19
Lot-para Nipuna Repa Pogola Pisimi.
Aebore mo Ensol lapo Sodom pua opapaisipi. Gore Lot-re adarena kerepo para pirisaya.* Adaa adaanuri ada-rena kerepo para pirala pisimi rupa Lot-re Sodom ada-rena kerepo para pirisa. Nipumi nimu adoare, rekataboa nimu madata pisa, goa pua iniaga su kaloa ma kubunaisa. Na adaa aa lapo, nipumi lalo: Nipina kogono aana adapara kitumu, age radepe, patalipina. Goa pua ribarekore nipina palipina.
Dia nipumi lalo: Mo onaa kiritaemede amaa patalipa.
Lot-me ora dia loa puri pabisa pulu nipuna adapara pisimi. Nipumi eta managolaisa, bret page ist nai irua nisimi. Nimu u pena patulalo pala pirinare Sodom adare para asimi aa rayo, oge adaa rayome ada epa kutapu sabasimi. Nimumi Lot yasimi: Go riba epapede aa lapore ake pape? Amaa nia piri mea ipu, niame nipu pake namona.
Lot nimu adolalo amaa pulawa poragape waru moganiasa. Goa pua lalo: Dia na adami aanu go wae-yaere na palimina. Adalepa, niri nogo lapo, aa rapu abi napati madu ide. Nipu amaa mea epono goa pua nimina rana ratalimina. Go aa lapore yae meda na palimina. Nina ada epape pulu neme nipu ora rabamealua.
Nimumi talo: Pane popa a. Goa pua nimumi lalo: Apo aare pa epa ae aa yade, goa pua abiare nipumi nia surubaluame pana. Aa lapo mada pulaa-pamaare, ne madaa ora waea waru pumuna. Nimumi Lot pane orolo paisimi, goa pua pora gape atubitua rupara odobatalo pisimi.
10 No rupara pirisipide aa lapome Lot yolorua pora-gape agolaeme garula sasipi. 11 Goa pua nipume mo pora-gape para asimide aanu, oge adaa lapo ratana ini ma-rubu paama pisipi. Goa pisa pulu nimumi pora gape adape rupa marisimi.
12 Mo aa lapome Lot-para lalo: Go para nena onaare meda aeme? Nena siwanenu page, gonuna siwanenu page, o pa nena onaanu page go ada kagure-para meda aeme? Aipapulu pua lamu-mua, pane pogola pulupa. 13 Ake peada ya, go su adare apo pabo tu rubalepada. Go adare-para aeme onaame peme waeare ora adata pulu, Adaa Aa-me go adare pabotu rubaponalo sa mea reparia.
14 Go rabu Lote-me wane lapo mulalo pi akua lapo laketa pisa. Nipumi pua lalo: Go su aipapulu gimoa pane pogola baini sa, Adaa Aa-me go ada kagure pabo rubolalo pia! Gore akua lapome pa makirata kone isipi.
15 Riba rekore mo Ensol lapome, Lot aipapulu ma rekaisipi. Nipumi goa sipi: Aipapu tapa! Go aeme nena ore para wane lapo page. Gore go ada kagure talawa nimi talia.
16 Lot-me aipapu na sa raburi, mo Ensol lapome kimina misipi, ore wane lapona ki mina mua aipapulu adarena amanane mea pisipi, gore Adaa Aa-me nimu odome omesa. 17 Nimu ama mea ipuare, mo aa medame goa sa: Pogola pulupa! Goa puare wala napereketua adalepape. Mo paune pare palimi rabu page kitu na piralepape! Nimi omalimiga so rudu rudu pogola pulupa.
18 Naa Adaa Aa-laapo, sogo rudu rudure ora dia. 19 Niri aba raba meape-de, go page ni epe kone sua raba meapede pulu, rana sogo rudu rudure pope-ai nasala, pena pulano apo yaeme ni mealia pulu, ni omalua. 20 Mogo ayaa oge adare parare mada palua. Ni pogola go para pono, gore ora oge adaresiya? Goa palua rabu ni mada epealia.
21 Nipumi lalo: Madaga apo lae adarere natalipa. 22 Goa peaga mogo para aipapulu pogola pulupa, nimi go para abi nape alimina yada napalua. Goane go adarena biri Soa Soa bina rere oge ada-resi. teme.
23 Lot Soa opapaisa raburi nare aba raa ipisa. 24 Go raburi Adaa Aa-me yapara pirumea repena sula yai rupa Sodom Gomora lapona mea repaisa. 25 Nipumi go awaro paunena asa su ada luabu rayo iru rubisa, go adare para asimi onaa rayo para emaapu page iru rubisa. 26 Lot-na ore pereketua adamonesa rabu nipu aipaa ana ausa.
27 Wala yapipure Abraham aba ribareko rekataboa mode pare pisa, aba Adaa Aa rapu agaa sade pare. 28 Nipumi Sodom Gomora lapo adaneasa pare apode awaro paune su rayo page miru kapukapu ropatisada adisa, go mirure adaa repena ropati rupana adisa.
29 Gote-me mo ada kagure iru rubala-awa nipumi Abraham-me sa agaa niminasa. Goa pua nipumi Lot pane mupawa nipu ae adare luabu iru rubisa.
Lot-na Wane Lapo Nipuna Aara Rapu Patisipi
30 Lot-para nipuna wane lapo Soa gimua so pore-para pua asimi. Nipu Soa ape pala omisa pulu, nipuna wane lapo rapu ana apeda meda para asimi. 31 Yapi medame, mupa nogome nipuna aki para lalo: Sana aapare yomagaesi, goa pua saa rumape aa page meda dia. Gore ona rumapeare abade su rayona pia yapulu. 32 Goa pea pulu sana aapare ipa waini nena lapana, goa pua sa nipu rapu patapana, goa pua niana ruru same aapa-rapu maralapana.
33 Go ribare nipuna aapa ipa waini nenasipi, goa pua mupa nogo araa rapu pua patisa. Nipuna wane nipu rapu epa patua reka pisare namakuasa.
34 Wala yapi medame mupa nogome orope nogo para lalo: Ni abala ribare apa rapu patawade. Abia ribare nipu ipa waini wala nena lapana, goa pua ne aaparapu patalipina, goa puare niana ruru, sana aaparapu wala maralapana. 35 Go ribare nipuna araa ipa waini wala nena loa wane orope nogo araa rapu pua patisa. Nipuna wane orope nogo epa patua reka pisa page namakuasa.
36 Lote-na wane laporata aara rapu awa naki pada pirisipi. 37 Mo mupa nogome naki madua nipuna bire Moab Moab bina re-re aapa-na si. sa. Nipuri abia Moab ruru-na ara pia. 38 Wala orope nogome page naki madisa, goa pua Ben-Ammi§ Ben-Ammi bina re-re aakuana si. lo bi maaisa. Nipu page Amonite ruru-na aara pia.

*19:1: Adaa adaanuri ada-rena kerepo para pirala pisimi rupa Lot-re Sodom ada-rena kerepo para pirisa.

19:22: Soa bina rere oge ada-resi.

19:37: Moab bina re-re aapa-na si.

§19:38: Ben-Ammi bina re-re aakuana si.