14
1 Epe kone ia oname nipuna ada-para page epe kogono pea. Go koneme nipuna nogo naaki onaa luabu raapu puri mapabawa epe-rupa pimi.
Go yapare ona meda nipu epe kone nasaliare nipuna bipa nipuna nogo naaki ada oyae luabu ma-oyaawa wae-rupa pitimi.
2 Epe konena pora ratua pia aamere Adaa Aa-na surube rolo-para pia.
Go yapare yaa agaa ratamea pe aanumiri Adaa Aa-re ora epe yae-da dia kone imi.
3 Epe kone na-imi aanuna agaa teme raburi onaana ini agaana nimumi nimuna bi minasae agaa oraa teme.
Epe kone i aa-na agaa ta rabu ora epe ta-pulu nipu rabamea rabu epe-rupa aaya.
4 Mena gawa su awoa e poape meda diayalia raburi mo eta kirita i ada pa pupaa salia.
Pare mo mena gawame e poalia raburi e-maapu para eta ora adaapu sualia.
5 Koso raba mi aa-me koso ada-para epe redepone agaa tea rabu mo kosome ora ne agaa pagalia.
Go yapare nipu yaa-agaa ne aamere mo ta agaa luabu yaa agaa tea.
6 Wae aakone ne aanu nimu epe kone mulalo palimi-daare nimu epe kone mada namealimi.
Go yapare aa nipuna kone epealiare mo epe kone meape madaa kalai napi pawa kumapi-rupa aipapulu mealia.
7 Ne mo wae kone imi aanu raapu meda-para napiri ne ora mopare yola-moneape.
Gore nimumi ne epe kone meda mada nagialimi.
8 Aa nipu epe kone sua nipuna eta no pora pamea yae luabu ora epeta. Go yapare aa meda nipu epe kone na-iare nipuna bipa nipu makiraaya.
Gore akolo ya? Nipuna kone waru na-ia-pulu nipu maeyae aa pia.
9 Epe kone na-imi aanu nimuna pulalo peme yae rayo pa kone padane agu sua peme.
Goa peme pare epe aanu nimuna bipa epea agu peme. Goa pua nimu lo robaa padane-para sua peme.
10 Aa nipuna bipa nipuna lo robaa-para ia kedaa page raana page nipuna bipa makuaya.
Goa pua wala aa yago meda mada namea watea.
11 Wae aa nipuna ruru ona nogo naaki luabu ora oyoa luabu dia yalimi.
Go yapare mo epe redepone aa-na ruru ora puri waru mua nimu ora epe ruru piralimi.
12 Aa medalomame gupa kone imi: Nimuna pema yae rayo epe ta kone sua peme.
Go yapare nimumi pama pama pua omalimi.
13 Niaame giri lo aalima page wae lo robaa kedaa niaa mada nagimalia.
Raana omo pirape yapi-di rabu page lo robaa kedaa ora mada na-dia yalia.
14 Wae aanu nimuna peme wae yae madaa ini noa raana waru omeme.
Go yapare epea peme aanu nimu pedo raana waru peme.
15 Aanu nimu makuae yae ogesi i aanumi agaa ia-rupa luabu kone waru rulaeme.
Goa pea pare kone epe-rupa ia aame nipuna lape agaa rayo waru kone makuaawa ta.
16 Epe kone i aa nipumi nipuna kone waru suruboa nipu madaa wae yae ora naepena kone ia.
Wae aame re oyae rayo pa epeta kione sua rayo pa palua kone sua pa pama pea. Nipu wae aa yade kone page na-ia.
17 Ratu yawe aanumi maeyawa ratu ora aipapulu yaweme.
Onaa luabumi aa meda oro yalo nipuna raana ratuaaya madaare gimi omeme.
18 Aa medaloma ogesi makuawa nimu mo maeyae aanuna kone rateme.
Go yapare epe aanu nimuna makuae yaere nimuna alu-para epe pepena peme raguname adea. Go aa nipuna ia kone-re epe aaluna pepena yade.
19 Wae pupitagi aanu nimu mo epe aanu pitimi-para pirua nimu rabamu eta epe yaenu kanalo agaa lo piralimi.
Nimu odome omena kone sua pitimi.
20 Aa medaloma oyae rudu teme adape-re gime omeme. Nimuna aapa ame yalia page ora gimeme.
Amone aanu nimuna adami aanu adaapu aawaeme.
21 Aa medame aa yago meda naara mapiralia-re go aa nipu maeyawa naarame pama pea.
Go yapare aa medame oyae ruduta aanu madaa odome omoa titi omalia-daare go aa nipu epe raana mealia.
22 Aanumi wae yae oro yalo pumuna kone sua pualimiri nimuna kone ota.
Go yapare aa medame epea peme mada rana omoa onaame epe pora ratina kone salia-dare epe kone go aa waru kata.
23 Neme kogono waru radaa pina pali-dare ne ora epe yoto meali.
Go yapare ne pa pirua agaa wariba pirali-dare ne wae naarame omali.
24 Epe kone ia aa-na konere nimuna mone yade.
Go yapare aa medaloma epe kone na-imire nimu maeyae kone agu su aaeme.
25 Gore aa medame koso raba mu agaa epe-rupa teare mo kosome aa tumaomaarina-re waea pana tea.
Go yapare mo koso raba meape agaa epe-rupa nateare go aa nipu makira agaa ne aa.
26 Aa meda nipu Adaa Aa-na agaa ratua kumapi-rupa piraliare nipu oyae meda palame na-omalia.
Goa pua nipuna nogo naakinu page nimu luabu epe-rupa piralimi.
27 Adaa Aa-na agaa pagoa nipu ratapena konere ipa laipi kagaa piraama lama popena re yade.
Go kone i aanu madaa wae yaenu naepalia. Go pua mo wae yaenu epolalo palia page mada mapakealia.
28 Aa mudu king medame onaanu adaapu surubaliare nipu adaa bi mea kateme.
Go yapare mo aa mudu king nipumi onaa ogepusi surubalia raburi nipu adaa bi nasalia.
29 Aa meda nipu ratu aipapulu nayaweare go aa nipu ora epe kone waru ia.
Go yapare ratu yawe aa maeyae kone ora epe ta kone ia.
30 Aa meda nipu pu robaa kumapu pawa ina pirualiare nipuna to yogaene page epealia.
Go yapare aa meda nipumi wae agaa loa oro yalo oyae epame omape kone sualiare wae yaina go aa nipu madaa pupua nipuna uni luabu mada maopaya.
31 Gote nipumi onaa raayo warisa-pulu aa medame go aa nere ora aa naare wae te-dare neme Gote page wae gote yade te.
Go yapare Gote adaa bi katere naaranu page epea pali.
32 Wae aanu nimuri nimuna peme wae yaenumi nimu maoyaeme.
Goa peme pare epe-rupa pimi aanu nimuri oyae meda page ake palua pae kone na-i epe rupa aeme. Nimu madaa omape yaeme mealia rabu page kone rulae yae mada puri paboa aalimi.
33 Kone epe waru na-imi aanu nimuna bipa aba makuaeme. Makuae yae-para epe kone lapore nimumi minalo suruba pia pare nameme.
Go yapare epe kone imi aanu nimuna minalo epe kone epe pora ratua oro yalo muaeme.
34 Gore onaa luabumi epe kone sua epe agaa ratalimiri go kantri epealia.
Go yapare nimumi wae-yaenu pa pala pitimiri nimu yala adaa poteme.
35 Aa mudu king nimuna kogono aanumi epe kogono peme raburi nimu madaa raana waru omea.
Kogono aanumi wae kogono peme raburi mo aa mudu king nipu yala mapaeme. Goa peme rabu king nipumi nimu ratu yawalia.