12
Aa medaloma nimu ora epe kone madaa raaname omoa pa aa medame maredepo agaame madaa page epealia kone imi.
Go yapare aa medame nipuna pea wae yae namaredepo yaena kone aamere nipu ora maeyae aa-rupa pirua pea.
Gore aame epe pora ratua epe kone suayare Adaa Aa-me go aa nipu epe lo robaa kata.
Go yapare aa medame onaa para waea paliare go aa nipuri Adaa Aa-me alupainata.
 
Gore aa meda waea pua epe-rupa napiralia raburi go peame nipu mada naraba mealia-pulu epe-rupa napitia. Nipu puri pabo page napiralia.
Goa pea pare aa meda nipu ora epe pora ratua piraliare repena pitaa su runane pea-rupa mada yapulu aa medame nipu mada narasu lopalia.
 
Aa medana oreme epeanu paliare mo aani go pea kogono-me epe bi kata.
Go yapare mo aa nipuna oreme waea rado rado adaapu pua aani page yala mea kata. Go pua mo ona nipumi peame wae yaina ipua mo aanina uni rodaipa-para odobaawa yaina-rupa mea kata.
 
Epe redepo ne aa-mere oro yalo epea pape madaa raaname waru omea.
Go yapare wae kone sua waea pea aamere oro yalo yala poloa onaana kone mabebola pena wae pora mea watalo pea.
 
Wae aanuna agaa-re aa medalomame kudiripu yada sua aa yago tulalo pemede-rupa kone imi.
Go yapare epe redepone aanuna agaa-me onaa medaloma kedaa rua yaina omeme rabameapena kone sua agaa teme. Epe-rupa pirina kone sua agaa teme.
 
Aa medame waea pualiare nipu oyoa ora alupalia.
Goa palia pare epe redepone aanu-nimuri epe-rupa oro yalo pa piralimi.
 
Aa meda nipu epe kone su aaliare onaame go aa nipuna bi minasalimi.
Go yapare aa meda nipu wae bebone kone saliare onaame go aa nipuna bi mabebo laeme.
 
Aa meda bi waru na-i aa yapare kogono aa meda nipuna ada-para ma-aaliare epe ta.
Pare aa medame nipu adaa aa kone sua naara aanu rabuaatalo kone ia-pulu nipu naepeta rabu eta nape yaenu page rudu neme pama pea.
 
10 Epe redepone aanumi nimuna mena oyae luabu madaa odome waru omoa epe-rupa surubeme.
Go yapare wae aanu nimuna mena oyaenu page waru epe-rupa nasurubeme.
 
11 Aa medame nipuna e maapu waru surubaliare gore nipuna eta nape yae waru salia.
Go yapare aa medaloma epe kone naimiri nimu pama kalai pua kogono pu sua epe ini meda namealia.
 
12 Wae aanu pupitagi noa oyae adaapu wae-rupa meme. Goa pua nimumi oyaenu madaa epame waru omeme.
Epe redepone aanu nimuna meme yaenuri nimuna mo peme epe konena ini raloa meme. Goa pua nimumi oyae ora adaapu imi.
 
13 Wae aa nimuna teme wae agaa-me nimuna bipa nimu adita.
Goa yapare kedaa wae meda epe redepone aanu madaa popeare nimuna epe koneme nimu wala epe-rupa rabamea.
 
14 Neme tede epe agaa-para nena epe pamualide porame ne maepealia.
Goa pua ne epe-rupa piruali.
 
15 Kone epe-rupa na-imi aanumiri nimuna pema oyae rayo ora epe ta kone imi.
Go yapare epe kone imi onaa agaa mana laketeme rabu ora epeta kone imi.
 
16 Epe kone naimi aanumi waea meda pulalo peme raburi nimumi go madaa ratu aipapulu yaweme.
Go yapare epe kone i aa meda ero agaa teme raburi go aa nipu epe kone ia-pulu pinawa kone sua gimalia.
 
17 Koso rabami aa epe yaliare agaa waru eperupa tea.
Go yapare nipu agaa waerupa ne aa yaliare nipumi koso ma-oyalia.
 
18 Aa medame kone waru nasua tea agaa-me epe aa medana robaa-para maoyalia.
Goa palia pare epe redepone kone i aa-me agaa tea-daare mo aana lo robaapara epe kumaa waru katea.
 
19 Yaa teme agaa luaburi pa rudupu yapina ia rabu aanumi kone rugulaawa gimeme.
Goa pea pare ora ne agaa luaburi oro yalo-yalo pa suaalia.
 
20 Aanumi waea peme rabu go pemeame nimuna bipa nimu makiraeme.
Goa peme pare aa medame epe kone sua onaa rabameano kone sua epea palia-daare nipu page epealia.
 
21 Redepone aanumi pupitagi page ora nanoa epe oyae mealimi.
Goa peme pare waea peme aanumiri nimumi wae pupitagi rado-rado adaapu neme.
 
22 Yaa-agaa teme aanu luaburi Adaa aa-me nimu ratu waru yawoa gimea.
Goa pea pare epe kone sua epea peme aanu madaare raana omoa epe ta kone ia.
 
23 Aa meda nipumi epe aanu puayare nipuna epe kone epea luabu aipapulu ratea.
Goa pea pare aa meda nipu epe kone-nai pa wae-kone rubitabe aa nipumi yaa agaa adaapupe madu koyoata. Goa pea pare onaa luabumi nipuna agaa pagoa go aa-re maeyae aa-rupa pia teme.
 
24 Kogono radaa pina paliade aare nipu puri mua mada pitea.
Goa palia pare kiaa rakepene aanuri pama kogono aanu pitimi.
 
25 Go page aa medame oro yalo kone adaapu su aalia-dare nipuna kone oyo tua maeyae aa-rupa pitia.
Goa palia pare wae aa nipuna adami aa-me epe agaa redepone laketea-dare mo nipuna adami aa-me epe kone lo robaa waru katea.
 
26 Epe redepone kone i aanumi nimuna adami aanu epe pora mea wateme.
Go yapare mo wae aanu nimuna adami aanu epe pora gimoa wae pora para mea peme.
 
27 Kiaa rakepene aame yapa asa nola palia pare mo yapa mada natalia.
Pare kalai pua kogono raadapi peme aanuri epe-rupa riri-nane epope aanu go yade.
 
28 Aa neme epe pora ratua aawaliri ne ora epe-rupa oro yalo pirape yada mua ne epe-rupa pirali.
Gore niaame go epe pora ratalimare niaa omape yaeme page nami epe-rupa oro yalo piralima.