3
Gote-me Oyae Luabu Papena Yapidi Ia
1 Oyae luabu go su-amaa opeare
nipuna opape yapidina opea.
2 Gote-me niaa onaa go su-amaa madiape di gua wala omape di page gea.
Eta wai poape yapidi page gua eta naape awape yapidi page gea.
3 Gote-me onaa yaina maetape page aa tumaope yapidi page luabu nipumi saaya.
Nipumi oyae maoyaatua wala maepeape yapidi page nipumi ama pea.
4 Nipumi re lape yapi di page giri lape yapidi page nipumi ama saaya.
Odo omape di page yasa pawa lape di page saaya.
5 Nipumi onaa rapu patape yapidi page saaya rekena sua gimape yapidi page saaya.
Ona ripinape page ona naorape yapidi page saaya.
6 Oyaenu alupae asapape yapidi page oyae alupape yapidi page saaya.
Oyae waru amagepu sape di page saya oyaenu yolo rubape di page saaya.
7 Laplap marae riripia wala rabulape di page saaya.
Agaa lorape yapidi page agaa lape di page saaya.
8 Di mo robaa kalape ao para di mo ratu yawape ao saaya.
Yada pape page gimape yapidi page saaya.
9 Kalaipu kogono peme aanu nimuna meape epe yaere ake meme pae? 10 Gote-me niaa repara epenata kedaare neme aba ade. 11 Gote-me oyae luabu ora epe rupa openata. Nipumi niana kone marekaawa oyae raayo page abia opea yae abade opesa yaenu luabu makua adamonalo kone gea. Goyapare Gote nipuna pea luaburi abade page abia page niaame na-adape-rupa pisa. 12 Neme go mada kone padane sua epe redepota adoa pe. Go epeta konere gupa. Niaame go su-amaa pima raburi kone padane sua pedo waru pua piramina. 13 Eta ipa nalima raburi raana rapu awa namina. Goa palimadare Gote nipumi pa ode gi yae meda madaa rana ora waru omoa namina.
14 Gote nipuna peanu senisi napea-daa neme waru makuaayo. Dia go piane aure oroyalo pa su-aalia. Gote nipumi pulalo peare aa medame makibumawa mada napalia. Gote nipuna pea rayore medame na-alopalimi. Gote-me go pisare onaa luabu nipuna rolo-para pirinalo pisa. 15 Abia go peayaenuri abade page opesa. Yaenu orope paliade-nu page abade pesa yaenu. Gote-me abade pisa yaenu diana kone naia. Dia go yaenu wala opena kone ia.
Onaa Luabuna Kone Na-Epeta
16 Neme ade rabu go su-amaa yae meda gupa iya. Onaame epe kone epe pora ratua apere gimeme. Dia nimumi wae pora ora rateme. 17 Goteme onaanu koso latalo palia raburi neme gupa kone saayo. Epea pi waea pi onaa raayo ado kiritua rumalia kone i yapi medame.
18 Gore Gote nipumi niaa ko tulalo pea kone i. Niaa aanu-ri pa yaa yapanu rupa yade. 19 Niaa aanuna diayape pora-re yaa yapana di iya-rupa mada yade. Yaa yapanu page omeme raburi niaa onaa-rupa mada omeme. Yaa yapanu page mena oyaenu komo meme-rupa niaa onaanu page komo mema. Go yaenu luabu mada kagaa pirape kone wasupa pia. Yaa yapa aarina kone wasupa-me onaana kone wasupa narabua niaya. Nipuna kone wasupa lapo rata pa yae meda rupa yade. 20 Gote-me su mua warisa-pulu nipu omalipi raburi gore nipu rata wala su autepe. 21 Aa medalomame gupa kone imi. Onaana wasare so yaapara pea raa yaa yapa mena aarinuna wasare no su-para pea kone gupa imi. Go yaena re luaburi aapimi makuaaya? 22 Neme ade pare aame nipuna pea kogono rana omape pora padane gore waru yae. Goamere ora rabuaya. Niaa omalima rabu orope ake palia lo medame mada lagialiaya?