10
Solomon-na remaa (Robo 10.1–22.16)
1 Solomon nipumi epe-rupa pirape agaa rudu-rudu medaloma tusua gupa-sa.
Nogo naaki medalomame epe kone sua nimumi epe kone ratalimi-rabu agi aaraanumi raana ora waru omalimi.
Go yapare nogo naakinumi wae pora ratua pupitagi noalimiri, agi aaraa-me page lo-robaa kedaa adaa ruaalimi.
2 Ne mone paake noa ama-aalidare, nena go moneme ne epe-rupa naraba mealia rabu ne epe-rupa mada na-aali.
Go yapare neme epe pora ratua amaa yali-dare ne na-rudute.
3 Adaa Aa-me nipu madaa kone rulaawa pimi onaa, eta nape oyae luabu asa pina kone na-ia.
Goa pea pare mo waeya peme onaa-re nimu ama-yape, eta asapeme yaenu asapinalo pora poaaya.
4 Ki-aa raakepea kogono napaliri, reaeme omoa aa naara pirali pare neme puri paloa kogono waru pali-dare, ne eta page amo yape page ne oyae meda na-rudu tea-pulu epe-rupa aali.
5 Kone waru i aamere eta napeta rabu mea kirita suaaya.
Go yapare ki-aa rakepea kogono waru napaliari nimina ona nogo naaki reaeme omoa yaala polo aalimi.
6 Gote-me epe aanuri nipumi nimu waru rabamuaaya.
Goa pea pare wae aa-me nipuna kudiri agaa teme rabu onaanu medaloman kone mabebola tea.
7 Gore aa epe meda omea raburi onaame go aa-na epe kone niminaawa goa-da pisade loa pedo waru peme.
Go yapare wae aanu meda omeme raburi mo onaa luabumi go aa naniminae aipapulu kone rugulaeme.
8 Epe kone-i aanumiri pa aa medame epa-ta agaa page waru aina madu pageme.
Pare yaa-agaa loa agaa ipa rukini ritimi aanuri nimu ora pa-rupa oteme.
9 Epe kone sua epe-rupa piri onaare redepone-rupa pirualimi.
Go yapare onaa waea palimidere, nimuna peme wae yaenu kudiri-pu na-i pename salia.
10 Yaa agaa ne aanumi pupitagi adaapu neme pare pupitagi ne aanu nimu yaa agaa adaapu loa waea peme-pulu nimu bebolo talia.
Go pea pare aa medame agaa pename loa onaa mada raba muaya.
11 Epe redepone aanuna agaa-re ora epe ipa laipi kata ipa-rupa yade.
Go yapare wae aanuna kone pa kudiripu sabaawa onaa mabebola teme.
12 Lo-robaa wae-imi raburi wae-yae maepaaya.
Goa pea pare aa yago meda raana omea aamere wae yae luabu pename ma-opaaya.
13 Redepone kone i aamere nipuna epe redepone kone agu lapepedepeta.
Goa pea pare wae kone imi aanu aipuya-me mea kudu teme.
14 Epe pora ratua epe kone imi aanuri makuae yae waru mua aipapulu nalapaeme.
Aa medame yaa-agaa teadare, wae yae aipapulu gopara opapaaya.
15 Gore ada kagure kepo pua imi-rupare amone aanu nimuna yaenumi nimu kuta pua ora epe-rupa pimi.
Goa peme pare aa naara luaburi nimu oyae ruduta-pulu nimu aipapulu beboloa oyalimi.
16 Redepone aa-me nipuna yoto-rupare, oro yalo pirama-lama palia.
Go yapare wae aa-numiri waea adaapu peme.
17 Go yapare aa medame nipu maredepo yaina kone saliadare, kagaa pirape supara palia.
Go yapare aa meda nipu namaredepo-yaeme rabu rada-pia pea aare go epe pora gimea.
18 Aa medame aa yago meda wae kone saliadare, nipumi yaa agaa loa oro yalo waea-pu rabuae aa pename go aaya-da.
Go yapare aa medame aa yagona ma-agaa paliare go aa nipu ora maeya aa aaya.
19 Aa medame agaa adaapu loaalia-daare, go aa nipuna agaame page wae-yae yolo rialia.
Go yapare aa medame agaa adaapu natea-dare, go aa nipu ora epe kone su ayaa.
20 Epe redepone aana agaa-re epe aana silipa-me adea.
Go yapare wae aanuna kone-re bebolo-tea.
21 Epe redepone aa-na agaa-mere onaa adaapu waru rabamea. Goa pea pare onaa epe kone nasalimi-daare go onaa nimu ora omalimi.
Akolo ya? Nimuna kone ora oyotea-pulu nimu omalimi.
22 Go yapare Adaa Aa-me niaa oyaenu pama gea.
Kedaa kogono-me oyaenu nagialia.
23 Epe kone naimi aanu nimu waea pape mada raana waru omoa pupitagi neme.
Go yapare epe kone imi aanuri, nimu epea papena raana omoa epea peme.
24 Wae aanuri oyae luabu madaa paalame omalimi rabu go wae yae luabu nimu piri popalia.
Go pea pare epe kone rulae aamere oyae luabu mada mealimi.
25 Gore wae yapi-di meda go wae onaa repara popolalo palia raburi, gome nimu ora madiayaalia. Gore ipa roa oyae luabu kadepe ritade-rupa goa palia.
Go yapare epe-rupa piri onaa-re nimu puri palo eto napi piralimi.
26 Gore nena kogono pape aare kiaa rakepene aa nameape.
Neme go kogono gi madini aa adali rabu ne marasini ne rabu nena agaa-para rero piade-rupa palia rabu ne gimapalia. Go page nena ini para miru pea rabu poke poke yalade rupa palia.
27 Neme Adaa Aa-na pora kurua oro yalo nipuna rolo-para pirali-dare, ne go su-amaaa adaalupu pirali.
Go yapare wae aanuri go su-amaa adaalupu napiri ora aipapulu aba omalimi.
28 Adaa Aa-na agaa pagoa rati onaamere, Adaa Aa nipuna pea kogono ado-kiritua raaname ora waru omalimi.
Go yapare wae aanuri pama surubama pua, nimumi epe yapi di meda mada na-adalimi.
29 Adaa Aa-me epe redepone onaare waru surubea.
Go yapare nipumi, wae onaare maoyalia.
30 Epe redepone aanuri nimuna ada kagure-para epe-rupa piruaeme.
Go yapare wae pupitagi ne onaare nimu go rupa napiruaeme.
31 Epe aanu nimu oro yalo epe kone sua epe pora rateme-pulu, nimu onaa luabu epe agaa lakelo-aeme.
Goa pea pare wae agaa teme aa luaburi nimu oyalimi.
32 Redepone aa-na agaare onaana aane-para rede warupea,
pare wae aa-na agaamere onaanuna lo robaa-para rero mapaeme.