŋ gêmoa.
6 Aŋgôm êndêŋ eŋ êtôm eŋ gêgôm gêdêŋ amac.
Akêŋ ênê kôm sec ŋagêjô êndêŋ eŋ êtu dim luagêc.
Eŋ kêjaliŋ gêŋ anômŋa toŋaclai kêsêp laclu teŋ,
tec amac ajaliŋ gêŋ toŋaclai êsêp laclu teŋ êtu dim luagêc.
7 Eŋ ketoc tau sa ma kêmoasiŋ tau ŋasec,
tec akêŋ ŋagêjô ŋandaŋ to gêŋwapac ŋadôŋ êtôm ênê gêŋ tonaŋ.
Eŋ kêsôm gêdêŋ tau gêc nê ŋalêlômgeŋ gebe Aê awêtuc atom,
aê gaŋgôŋ kwinnê lêpôŋ
ma gêŋwapac teŋ oc êtap aê sa atom.
8 Kêtu tonaŋŋa gêŋ ŋandaŋ tonec ŋai êpi eŋ êndêŋ bêc tageŋ gebe
gêmacanô to gêŋwapac ma tôbôm to ja êniŋ eŋ
gebe ênê mêtôcwaga, Apômtau Anôtô, eŋ ŋac ŋajaŋa.”
9 Kiŋ nomŋa, taŋ sêgôm mockaiŋ gêdêŋ eŋ to sêmoasiŋ tauŋ ŋasec sêwiŋ eŋ naŋ, êndêŋ bêc sêlic ja êniŋ gamêŋ ŋajadauŋ naŋ, oc sênam aweŋ su to têtaŋ taŋiboa ŋanô êtu eŋŋa. 10 Êsêac oc sêkô jaêcgeŋ gebe têtêc tauŋ êtu ênê andaŋŋa ma sêsôm gebe
“Ojae, ojae, aôm malacsêga Babelma,
aôm malac ŋajaŋa,
mago sêmêtôc aôm gêdêŋ ockatu ŋasawa tageŋgeŋ.”
11 Ma lau-têtulu-gêŋwaga nomŋa sêpuc taŋiboa sa ma têtaŋ kêpi eŋ gebe lau teŋ oc sênam ôli êsêacnêŋ waba êtiam atom. 12 Waba tau tonec gold to silber ma pocawa to kêkôm ma obo sêpsêp to asôsamuc ma ŋawasi to bomsamuc, ka ŋamalu tokaiŋ-tokaiŋ ma andu ŋagêŋlêlôm, taŋ sêmasaŋ ŋa bôc ŋajabo to ŋa ka ŋajam-ŋajam ma ŋa ki kokoc to jejec ma ŋa poc ŋawasi, 13 ma môsê to katêkwi ma gêŋmalu to saliŋ ma gêŋmalu jadauŋŋa, ma wain to niptêkwi ma polom to jaŋgom ma bulimakao to domba ma hos to kareta ma gêŋôma to ŋamalacnêŋ katuŋ. 14 Ma lau-têtulu-gêŋwaga sêsôm gebe
“Ŋanô taŋ gôgôm mocsac naŋ, kêtaiŋ tau su aŋga aômnêm.
Ma moasiŋ nomŋa to gêlôŋ samob gêwi aôm siŋ gêjaŋa,
ma oc ôtap gêŋ tonaŋ ŋai ŋateŋ sa êtiam atomanô.”
15 Lau-têtulu-gêŋwaga taŋ têtu lau tolêIôm kêtu eŋŋa naŋ, sêkô jaêcgeŋ gebe têtêc tauŋ kêtu ênê ŋandaŋŋa ma sêpuc taŋiboa sa ma têtaŋ gebe
16 “Ojae, ojae, malacsêga tauma.
Eŋ kêsô ŋakwê kwalam-kwalam to asôsamuc ma bomsamuc
ma gêjam gêlôŋ tau ŋa gold to pocawa ma kêkôm.
17 Mago geŋ tolêlôm-tolêlôm tau gêjaŋa gêdêŋ ockatu ŋasawa tageŋgeŋ.”
Ma kapitai waŋŋa samob ma lau, taŋ sêjam ôli waŋ gebe sêna gamêŋ teŋgamêŋ teŋ naŋ, ma lau waŋŋa to êsêac samob, taŋ sêjam kôm gwêcŋa naŋ, sêkô jaêcgeŋ. 18 Êsêac sêlic ja geŋ malac tau ŋajadauŋ, tec têtaŋ ma sêsôm gebe
“Asa malac teŋ kêtôm malacsêga tônê.”
19 Êsêac segaiŋ kekop mêŋsêpalip kêpi môkêŋapac ma sêpuc taŋiboa sa ma têtaŋ to sêmôêc gebe
“Ojae, ojae, malacsêga tauma.
Ênê gêŋ tolêlôm-tolêlôm gêgôm lau samob, taŋ nêŋ waŋ kêpoac gwêc naŋ, têtu lau tolêlôm.
Mago gêjaŋa gêdêŋ ockatu ŋasawa tageŋgeŋ.
20 O undambê to Anôtônê lau ma aposolo to propete,
têmtac ŋajam êsa êtu malac tônêŋa,
gebe Anôtô kêmêtôc malac tau gêjô sec,
taŋ gêgôm gêdêŋ amac naŋ sugac.”
21 Go aŋela ŋajaŋa teŋ gêôc poctêmui kapôêŋanôtêna teŋ sa ma gêu kêsêp gwêc gêja ma kêsôm gebe
“Sêu malacsêga Babel gôdub tageŋ amboac tonaŋ
ma têtap malac tau sa êtiam atomanô.
22 Ma sênac gêŋ wêŋa to oŋ
ma sêju gasuc to sênac dauc êtaŋ aŋga nêm malacluŋ êtiam atom.
Ma têtap lau lemeŋ mêtêŋa tokaiŋ-tokaiŋ samob sa sêmoa aôm ŋalêlôm êtiam atom.
23 Lamp ŋawê teŋ êpô aôm êtiam atom,
ma sêŋô awêlagêc ŋac sênam tauŋ ŋaonda aŋga aômnêm êtiam atom.
Biŋ tonaŋ êtap aôm sa gebe aômnêm lau-têtulu-gêŋwaga têtu nom ŋatau kapôêŋanô.
Ma kôsau lau samuc nomŋa samob ŋa nêm biŋ beŋŋa.”
24 Ma têtap propete ma Anôtônê lau to lau samob, taŋ sêjac êndu aŋga nom naŋ, nêŋ dec sa aŋga malac tau.