1 O lasitêwaac, aê galic amac ajala biŋsu ŋam, tec ŋoc biŋ tonec êndêŋ amac gebe Biŋsu gêjam gôliŋ ŋamalac kêtôm nêŋ têm, taŋ sêmoa mateŋ jali aŋga nom naŋgeŋ. 2 Awê teŋ embe ênam ŋac, go biŋsu êmbiŋ êsêagêc tôŋ sêpi tageŋ e ŋac tau êmac êndu. Ŋac tau embe êmac êndu su, go biŋsu, taŋ gêbiŋ êsêagêc tôŋ naŋ êmbacnê. 3 Amboac tonaŋ awê tau nê akweŋ embe êmoa ma ênam ŋac teŋ, oc êŋgôm biŋ sêjam tauŋŋa popoc. Mago nê akweŋ embe êmac êndu, go biŋsu êmbiŋ êsêagêc tôŋ êtiam atom. Ma awê tau embe ênam ŋac teŋ, oc êŋgôm biŋ sêjam tauŋŋa popoc atom.

4 O ŋoc lasitêwaac, amacnêm biŋ amboac tonaŋ. Amac awi biŋsu siŋ kêtôm amac êndu su, gebe atu Kilisinê ôli awiŋ, tec atu ŋac, taŋ Anôtô gêŋu eŋ sa aŋga ŋacmatênêŋ naŋ, nê gêŋgac, gebe tanam ŋanô ŋajam êtu Anôtôŋa. 5 Gêdêŋ taŋ taêŋ gêjam tauŋ ôliŋgeŋ tamoa naŋ, biŋsu kêjali sec ŋagêŋ têntac kalacŋa sa, mêŋgêjam kôm aŋga ôliŋ ŋagêŋlêlôm samob e kôm tau ŋaŋanô gebe gêmacanô tau. 6 Ma galoc biŋsu, taŋ gêbiŋ aêac tôŋ naŋ, gêbacnê ma tamac êndu, tec dawi gêŋ, taŋ gêsô aêac tôŋ naŋ siŋ. Tec galoc tanam sakiŋ têndaŋguc lêŋ laŋgwa, taŋ teto gêc biŋsu naŋ, êtiam atom, tanam sakiŋ têndaŋguc Ŋalaunê lêŋ wakuc.

7 Ma oc tasôm biŋ amboac ondoc. Biŋsu tau oc gêŋ sec me. Masigoc, amboac tonaŋ atom. Biŋsu embe êtôc sec êndêŋ aê atom, oc jajala sec atom. Biŋsu kêsôm gebe “Matam katu atom.” Embe ênac jao biŋ tonaŋ atom, oc jajala biŋ matoc katuŋa atom. 8 Sec tau gesom lêŋ êjali têtac kalacŋa sa aŋga ŋoc ŋalêlôm, tec kêtap sa gêc biŋsu ŋajao to ŋajatu ŋalêlôm. Embe biŋsu masi, oc sec tau êtu gêŋ matê. 9 Gêdêŋ taŋ gajam kauc biŋsu naŋ, gamoa matoc jali e biŋsu ŋajao mêŋgêô lasê, tec sec tau mata jali kêsa ma aê gamac êndu. 10 Ma biŋsu ŋajatu, taŋ gebe êkêŋ aê jaŋgôŋ matoc jali naŋ, kêkêŋ aê gêmac êndu. 11 Gebe sec tau gesom lêŋ e kêtap sa gêc biŋsu ŋajao to jatu ŋalêlôm, tec kêtim aê e biŋsu tau gêjac aê êndu. 12 Amboac tonaŋ biŋsu tau gêŋ dabuŋ, ma biŋsu ŋajatu to jao gêŋ dabuŋ to gêdêŋ ma ŋajam amboac tonaŋ.

13 Ma amboac ondoc, gêŋ ŋajam tonec kêkêŋ aê gamac êndu me. Masianô, amboac tonaŋ atom. Sec tau gêgôm. Sec tau kêtu awê ŋalêŋ gêjam gêŋ ŋajam laŋô mêŋkêkêŋ aê gêmac êndu. Lêŋ tonaŋ gêwa sa gebe biŋsu ŋajatu to jao kêkêŋ sec gêjam sêga. 14 Aêac tajala gebe biŋsu ŋam kêsêp Ŋalau. Mago aê ŋamalac nomŋa, tec sec kêkôniŋ aê e gajam sakiŋ sec tau. 15 Aê gajam kauc gêŋ, taŋ gagôm naŋ, gebe gêŋ, taŋ têtac gêwiŋ gabe jaŋgômŋa naŋ, gagôm atom. Mago gêŋ, taŋ têtac gedec gabe jaŋgôm atomŋa naŋ, tec gagôm. 16 Embe jaŋgôm gêŋ, taŋ têtac gedec naŋ, go êwa sa êndêŋ aê gebe biŋsu tau ŋajam. 17 Amboac tonaŋ, tec aê tauc gagôm gêŋ tonaŋ atom, sec taŋ gêc ŋoc ŋalêlôm naŋ, tec gêgôm. 18 Aê ŋamalac ŋaôma tonec kajala taucgac gebe gêŋ ŋajam teŋ gêc ŋoc ŋalêlôm laŋgwa tonec atom. Aê têtac gêwiŋ gebe jamansaŋ gêŋ ŋajam, mago katôm gebe jaŋgôm ŋajam tau ŋanô êsaŋa atom. 19 Gebe gêŋ ŋajam, taŋ têtac gêwiŋ gabe jaŋgômŋa naŋ, tec gagôm atom, mago sec, taŋ têtac gedec gabe jaŋgôm atom ŋa naŋ, tec gagôm. 20 Aê embe jaŋgôm gêŋ, taŋ têtac gedec naŋ, go aê tauc jaŋgôm gêŋ tau êtiam atom. Sec taŋ gêc ŋoc ŋalêlôm naŋ, tec gêgôm.

21 Amboac tonaŋ aê katap ŋagôliŋ tonec sa gebe Gabe jaŋgôm gêŋ ŋajam, mago sec kêsap aê tôy tec geseŋ. 22 Aê têtac gêwiŋ Anôtônê biŋsu ŋanôgeŋ gêc ŋoc ŋalêlôm, 23 mago aê kêsaê tauc gebe biŋsu teŋ gêc ŋoc ôlic ŋagêŋlêlôm. Biŋsu tonaŋ gêjac siŋ gêdêŋ biŋsu, taŋ gêc ŋoc kauclêlôm naŋ, e gêsô aê tôŋ kasô sec ŋabiŋsu, taŋ gêc ŋoc ôlic ŋagêŋlêlôm naŋ ŋalabu. 24 Ijoc aêma, asa êjaŋgo aê su aŋga ôlic togêmac tonec. 25 Aê gajam daŋge Anôtô kêtu aêacnêŋ Apômtau Jesu Kilisiŋa. Amboac tonaŋ kasôm biŋ tonec gebe Ŋoc kauc tec gajam sakiŋ gêdêŋ Anôtônê biŋsu, ma ŋoc ŋalêlôm laŋgwa tec gajam sakiŋ gêdêŋ sec ŋabiŋsu.